މާލޭގައި ދިރިއުޅޭ ރައްޔިތުންނަށް ފުލެޓު ދޫކުރުމުގެ އުސޫލުގެ ދަށުން، ބޯހިޔާވަހިކަން ފޯރުކޮށްދިނުމުގައި ޚާއްސަ އިސްކަންދެވޭ ކެޓަގަރީތަކުގެ ޝަރުތުތަކަށް ހެޔޮ ބަދަލުތަކެއް ގެނެސްފި އެވެ.

މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗާއިން މިއަދު ބުނީ މާލޭގައި ދިރިއުޅޭ ރައްޔިތުންނަށް ފުލެޓު ދޫކުރުމުގެ އުސޫލުގެ ދަށުން ބޯހިޔާވަހިކަން ފޯރުކޮށްދިނުމުގައި ޚާއްސަ އިސްކަންދެވޭ ކެޓަގަރީތަކުގެ ލިސްޓުގައި ހިމެނޭ އިދާރާތަކާއި މުއައްސަސާތަކުގެ ކެޓަގަރީތަކަށް އެދި ހުށަހަޅާ ފަރާތްތަކުން އުސޫލުގައިވާ ޝަރުތުތަކުގެ އިތުރުން ފުރިހަމަވާންޖެހޭ ޝަރުތުތައް އިސްލާޙުކޮށްފައިވާ ކަމަށެވެ.

މައިގަނޑު ގޮތެއްގައި ގެނެސްފައިވަނީ ވަޒީފާގެ މުއްދަތު ގުނުމުގައި ބަލާ މިންގަނޑަށް ގެނެސްފައިވާ ބަދަލާއި ފުލެޓު ލިބުމަށްފަހު ޚިދުމަތްކުރުމަށް އެއްބަސްވާ މުއްދަތެވެ.

އެގޮތުން ވަޒީފާގެ މުއްދަތަށް ބަދަލު ގެނައިއިރު ޚާއްސަ ކެޓަގަރީއަށް ޝަރުތު ހަމަވުމަށްޓަކައި، އެ އިދާރާއެއްގައި މަދުވެގެން ފަސް އަހަރު ދުވަހު މަސައްކަތް ކޮށްފައިވާން ޖެހޭ ކަމަށް ކުރީން ބަޔާންކޮށްފައިވެ އެވެ.

ނަމަވެސް މިހާރު މި މުއްދަތު ވަނީ އެއް އަހަރު ދުވަހަށް ކުރުކޮށްފަ އެވެ. އެގޮތުން، ޚާއްސަ އިސްކަންދެވޭ އިދާރާއެއްގައި މެދުނުކެނޑި ވޭތުވެދިޔަ އެއް އަހަރު ފުލް-ޓައިމް ވަޒީފާ އަދާކޮށްފައިވާ ފަރާތްތަކަށް މިހާރު އެކެޓަގަރީން ފުލެޓަށް ކުރިމަތިލެވޭނެ އެވެ.

ފުލެޓު ލިބުމަށްފަހު ޚިދުމަތްކުރުމަށް އެއްބަސްވާ މުއްދަތު ކުރީން އޮތީ ފުލެޓު ލިބޭ ފަރާތްތަކުން އެ އިދާރާއެއްގައި މަދުވެގެން ފަސް އަހަރު ދުވަހު މަސައްކަތްކުރުމަށް އިގުރާރުވާން ޖެހޭ ގޮތަށެވެ.

ނަމަވެސް މިހާރު އޮތްގޮތުން ބޯހިޔާވަހިކަން ހަވާލުކުރާ ތާރީޚުން ފެށިގެން، އެ އިދާރާއަކުން ނުވަތަ މުއައްސަސާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާން ޖެހޭނެ ކަމަށް ވަނީ ބަޔާންކޮށްފަ އެވެ.

މީގެ އިތުރުން ކުރީން ލިސްޓްގައި ހިމެނިފައިވާ އިދާރާތަކުގެ ލިސްޓަށް ކެޕިޓަލް މާކެޓް ޑިވެލޮޕްމަންޓް އޮތޯރިޓީ  ވަނީ އިތުރުކޮށްފަ އެވެ.

* ޖުޑިޝިއަރީގެ މުވައްޒަފުން - 100 ފްލެޓް

* ދިވެހި ފުލުހުންގެ ޚިދުމަތުގެ މުވައްޒަފުން - 100 ފްލެޓް

* މޯލްޑިވްސް ނެޝަނަލް ޑިފެންސް ފޯސްގެމުވައްޒަފުން - 100 ފްލެޓް

* ސިވިލް ސާރވިސްގެ މުވައްޒަފުން - 200 ފްލެޓް

* މޯލްޑިވްސް ކަރެކްޝަނަލް ސަރވިސްގެ މުވައްޒަފުން - 100 ފްލެޓް

* އިތުރު 24 އޮފީހަކާއި އިދާރާއަކަށް - 400 ފްލެޓް