ބ. ހިތާދޫ ބަނދަރު ތަރައްގީކުރުމުގެ 95 އިންސައްތަ މަސައްކަތް ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ. 

މި މަސައްކަތުގެ އެންމެ ފަހުގެ މައުލޫމާތު ހިއްސާކޮށް އެކުންފުނިން ބުނީ މިހާރު ކުރިއަށްދަނީ ބަނދަރުގެ ޕޭވްމެންޓު އެޅުމުގެ މަސައްކަތް ކަމަށެވެ. އަދި މިއާއެކު މަސައްކަތުގެ ބޮޑުބައި ނިމިފައިވާކަމަށް އެކުންފުނިން ވަނީ ބުނެފައެވެ. 

ސަރުކާރުގެ ފަރާތުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަސައްކަތުގެ ދަށުން 22 މީޓަރުގެ ސަރަހައްދެއްގައި ގްރޮއިން ޖެހުމާއި، 495 މީޓަރުގެ ސަރަހައްދެއްގައި ބޭރުތޮށި ލުމާއި، 90 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 350 މީޓަރުގެ ސަރަހައްދެއްގެ އެއްގަމުތޮށި މަރާމާތު ކުރުން ހިމެނެއެވެ. އަދި ބްރިޖެއް ހެދުމާއި، 1750 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމާއި، ރޭމްޕެއް ހެދުމާއި، ކޮންކްރީޓް ޕްލެޓްފޯރމެއް ހެދުމާއި، ނެރު ބައްތިއާއި ބަނދަރު ބައްތި ހަރުކުރުމުގެ މަސައްކަތްވެސް ހިމެނެއެވެ.

ސަރުކާރުން މި މަސައްކަތައް އެކުންފުންޏާ ވާލުކޮށްފައިވަނީ 17.7 މިލިޔަން ރުފިޔާއަށެވެ.

އަލަށް ބަނދަރު ތަރައްޤީކުރުމާއި، މަރާމާތުކުރަންޖެހޭ ބަނދަރުތަކުގެ ގިނަ މަޝްރޫޢުތަކެއް ސަރުކާރުން އަންނަނީ ކުރަމުންނެވެ.