ދެއަހަރުތެރޭ ރާއްޖޭގެ ހުރިހާ ރަށެއްގައި އައުޓްޑޯ ޖިމް ގާއިމުކުރުމާއި، ފިޓްސަން އެންޑް ރެކްރިއޭޝަން ސެންޓަރ (އެފްއާރުސީ) ގާއިމުކުރުމުގެ މަސައްކަތް ފަށާފައިވާއިރު، އެމަސައްކަތްތައް ނިންމާލެވޭނެކަމުގެ ޔަގީންކަން ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ދެއްވައިފިއެވެ.

މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ރާފިއު ވަނީ އެ މަޝްރޫޢުގެ މަސައްކަތުގެ އަދާހަމަ ހާމަކުރައްވައިފައެވެ.

ވަޒީރު ވިދާޅުވީ 186 އައުޓްޑޯ ޖިމް ގާއިމުކުރުމުގެ މަސައްކަތް ކުރާއިރު، މިހާތަނަށް 15 އައުޓްޑޯ ޖިމްގެ މަސައްކަތް އެއްކޮށް ނިންމާލާފައިވާ ކަމަށެވެ. އަދި، 130 އައުޓްޑޯ ޖިމްގެ މަސައްކަތް މިހާރު ކުރިއަށްދާއިރު މިއަހަރުތެރޭ 38 އައުޓްޑޯ ޖިމްގެ މަސައްކަތް ފެށިގެންދާނެ ކަމަށް ވަޒީރު ވިދާޅުވިއެވެ.

އެފްއާރުސީތަކުގެ އެސެސްމަންޓުން ދައްކަނީ 172 ސެންޓަރު އަލަށް ގާއިމުކުރަންޖެހޭކަން ކަމަށް ވަޒީރު ވިދާޅުވިއެވެ. އެގޮތުން މިހާރު 6 ތަނެއްގެ މަސައްކަތް އަލަށް ފަށައި އެއްކޮށް ނިންމާލާފައިވާކަން ވަޒީރު ފާހަގަކުރެއްވިއެވެ. އަދި، މިހާރު 149 އެފްއާރުސީގެ މަސައްކަތް ކުރިއަށްދާކަމަށް ވަޒީރު ވިދާޅުވިއެވެ. ހިނގަމުންމިދާ 2026 ވަނަ އަހަރު 17 އެފްއާރުސީއެއްގެ މަސައްކަތް ފެށިގެންދާނެ ކަމަށް ވެސް ވަޒީރު ވިދާޅުވިއެވެ.

އައުޓްޑޯ ޖިމްތަކާއި އެފްއާރުސީތަކުގެ މަސައްކަތް އެއްފަހަރާ ކުރިއަށްގެންދާއިރު، ސަރުކާރުގެ އަމާޒަކީ މިއަހަރުގެ ނިޔަލަށް މި މަސައްކަތްތަކުގެ ބޮޑުބައެއް ނިންމާލުމެވެ. އެގޮތުން ވަޒީރު ވިދާޅުވީ މި މަސައްކަތްތަކުގެ އަމަލީ މަސައްކަތް ނިމޭއިރު، އެތަންތަނަށް ބޭނުންވާ ތަކެތި އެއްފަހަރާ ގެނެވޭނެ ގޮތް ހަމަޖައްސާނެ ކަމަށެވެ.

ވަޒީރު ވިދާޅުވީ މުޅި ރާއްޖޭގައި ކުޅިވަރުގެ 879 މަޝްރޫގެ މަސައްކަތް ކުރިއަށްގެންދާނެ ކަމަށެވެ. އެ މަޝްރޫޢުތަކުގެ މަސައްކަތްތައް އެކި މަރުޙަލާތަކުގައި ހުރިއިރު، މަޝްރޫޢުތައް ނިންމާލެވޭނެކަމުގެ ޔަގީންކަން ވަޒީރު ވަނީ ދެއްވައިފައެވެ.