ކުދިކުދި އާބާދީތަކުގެ ކައުންސިލް އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ ހައްލުކުރުމުގެ މަސައްކަތް ކުރަމުންދާ ކަމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެ އެވެ. 

ވަޒީރު މިހެން ވިދާޅުވީ ކުޑަ އާބާދީއެއް އޮތް ވ. ރަކީދޫ ކައުންސިލް އިދާރާގެ އިދާރީ ހުރިހާ މުވައްޒިފުން ވަޒީފާއިން ވަކިވެ އެ އިދާރާގެ ޚިދުމަތްތައް މެދުކެނޑުމާއި ގުޅިގެންނެވެ. އެކަމުގެ ކަންބޮޑުވުންތަކާއެކު ރައްޔިތުން ނިކުމެ ކައުންސިލް އިދާރާގައި ވަނީ ތަޅު އަޅުވާލާފަ އެވެ.

ރަށަށް ނިސްބަތްވާ ސަތޭކައެއްހާ މީހުން ވެސް ރަކީދޫގައި ދިިރިނުޅޭއިރު އެ ރަށު ކައުންސިލްގެ ނާއިބު ރައީސާއި އިތުރު ކައުންސިލަރަކު ވެސް ވަނީ އިސްތިއުފާ ދެއްވާފަ އެވެ.

ވަޒީރު ކުރެއްވި ޕޯސްޓެއްގައި ވިދާޅުވީ ފަތުރުވެރިކަމާއި އެނޫންވެސް އިޤުތިޞާދީ ފުރުޞަތުތައް ފަހިވެފައިވާ ކުދިކުދި އާބާދީތަކުގެ ކައުންސިލް އިދާރާތަކުގައި މަސައްކަތް ކުރާނެ އިދާރީ މުވައްޒަފުން ނުލިބުމުގެ މައްސަލަ އަންނަނީ އިތުރުވަމުން ކަމަށެވެ. އަދި މި މައްސަލަ ހައްލު ކުރުމަށް ގުޅުންހުރި މުއައްސަސާތަކާއެކު ދަނީ މަސައްކަތް ކުރަމުން ކަމުގައި ވިދާޅުވި އެވެ.