ކައުންސިލެއްގެ އިދީކިލަކަމުން ރައްޔިތުންނަށް ސަރުކާރުން ފޯރުކޮށްދޭ ހިދުމަތްތައް އެ ރައްޔިތުންނަށް ވާސިލުވުމުގައި އެންމެ ދުވަހެއްވެސް ބޭކާރުވެގެންދާން ރައްޔިތުން ބޭނުންނުވާކަަމަށް ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ނައިބުރައީސް އަދި މަސްވެރިކަމާ ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމު ވިދާޅުވެއްޖެއެވެ. 

ކޮންގްރެސް ޕާޓީގެ ފަރާތުން މައްޗަންގޮޅީ ދެކުނު ދާއިރާގައި މިއަދު ކުރިއަށްގެންދިޔަ ދޮރުން ދޮރަށް ހަރަކާތުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އަރިހުގައި ބައިވެރިވެވަޑައިގެން އެމްއެމްޓީވީއަށް ދެއްވި ބަސްދީގަތުމުގައި ޝިޔާމު ވިދާޅުވީ ސަރުކާރުން ގެންނަ ތަރައްގީއާއި ކުރިއެރުން ގެނައުމުގައި އެންމެ ދުވަހެއްވެސް ގެއްލިގެންދިއުމަކީ ރައްޔިތުން އެދޭ ކަމެއް ނޫން ކަމަށެވެ. 

"ކައުންސިލުގެ އިދިކީލިކަން ހުރެގެން، މިސާލަކަށް ދޭންޖެހޭ ހުއްދައެއް ނުދީގެން މަސައްކަތެއް ނުފެށި އެންމެ ދުވަހެއް ލަސްވާކަށްވެސް ރައްޔިތުން ބޭނުމެއް ނުވޭ.،" ޝިޔާމު ވިދާޅުވިއެވެ. 

ޝިޔާމު އިތުރަށް ވިދާޅުވީ ލާމަރުކަޒީ ނިޒާމު ގާއިމުކުރެވުނުއިރު މިހާރު އިދިކޮޅުގައި އެޮތް އެމްޑީޕީން އެ ނިޒާމު ތަސައްވުރުކޮށްދިނީ ވަރަށް ގޯސްކޮށް ކަމަށެވެ. އެގޮތުން އެއިރުވެސް މިހާރުވެސް ކައުންސިލުތަކަކީ ސަރުކާރު ޖަވާބުދާރީކުރުވާ ތަންތަނުގެ ގޮތުގައި އެމްޑީޕީން ސިފަކޮށްދެމުންދާކަމަށް ޝިޔާމު ވިދާޅުވިއެވެ. 

އެއީ ނުރަނގަޅު ތަސައްވުރެއްކަަން ފާހަގަކުރައްވަމުން ޝިޔާމު ވިދާޅުވީ ލާމަރުކަޒީ ނިޒާމަކީ އަދި ކައުންސިލުތަކަކީ ސަރުކާރުން ފޯރުކޮށްދޭ ހިދުމަތްތައް ވީހާސްވެ ހަލުއިކޮށް ފޯރުކޮށްދިނުމުގައި ސަރުކާރަށް އެހީތެރިވުމަށް އޮންނަ ނިޒާމެއް އަދި އިދާރާތަކެއް ކަމުގައެވެ. 

މިނިސްޓަރު އިތުރަށް ފާހަގަކުރެއްވީ މަސްވެރިކަމާ ބެހޭ ވުޒާރާގެ މަސައްކަތުގެ ދާއިރާގެ ތެރޭގައި ކޯލްޑް ސްޓޮރޭޖާއި އައިސް ޕްލާންޓުތައް އެޅުން ފަދަ މަސައްކަތްތަކުގައި ވާދަވެރި ޕާޓީތަކުގެ އަޣުލަބިއްޔަތު އޮންނަ ކައުންސިލުތަކުން ބިން ހަމަޖައްސައިނުދީ ދިގުލައިގެން ގޮސްފައި  ހުރި ކަމެވެ. 

އިތުރަށް ޝިޔާމު ވިދާޅުވީ އިންތިހާބުތައް ކައިރިވެގެން އަންނައިރު ވަރަށް ގިނަ ކައުންސިލުތަކުން މަސައްކަތްކުރަނީ ރައްޔިތުންގެ ސަފު ދޫކޮށްލުމަށްފަހު ޕާޓީން ކުރަހާ ރޮނގުތަކުގެ އިމުގައި ކަމަށެވެ. އެހެންކަމުން ސަރުކާރަށް ޖެއްސުންކުރުމުގެ ނިޔަތުގައި ބައެއް ކައުންސިލުތައް ކަންކަން ކުރަމުންދާ ކަމަށެވެ. 

އެ ސަބަބަށްޓަކައި ސަރުކާރަށް އެއްބާރުލުންދޭނެ ކައުންސިލުތަކެއް އިންތިހާބުވުމަކީ ތަރައްގީގެ ސަފުގައި ރާއްޖެ ކުރިއަރައިގެންދިއުމަށް އެޅިގެންދާނެ ބާރެއް ކަމަށް ޝިޔާމު ވިދާޅުވިއެވެ. އަދި ތަރައްގީގައި ކުރިއަށްދިއުމަށް ގައުމު ކުރިއަށްގެންދެވުމަށް ވަށާޖެހޭ ރައީސަކާއެކު ދެމިތިބުމަކީ ވަރަށް މުހިއްމު ކަމެއް ކަމުގައިވެސް ވަޒީރު ވިދާޅުވިއެވެ.