ސަރުކާރުން ގައުމުގެ މުސްތަގުބަލަށްޓަކައި އެކަށައަޅާފައިވާ ސިޔާސަތުތައް ތަންފީޒުކުރުމުގައި ސަރުކާރާ އެއްކޮޅު ކައުންސިލުތަކުން ވަރަށް ބޮޑަށް އެއްބާރުލުމާއި އެހީތެރިކަން ލިބޭކަން ފާހަގަކުރައްވަމުން އެނޫން ކައުންސިލުތަކުން ދަތިތަކާއި ތުރާުތައް ކުރިމަތިކުރާކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް ވިދާޅުވެއްޖެއެވެ. 

މިއަދު ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ޕީޕަލްސް ނޭޝަނަލް ކޮންގްރެސް ޕާޓީގެ ފަރާތުން ކުރިއަށް އޮތް ލޯކަލް ކައުންސިލު އިންތިހާބުގައި މައްޗަންގޮޅި ދެކުނު ދާއިރާއަށް ވާދަކުރައްވާ ކެންޑިޑޭޓުންނަށް ތާއީދު ހޯއްދެވުމަށް އެ ދާއިރާގެ ގޭގެއަށް ޒިޔާރަތްކުރައްވައި ޕާޓީގެ ދޮރުން ދޮރަށް ހަރަކާތުގައި ބައިވެރިވެވަޑައިގެންނެވިއިރު އެ ސަރަހައްދުގައި ހުންނަވައިގެން އެމްއެމްޓީވީއަށް ދެއްވި ބަސްދީގަތުމުގައި ވަޒީރުވަނީ ސަރުކާރަށް ކައުންސިލުތައް ލިބުން މުހިއްމުވާ ސަބަބުތަކަށް ތަފުސީލުކޮށް އަލިއަޅުވައިލައްވާފައެވެ. 

ސަރުކާރެއް ރައްޔިތުން ހޮވަނީ ރައްޔިތުން އެދޭ ކަންކަން ހާސިލުކުރުމަށްކަން ފާހަގަކުރައްވައި ނަސީރު ވިދާޅުވީ ސަރުކާރު ހޮވުމަށްފަހު ކައުންސިލުތަކަށް އެހެން ވިސްނުމެއްގެ ބަޔަކު އައުމުގެ މާނައަކީ ރައްޔިތުންގެ އުންމީދާ އިދިކޮޅު ހަރަކާތާ ހިލާފު ބަޔަކު ތިބުން ކަމަށެވެ. ރަށު އަދި ސިޓީ ކައުންސިލުތަކުގައި އިދިކޮޅު ބަޔަކު ތިބިއްޖެނަމަ ރަށްތަކާއި ސިޓީތަކުގެ ތަރައްގީގެ އިންޖީނު ހުއްޓުމަކަށް އަންނާނެ ކަމުގައި ނަސީރު ވިދާޅުވިއެވެ. 

ނަސީރު އިތުރަށް ވިދާޅުވީ ސަރުކާރަށް އެއްބާރުލުންދިނުންކަމަށް ބުނެވޭ ބުނުމުގެ ހަގީގީ މާނައަކީ ރައްޔިތުންނަށް އެއްބާރުލުން ދިނުން ކަމަށެވެ. އެއީ ސަރުކާރަށް އެއްބާރުލުންދޭ ކައުންސިލުތަކެއް އިންތިހާބުވުމަކީ ރައްޔިތުން ސަރުކާރުގެ ކިބައިން އެދޭ ކަންކަން ހާސިލުވުމަށް މަގުފަހިވާނެ ކަމެއް ކަމަށެވެ.

ވަޒީރުގެ ތަޖުރިބާއަށް އަލިއަޅުވައިލައްވަަމުން ވިދާޅުވެފައިވަނީ ވުޒާރާއިން ކުރާ އެއް މަސައްކަތަކީ ތަރިކަވެރިން އުފެއްދުމުގެ މަސައްކަތް ކަމަށާއި، ކޮންމެ ރަށަކުން އުމުރާއި ތައުލީމަށް ބަލައި ދިހަ ވަރަކަށް މީހުންގެ ޓީމެއް ނަގަައިގެން ތަމްރީނާއި ތައުލީމު ފޯރުކޮށްދޭންޖެހޭއިރު އެކަން ކުރަންޖެހެނީ ކައުންސިލުތައް މެދުވެރިކޮށް ކަމަށެވެ. 

"އަޅުގަނޑުމެން ވުޒާރާގެ ތަޖުރިބާއަކީ ކައުންސިލު ސަރުކާރާ ގުޅިފައި އޮންނަ ހާލަތުގައި އެފަދަ ކައުންސިލެއް އޮންްނަނަމަ ވަރަށް އެހީތެރިވެދެއްވާ، އަމިއްލައަށްވެސް ގުޅުއްވައި އެކަންކަން ކުރިއަށްގެންދަވަން އެހީތެރިކަން ފޯރުކޮށްދެއްވާ. އެކަމަކު އެ ރޫހެއް ނުވޭ އެހެން ނުވާ ހާލަތުގައި. އެހެންވެ ބައެއް ރަށްރަށް އެބަހުރި އެކަންކަން ފަށައިގަންނަން ދަތިވެފައި،" ނަސީރު ވިދާޅުވިއެވެ. 

ނަސީރު ވިދާޅުވީ ތަޖުރިބާއިން ފެންނަން އޮތީ ސަރުކާރާ އެއް ރޫހެއްގައި މަސައްކަތްކުރާ ކައުންސިލެއް އޮތްނަމަަ އެއްބާރުލުންދީ މަސައްކަތްތައް ވަރަށް ބޮޑަށް ފަސޭހަކޮށްދޭއިރު، އެނޫން ގޮތަކަށް ކައުންސިލުގެ ރޫހާއި ވިސްނުން ހުރެއްޖެނަމަ އެކަމުގެ ސަބަބުން ބޮޑެތި ގޮންޖެހުންތަކެއް ކުރިމަތިވާ ކަމަށެވެ.