ބޮޑު އިންޓަރެސްޓު ރޭޓުގައި ލޯނު ނެންގެވުމުގެ ވިސްނުމެއް ނުގެންގުޅުއްވާކަމަށާއި މިހާތަނަށްވެސް ކުރީގެ ސަރުކާރުތަކުގައި ނަގާފައިވާ ގޮތަށް ބޮޑު އިންޓަރެސްޓުގައި ލޯނެއް މި ސަރުކާރުން ނަގާފައިނުވާނެ ކަމުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ނޫސްވެރިޔަކުވަނީ ސަރުކާރުން ބޮޑު އިންޓަރެސްޓުގައި ބޭރުގެ ފަރާތްތަކުން ލޯނު ނަގަން މަސައްކަތްކުރަމުންދާކަމަށާއި، ދައުލަތުގެ ބޭރުގެ ދަރަނި އަދާކުރުމަށް ބީއެމްއެލް މެދުވެރިކޮށް ލޯނެން ނަގަން އުޅޭކަމަށް ފެތުރެމުންދާ ވާހަކަތަކާ ގުޅިގެން ރައީސާ ސުވާލުކޮށްފައެވެ. 

އެ ސުވާލަށް ދެއްވި ޖަވާބުގައި ރައީސް ވިދާޅުވީ ބީއެމްއެލް މެދުވެރިކޮށް ލޯނެއް ނަންގަވައިގެން ދައުލަތުގެ ދަރަނި އަދާކުރެއްވުމަކީ އެއްވެސް އިރެއްގަައި ގެންގުޅުއްވި ވިސްނުންފުޅެއް ނޫން ކަމަށެވެ. އެމަނިކުފާނުވަނީ އަށެއް އޭޕްރީލުގައި 500 މިލިއަން ޑޮލަރުގެ ސުކޫކު ދެއްކުމަށް ސަރުކާރުން ވެފައިވާ ތައްޔާރީތަކުގެ ތަފުސީލުތައް ހާމަކުރައްވާފައެވެ. އެގޮތުން 650 މިލިއަން ޑޮލަރު ސޮވެރިން ޑިވެލޮޕްމެންޓު ފަންޑާއި ޔޫޒަބަލް ރިޒާވްގައި ރައްކާކުރެވިފައި ހުރިކަން ރައީސް ފާހަގަކުރެއްވިއެވެ. 

އެމަނިކުފާނު ވިދާޅުވެފައިވަނީ ސުކޫކު ދެއްކުމަށް ސަރުކާރުން ގަސްތުކުރަނީ ދައުލަތުގެ ރިޒާވްއާއި އެސްޑީއެފްގައި ރައްކާކުރެވިފައި ހުރި ފައިސާ ބޭނުންކުރައްވައިގެން ކަމަށެވެ. އަދި އެ ފައިސާ ދެއްކުމަށްފަހު ބާކީ 150 މިލިއަން ޑޮލަރު ހުންނާނެކަންވެސް އެމަނިކުފާނު ފާހަގަކުރެއްވިއެވެ. 

"އަޅުގަނޑުމެންނެއް ބީއެމްއެލްއިން ލޯނެއް ނަގައިގެން ދައްކާކަށް ޕްލޭނެއްކޮށްފައި ނުވާނެ. ޔޫޒަބަަލް ރިޒާވްއާއި އެސްޑީއެފްގައި ރައްކާކޮށްފައި ހުރި ފައިސާ އެއްކޮށްލުމުން 650 މިލިއަން ޑޮލަރަށްވުރެ ގިނައިން މިހާރުވެސް އެބަހުރި.،" ރައީސް ވިދާޅުވިއެވެ. 

ރައީސް ވިދާޅުވީ އެކި ފަރާތްތަކުން ސަރުކާރަށް ލޯނު ދިނުމަށް ހުށަހަޅާފައި އެބަހުރި ކަމަށެވެ. އަދި އެ ފަރާތްތަކާއެކު މަޝްވަރާކުރައްވަމުންގެންދަވާއިރު ލޯނުގެ އިންޓަރެސްޓު ރޭޓުތަކަށް ވަރަށް ބޮޑަށް ރިއާޔަތްކުރައްވާނެ ކަމުގައި ވިދާޅުވެ، ރައީސް ފާހަގަކުރެއްވީ މިހާތަނަށް ކުރީގެ ސަރުކާރުތަކުން ނެގި ލޯނުތައް ފަދަ އިންޓަރެސްޓު ރޭޓު މަތީ ލޯނުތަކެއް މި ސަރުކާރުން ނަގާފައި ނެތް ކަމެވެ. 

"އަޅުގަނޑުމެން ނެގޯޝިއޭޝަންސް ކުރިއަށް އެބަގެންދަން. އަޅުގަނޑުމެންގެ ވިސްނުމަކީ ބޮޑު އިންޓަރެސްޓުގައި ލޯނު ނުނެގުން. އެހެންވެ ނެގޯޝިއޭޝަންސް ދިގުލައިގެންދަނީ، ޑަބަލް ޑިޖިޓަށް ނާރާނެހެން މަސައްކަތްކުރަނީ،" ރައީސް ޑރ.މުޢިއްޒު ވިދާޅުވިއެވެ.