ކުޅިވަރު އެސޯސިއޭޝަންތައް ހަރުދަނާކުރުމުގެ މުހިއްމުކަން ބޮޑުކަމަށާއި، އެކަމަށް ކުރަމުންގެންދާ މަސައްކަތްތަކުގެ ތެރެއިން ކުޅިވަރު އިދާރާތައް އެއް ވިއުގަޔަކުން ގުޅާލާ ޑިޖިޓަލް ޕްލެޓްފޯމް އަޕްގްރޭޑްކޮށް ނިންމާލާފައިވާކަމަށް ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ އެ ވުޒާރާގެ މަސައްކަތްތަކުގެ އަދާހަމަ ހިއްސާކުރެއްވުމަށް މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.  

ވަޒީރު ވިދާޅުވި ގޮތުގައި ކުޅިވަރު އެސޯސިއޭޝަންތައް ހަރުދަނާކުރުމުގައި އެންމެ މުހިއްމު އެއް ކަމަކީ، ކޮމިޝަނަރ އޮފް ސްޕޯޓްސްއާ އޮންނަ މުޢާމަލާތުކުރުން ރަނގަޅުކުރުން ކަމަށެވެ. އެގޮތުން، ކޮމިޝަނަރ އޮފް ސްޕޯޓްސް އާއި އެސޯސިއޭޝަންތަކާއި ކްލަބް ޖަމިއްޔާތައް ވެސް ހިމެނޭ ގޮތަށް މަޢުލޫމާތު ބަދަލުކުރެވޭނެ ރަނގަޅު ނިޒާމެއް އޮތުމަކީ މުހިއްމު ކަމެއްކަމުގައި ވަޒީރު ފާހަގަކުރެއްވިއެވެ.

ވަޒީރު ވިދާޅުވީ އެކަމަށް މިހާރު ބޭނުންކުރަމުން އަންނަ ސޮފްޓްވެއަރ އިތުރަށް އަޕްގްރޭޑްކޮށް އެހެން ޕްލެޓްފޯމަކަށް ބަދަލުކުރުން ނިމިފައިވާ ކަމަށެވެ. މިހާރު ކުރަންހުރި ކުދިކުދި މަސައްކަތްތައް ނިންމާލުމަށް ފަހު އެ ޕްލެޓްފޯމް ދެހަފްތާ ތެރޭ ބޭނުންކުރަން ފެށޭނެ ކަމަށް ވަޒީރު ވިދާޅުވިއެވެ.  

ވަޒީރު ވިދާޅުވީ އާ ބަދަލާއެކު، މަޢުލޫމާތުތައް ރައްކާކުރެވި މުސްތަގްބަލުގައި ފަސޭހަވަގެންދާނެ ކަމަށެވެ.

އާ ޕްލެޓްފޯމް ބޭނުންކުރަންފަށާއިރު، ކުޅުންތެރިން ރަޖިސްޓްރީކުރުމާއި ރިލީޒްކުރުމުގެ އިތުރުން ޤަވާއިދުތައް ހުށަހެޅުމުގެ ހުރިހާ ކަމެއް ވެސް ވަންގަވް މެދުވެރިކޮށް ކުރެވޭނެ ކަމަށެވެ. މި ކުރިއެރުން ކުޅިވަރުގެ އިދާރާތަކަށް ލިބިގެންދާއިރު، މިއީ ސަރުކާރުގެ މޯލްޑިވްސް 2.0 ގެ ތަޞައްވުރާ އެއްގޮތަށް ގެނެވިގެންދާނެ މުހިއްމު ބަދަލެއް ކަމަށް ވަޒީރު ރާފިއު ވިދާޅުވިއެވެ.