ތަރައްގީގެ ދުވެލި ހަލުއިވާނީ އެ މަސައްކަތްކުރުމަށް ސަރުކާރާއި ލޯކަލް ކައުންސިލުތަކުގައި އެއް ވިސްނުމެއް ގަބޫލުކުރަ އެއް ފިކުރެއްގެ އަދި އެ ވައުދުތަކެއް ފުއްދުމަށް މަސައްކަތްކުރާ ބަޔަކު ތިބުމުންކަމަށް ސިޓީތަކާއި އިދާރީ ދާއިރާތަކާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރު ވިދާޅުވެއްޖެއެވެ. 

ވެރިކަންކުރާ ޕީޕަލްސް ނޭޝަނަލް ކޮންގްރެސްއިން މިއަދު މައްޗަންގޮޅީ ދެކުނު ދާއިރާގައި ކުރިއަށްގެންދިޔަ "ދޮރުން ދޮރަށް" ހަރަކާތުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހުގައި ބައިވެރިވެވަޑައިގެން އެމްއެމްޓީވީއަށް ދެއްވި ބަސްދީގަތުމުގައި ވަޒީރު ވިދާޅުވީ މާލެއާއި މުޅި ރާއްޖެ ތަރައްގީކުރެއްވުމުގައި ކުރިއަށް ވަޑައިގަންނަވާނެ ގޮތާމެދު ރައީސްގެ ތަސައްވުރެއް އެބައޮތް ކަމަށެވެ. އެ ތަސައްވުރު ހަލުއިކޮށް ތަންފީޒުކުރުމުގައި ކައުންސިލުތަކުގެ އެއްބާރުލުން ވަރަށް މުހިއްމުވެފައި ޒަރޫރީކަމަށެވެ. 

އެހެންކަމުން އެ މަސައްކަތްކުރުމުގައި ރައީސާ އެއް ވިސްނުމެއްގައި މަސައްކަތްކުރާ އެމަނިކުފާނުގެ ތަސައްވުރު ބަލައިގަންނަ އަދި އެމަނިކުފާނާ މަޝްވަރާކޮށް ވާހަކަދައްކައިގެން މަސައްކަތްކުރާނެ ކައުންސިލުތަކެއް އޮތުމަކީ ކޮންމެހެންވެސް ބޭނުންވާ ކަމެއް ކަމުގައި އާދަމް ޝަރީފު ވިދާޅުވިއެވެ. 

"އަދި އޭގެ ޒާތުގައި ރައްޔިތުންނަށް ގެންނަން ބޭނުންވާ ތަރައްގީ ހަލުއިކޮށް ގެނައުމަށްޓަކައި އެއް ފިކުރެއްގައި މަސައްކަތްކުރާނެ ބަޔަކު ގެނައުން ވަރަށް މުހިއްމު،" އާދަމް ޝަރީފު ވިދާޅުވިއެވެ. 

ޕީއެންސީއަކީ ތަރައްގީގެ ފިކުރުކަން ފާހަގަކުރައްވަމުން އާދަމް ޝަރީފު ވިދާޅުވީ ތަރައްގީގެ މަސައްކަތުގެ ތެރެއަށް އެހެން ފިކުރެއްގެ ބަޔަކު ވަދެއްޖަނަމަ ތަރައްގީއަށް ހުރަސްއަޅައި ތަރައްގީގެ ކަންކަން މަޑުޖެއްސުމަށް ގިނަ މަސައްކަތްތަކެއް ކުރާނެ ކަމަށެވެ. އެ ސަބަބަށްޓަކައި ކައުންސިލުތަކަށް ޕީއެންސީގެ ކެންޑިޑޭޓުން ހޮވުމަކީ ކުރުން ލާޒިމު ކަމެއްގެ ގޮތުގައި ވަަޒީރު ސިފަކުރެއްވިއެވެ. 

އާދަމް ޝަރީފު ވިދާޅުވި ގޮތުގައި ރައީސްގެ އަރިހުގައި ދޮރުން ދޮރަށް ވަޑައިގަންނަވާއިރު އަދި އަތޮޅު ތެރޭގެ ކެމްޕެއިން ހަރަކާތްތަކުގައި ބައިވެރިވެވަޑައިގަތުމުގެ ތެރެއިން ފެނިވަޑައިގަންނަވާ މަންޒަރަކީ ރައްޔިތުން ރައީސް ޑރ.މުއިއްޒުގެ ވިސްނުންފުޅު ބަލައިގަނެ، އެމަނިކުފާނަށް އަދި ޕީއެންސީއަށް ތާއީދުކުރާ މަންޒަރުކަަމަށެވެ. 

ނަމަވެސް ޕީއެންސީން އިންތިހާބު ކާމިޔާބުކުރުމަށް އިންތިޒާމީ ގޮތެއްގައި ވަރަށް ބޮޑެތި މަސައްކަތްތަކެއް ކުރަމުންދާނެ ކަމަށާއި، އެއީ މި އިންތިހާބުގއި ކުރެވޭ ކެމްޕޭނަކީ 2028 ވަނަ އަހަރު އޮންނަ ރިޔާސީ އިންތިހާބު ކާމިޔާބުކޮށް ރައީސަށް ދެވަނަ ދައުރެއް ހޯދައިދިނުމަށްވެސްް އެހައިމެ ބޭނުންތެރި އިންތިހާބަކަށްވުން ކަމަށް ވަޒީރު ވިދާޅުވިއެވެ.