މެދު އިރުމަތީގައި ހިނގަމުންދާ ހަމަ ނުޖެހުމާއި ގުޅިގެން ދަތުރުފަތުރުގެ ނިޒާމަށް ބުރޫއަރައި، ރާއްޖޭގައި މިވަގުތު ނުފުރިފައި ތިބި ފަތުރުވެރިންގެ ވިސާގެ މުއްދަތު ހަމަވުމުގެ ކުރިން ވިސާ އިތުރުކޮށްދިނުމަށް މޯލްޑިވްްސް އިމިގްރޭޝަނުން ނިންމައިފިއެވެ.

އެ އިދާރާއިން ނެރުނު ބަޔާނެއްގައި ބުނެފައިވަނީ މެދުއިރުމަތީގެ ހަމަނުޖެހުމާއި ގުޅިގެން ރާއްޖެއަށް ދަތުރުކުރާ ބައެއް ފްލައިޓްތައް ކެންސަލްވުމާއި ގުޅިގެން ރާއްޖޭގައި މިވަގުތު ތިބި ބައެއް ފަތުރުވެރިންނަށް ވިސާގެ މުއްދަތު ހަމަވުމުގެ ކުރިން ފުރޭނެ އިންތިޒާމެއް ނެތުމުން، އެ ފަރާތްތަކުން ޓޫރިސްޓް ވިސާގެ މުއްދަތު އިތުރުކޮށްދިނުމަށް ނިންމާފައިވާ ކަމަށެވެ.

މެދުއިރުމަތީގެ ހަމަނުޖެހުމާއި ގުޅިގެން ފްލައިޓްތައް ކެންސަލްވެ، ދަތުރުފަތުރުތަކަށް ބުރޫ އަރާފައިވާ މި ދަނޑިވަޅުގައި ދެކުނު އިރުމަތީ އޭޝިއާ އާއި އިރުމަތީ އޭޝިއާ އަދި އިންޑިއާގެ އިތުރު އެއާލައިންތަކުން ރާއްޖެއަށް ގެނައުމާ ގުޅޭ ގޮތުން ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ދަނީ އެ ފަރާރްތަކާ މަޝްވަރާކުރަމުން ކަމަށް އެވުޒާރާއިން ބުނެފައިވެއެވެ.

މެދުއިރުމަތީގެ މަސްރަހު ހޫނުވީ އެމެރިކާއާއި އިސްރާއީލުން އީރާނަށް އުދުވާނީ ހަމަލާތަކެއް ދިނުމާ ގުޅިގެންނެވެ. އެ ހަމަލާތަކުގެ ރައްދުގައި އީރާނުންވަނީ މެދުއިރުމަތީގައި ހުރި އެމެރިކާގެ އެސެޓުތަކަށް ހަމަލާދޭނެކަން އިއުލާނުކޮށް އެ ގަތަރާއި ޔޫއޭއީއާއި ބަހުރައިނާއި ކުވައިތުގައި ހުރި އެމެރިކާގެ އަސްކަރީ ބޭސްތަކަށް ހަމަލާދީފައެވެ. 

އެ ހަމަލާތަކާ ގުޅިގެން ޔޫއޭއީއާއި ކުވައިތާއި ގަތަރުން ވަނީ އެ ގައުމުތަކުގެ ވައިގެ ސަރަހައްދު ބަންދުކޮށް ވައިގެ ދަތުރުފަތުރުތައް ވަގުތީ ގޮތުން ހުއްޓުމަކަށް ގެނެސްފައެވެ.