މި ސަރުކާރަކީ ހުދުމުހުތާރު ސަރުކާރެއްގެ ގޮތުގައި ސިފަކުރެވޭނެ އެއްވެސް ސަބަބެއް ނޯންނާނެ ކަމަށާއި، ހުދުމުހުތާރު އެއްވެސް ކަމެއް ނުކުރައްވާނެ ކަމުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

ރައީސް މިފަދައިން ވިދާޅުވީ މިއަދު އޮތް ނޫސްވެރިންގެ ބައްދަލުވުމުގައި، ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބާއްވާ ގޮތަށް ގާނޫނުއަސާސީއަށް ގެންނަ ބަދަލަކީ ހުދުމުހުތާރު ވެރިކަމެއް ގާއިމުކުރެއްވުމަށް ރައީސް ކުރައްވާ މަސައްކަތްޕުޅެއްކަމަށް އިދިކޮޅު ޕާޓީތަކުން ކުރާ ތުހުމަތުތަކަށް ރައްދުދެއްވައި ދެއްކެވި ވާހަކަފުޅުގައެވެ. 

މި ސަރުކާރަކީ ހުދުމުހުތާރު ސަރުކާރެއް ނޫންކަން ބަޔާންކޮށްދެއްވަމުން ރައީސް ވިދާޅުވީ މިއީ ހުދުމުހުތާރު ސަރުކާރެއްނަމަ އިދިކޮޅު ޕާޓީގެ ޕްރައިމަރީތައް ބޭއްވުމަށް ސަރުކާރު ސްކޫލުތައް ދޫނުކުރާނެ ކަމަށެވެ. އިދިކޮޅު ޕާޓީން އިންތިހާބުގައި ވާދަކުރާނެ ކެންޑިޑޭޓުން ކަނޑައެޅުމަށް ކުރިއަށްގެންދިޔަ އިންތިހާބުތައް ބާއްވާފައިވަނީ ސަރުކާރުގެ އިދާރާތަކުގެ ތެރޭގައި ސަރުކާރުގެ ފުރިހަމަ އެއްބާރުލުމާއެކުކަން ރައީސް ފާހަގަކުރެއްވިއެވެ. 

އަދި އެމަނިކުފާނުގެ ސަރުކާރު ހުދުމުހުތާރުނަމަ މާލޭގައި ކުރިއާލައި އެންގުމަކާނުލައި އެއްވެވޭ ގޮތަށް އޮތް ސަރަހައްދުތައް އިތުރުނުކުރައްވާނެ ކަމުގައި ރައީސް ވިދާޅުވިއެވެ. ކުރިން އޮންނަނީ ހުއްދަ ނުހޯދައި އެއްވެވޭނީ ހަމައެކަނި ކާނިވާ ސަރަހައްދަށް ކަމަށެވެ. މި ސަރުކާރުންވަނީ އިތުރު ހަތަރު ސަރަހައްދާއެކު ޖުމްލަ ފަސް ސަރަހައްދަކަށް ހުއްދަ ނުހޯދައި އެއްވެވޭ ގޮތަށް ހަމަޖައްސާފައެވެ. 

"ހުދުމުހުތާރުނަމަަ އެއްވެ އުޅެވޭނީ ކުރީގެ ގޮތަށް ކާނިވާ ސަރަހައްދަށް އެކަނި. މިހާރު ފަސް ތަނަކަށް އެއްވެ އުޅެވޭނެ. ހުދުމުހުތާރުނަމަ އިދިކޮޅު ވެރިން ތިބޭނީ ޖަލުގައި ކުރީގެ ގޮތަށް. ހުދުމުހުތާރުވެގެން ޖަލަށްލީ ކޮން ވެރިއެއްތޯ؟،" ރައީސް ވިދާޅުވިއެވެ. 

ހަގީގަތަށް ވާހަކަދައްކާނަމަ މި ސަރުކާރާމެދު ހުދުމުހުތާރު އެ ލަފްޒު ބޭނުންކުރުމަށް ހިތަށްްވެސް ނާރުވާނެކަމުގައި ވިދާޅުވެ ރައީސް ފާހަގަކުރެއްވީ ހުރިހާ ރައްޔިތުންނާ ބައްދަލުކުރައްވައި، ރައްޔިތުންގެ ބައިވެރިވުން ކަށަވަރުކުރައްވައި، މިނިވަންކަން ފުރިހަމައަށް ދެއްވާފައިވާ ކަމެވެ. 

ދެ އިންތިހާބު އެއް ދުވަހެއްގައި ބޭއްވުމުގެ އެއް ބޭނުމަކީ ރައްޔިތުންގެ މަންދޫބުން އިންތިހާބުކުރުމަށް ވޯޓުދޭން ނިކުންނަ މީހުންގެ އަދަދު އިތުރުވުންކަން ފާހަގަކުރައްވަމުން ރައީސް ވިދާޅުވީ ރިޔާސީ އިންތިހާބަކީ އެންމެ ގިނަ ރައްޔިތުން ވޯޓުލާން ނިކުންނަ އިންތިހާބަށްވާތީ އެމަނިކުފާނު ބޭނުންފުޅުވަނީ މަޖިލީހުގެ މެންބަރުން އިންތިހާބުކުރުމަށް ވޯޓުލުމުގައި އެ އަދަދަށް ރައްޔިތުން ބައިވެރިވުން ކަމަށެވެ. 

އަދި ރާއްޖޭގެ ތާރީހުން ފެންނަ ގޮތުގައި ރައްޔިތުން މިހާތަނަށް ނިންމަމުން އައިސްފައިވަނީ ރިޔާސީ އިންތިހާބުގައި ނިންމި ނިންމުން މަޖިލިސް އިންތިހާބުގައި ތަކުރާރުކޮށް ރައީސްކަމަށް އިންތިހާބުކުރި ބޭފުޅާގެ ޕާޓީއަށް މަޖިލިސް ދިނުމަށްކަން ފާހަގަކުރައްވައި، ރައީސް ވިދާޅުވީ ދެ އިންތިހާބު އެއް ދުވަހެއްގަައި ބޭއްވުމަކީ ރައްޔިތުންގެ އެ ނިންމެވުމާ އެއްގޮތަށް ނިންމާ ނިންމުމެއް ކަމަށެވެ.