ރާއްޖޭގައި ތެޔޮ ރައްކާކުރެވޭ އެންމެ މަތީ މިންވަރަށް ތެޔޮ ރައްކާކުރެވިފައި އެބަހުރިކަން ފާހަގަކުރައްވަމުން ތެލާ ގުޅޭ ކަންބޮޑުވުމެއް ނެތްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މިއަދު ރައީސް އޮފީހުގައި ކުރިއަށްގެންދިޔަ ނޫސްވެރިންގެ ބައްދަލުވުމުގައި ރައީސް ވިދާޅުވީ މެދުއިރުމަތީގައި ހިނގަމުންދާ ހަނގުރާމައާ ގުޅިގެން ރާއްޖޭގެ އިގުތިސާދަށް ކުރާ ނޭދެވޭ އަސަރުތައް ކުޑަކުރުމަށް ގިނަ މަސައްކަތްތަކެއް ސަރުކާރުން ކުރަމުންދާ ކަމަށެވެ. 

އެގޮތުން ރާއްޖެއަށް ބޭނުންވާ ތެލާއި ކާބޯތަކެތި އެކަށީގެންވާ އަގެއްގައި ރާއްޖެއަށް ލިބޭނެކަން ކަށަވަރުކުރުމަށް އަޅަންޖެހޭ ފިޔަވަޅުތައް ސަރުކާރުން އަޅަމުންދާކަން ރައީސް ފާހަގަކުރެއްވިއެވެ. 

މެދުއިރުމަތީގެ ހަނގުރާމަ ދިގުލައިގެން ގޮސްފިނަމަ ތެލުގެ އަގު ބޮޑުވެދާނެ ހާލަތަކަށް ރާއްޖެ ތައްޔާރުވެފައި އޮތް މިންވަރާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ ރާއްޖޭގައި ތެޔޮ ރައްކާކުރުމުގެ ކެޕޭސިޓީ ހުރި މިންވަަރަށް ރާއްޖޭގައި މިވަގުތުވެސް ތެޔޮ ރައްކާކުރެވިފައި އެބަހުރި ކަމަަށެވެ. 

އެމަނިކުފާނު ވިދާޅުވި ގޮތުގައި މިވަގުތުވެސް ރާއްޖޭގައި ގާތްގަނޑަކަށް އެއް މަސްދުވަހުގެ މުއްދަތަށް ބޭނުންވާ މިންވަރަށް ތެޔޮ ހުރީ ރައްކާކުރެވިފައެވެ. އަދި ރާއްޖެއިން ތެޔޮ ގަންނަ ގައުމުކަމަށްވާ އޮމާނުން ރާއްޖެއަށް ތެޔޮ ޝިޕްމެންޓެއް 28 ފެބްރުއަރީގައި ފުރައިގެން ރާއްޖެއަށް ދަތުރުކުރަމުންދާއިރު، އިތުރު ޝިޕްމެންޓެއް ހޯދުމުގެ މަސައްކަތް ރޭ ފައްޓަވާފައިވާ ކަމަށް ރައީސް ވިދާޅުވިއެވެ. 

"ރާއްޖޭގައި (ތެޔޮ) ސްޓޮކް ކުރެވޭނެ އެންމެ މެކްސިމަށް އެބަހުރި ސްޓޮކް ކޮށްފައި. އެއްވެސް ކަންބޮޑުވުމެއް ނެތް. އޮމާނުން ރާއްޖެައަށް ތެޔޮ ހޯދޭނެ. އެގައުމަށްވެސް ހަމަލާތައް ދެމުންދޭ. އެކަން ވަރަށް ކައިރިން ބަލަމުން އެބަދަން،" ރައީސް ވިދާޅުވިއެވެ. 

ރާއްޖެއަށް ބޭނުންވާ ތެލާއި ކާބޯތަކެތި އެތެރެކުރުމަށް ބޭނުންވާ ބޭރު ފައިސާ ރައްކާކުރެވިފައި ހުރި މިންވަރަށް އިޝާރާތްކުރައްވަމުން ރައީސް ވިދާޅުވެފައިވަނީ އޭޕްރީލު އަށްވަނަ ދުވަހުގައި އަދާކުރަންޖެހޭ 500 މިލިއަން ޑޮލަރު އަދާކުރުމަށްފަހު ބާކީ 150 މިލިއަނެއްހައި ޑޮލަރު އެކަންކަމަށް ބޭނުންކުރެވޭ ގޮތަށް އެބަހުރި ކަމަށެވެ.