ސިނަމާލެއާއި މާލެ ހިޔާ ފުލެޓުތަކުގެ ވެރިންނަށް ޖޫރިމަނާ މައާފުކޮށްދެއްވުމާއެކު މާލީ އިނާޔަތެއް ދެއްވުމަށް ނިންމެވި ނިންމެވުމަކީ އެއްވެސް ހާލެއްގައި ރިޝްވަތެއް ނޫންކަމަަށާއި، އެއީ އެމަނިކުފާނު ރިޔާސީ އިންތިހާބުގައި ހުށަހެޅުއްވި މެނިފެސްޓޯގައި ހިމެނޭ ވައުދުފުޅެއް ފުއްދެވުންކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ދެެއްކެވި ކަމުގެ ހަގީގަތް އޮޅޭ ގޮތަށް ރައީސްގެ ނިންމެވުމަކީ ކުރިއަށް އޮތް ލޯކަލް ކައުންސިލު އިންތިހާބާ ގުޅިގެން ނިންމެވި ކަމެއްގެ ގޮތުގައި ދޭހަވާހެން ނޫސްވެރިޔަކު ސުވާލުކުރުމުން ދެއްވި ޖަވާބުގައި ރައީސްވަނީ އެކަމުގެ ހަގީގަތް ވަރަށް ތަފުސީލުކޮށް ބަޔާންކޮށްދެއްވައިފައެވެ. 

މާލެހިޔާއާއި ސިނަމާލޭ ފުލެޓުތަކުގެ ވެރިންނަށް އިނާޔަތްތަކެއް ދެއްވުމުގެ ވާހަކައަކީ އެމަނިކުފާނުގެ މެނިފެސްޓޯގައި ހިމެނޭ އަދި ރިޔާސީ އިންތިހާބުގެ ކެމްޕެއިން އެކި ހަރަކާތްތަކުގައި އެމަނިކުފާނު ތަކުުރާރުކުރައްވާފައިވާ ވާހަކަފުޅެއްކަން ރައީސް ފާހަގަކުރެއްވިއެވެ. 

ސިނަމާލެއާއި މާލެހިޔާ ފުލެޓުތަކަކީ ޒަމާންވީ ތަންތަންކަން ފާހަގަކުރައްވައި ރައީސް ވިދާޅުވީ އެތަންތަން މަރާމާތުކުރުމަށް ކުދިކުދި މަސައްކަތްތަކެއް ކުރެވުނަސް، އެކަށީގެންވާ ގޮތެއްގައި މަރާމާތުކޮށް އާބާތުރަފިލުވުމަށް ކަންކނަް ކުރެވިފައި ނެތް ކަމަށެވެ. 

ރައީސް އިތުރަށް ވިދާޅުވީ މި އަހަރުގެ ކުރީ ކޮޅުގައި ޖަނަވަރީ މަހުގެ ތެރޭ މާލެހިޔާ އަދި ސިނަމާލޭ ފުލެޓުތަކުގެ ވެރިންގެ ޖޫރިމަނާ މައާފުކުރުމާއި މާލީ އިނާޔަތެއް އެ މީހުންނަށް ހަމަޖައްސައިދިނުމާމެދު ކެބިނެޓުން ގޮތެއް ނިންމެވި ކަމަށެވެ. އޭގެ ކުރީގައިވެސް އެކަން ކުރައްވަން ބޭނުންފުޅުވި ނަމަވެސް ނުކުރެއްވުނީ ސިޓީ ކައުންސިލުން އެކަށީގެންވާ ގޮތުގައި އެއްބާރުލުން ނުލިބުމުން ކަމަށްވެސް ރައީސް ވިދާޅުވިއެވެ. 

ސޯޝަލް ހައުސިންތަކަށް އަރާފައިވާ ޖޫރިމަނާތައް މައާފުކުރުމަށް ނިންމެވީ 2024 ވަނަ އަހަރުކަމަށާއި، އެނިންމެވުމާ ގުޅިގެން އަޅަންޖެހޭ ފިޔަވަޅުތައް އެޅުމަށް ކަމާ ގުޅުންހުރި ކައުންސިލުތަކަށް ސަރުކާރުން ދޭންޖެހޭ އިރުޝާދުވެސް 2024 ވަނަ އަހަރު ދެވިގެންގޮސްފައިވާކަން ރައީސް ފާހަގަކުރެއްވިއެވެ. 

މާލެހިޔާ އަދި ސިނަމާލޭ ފުލެޓުތައް ހުރީ ބޮލަށް ވެއްޓޭހައި ނާޒުކު ހާލަތުގައިކަން ފާހަގަކުރައްވަމުން ރައީސް ވިދާޅުވީ އެމަނިކުފާނު ވައުދުވެވަޑައިގަތް ގޮތަށް އެތަންްތަނުގައި ދިރިއުޅޭ މީހުންނަށް އައު ފުލެޓުތަކެއް އަޅައިދެއްވައި އެތަންތަނަށް ބަދަލުވާން ފުރުސަތު ދެއްވެންދެންވެސް އެމީހުން ދިރިއުޅެންޖެހޭ ކަމަަށެވެ. ދިރިއުޅެވޭނީ އެމަގުން އެމީހުންނަަށް އެހީތެރިވެގެންކަމަށްވެސް ރައީސް ވިދާޅުވިއެވެ. 

ސަރުކާރުން ދޭ މާލީ އެހީއަކީ އެތަންތަނުގައި ދިރިއުޅޭ ރައްޔިތުންނަށް އެތަންތަން މަރާމާތުކޮށް ބެލެހެއްޓުމުގައި އެހީތެރިވުމަށް ދެއްވި ފައިސާކަން ފާހަގަކުރައްވަމުން ރައީސް ވިދާޅުޥީ އެތަންތައް ބަލަހައްޓާ ސިޓީ ކައުންސިލުން އެތަންތަން މަރާމާތުކުރުމަށް އެއްވެސް ކަމެއް ކޮށްފައި ނެތް ކަމަށެވެ. 

އަދި ރައީސް ވިދާޅުވި މިފަހުން އެމަނިކުފާނު މާލެހިޔާ އަދި ސިނަމާލޭ ފުލެޓުވެރިންނާއެކު ބޭއްވެވި ބައްދަލުވުމުގައި ސަރުކާރުން މިކަމުގައި ނިންމާފައި އޮތް ނިންމުން ފުލެޓުތަކުގެ ވެރިންނާ ހިއްސާކުރެއްވި ކަމަށާއި، އެ ބައްދަލުވުމުގައި އެއްވެސް ކަމެއް އަލަށް ނުނިންމަވާ ކަމަށެވެ. 

އަދި މާލެހިޔާ އަދި ސިނަމާލެ ފުލެޓުތަކުގައި ދިރިއުޅޭ ރައްޔިތުންނަށް ކުރިމަތިވެފައި އޮތް ބޮޑެތި މައްސަލަތަކާއި ދަތިތަކާއެކު ދިރިއުޅެން ދޫކޮށްލުމަކީ ސަރުކާރުންވާނެ އިހުމާލެއްކަން ފާހަގަކުރައްވަމުން ރައީސް ވިދާޅުވީ އެގޮތަށް އެއްވެސް ރައްޔިތެއް ދަތިކަމުގައި ދޫކޮށްލެވުމަކީ އެމަނިކުފާނު ކުރައްވާނެ ކަމެއް ނޫން ކަމަށެވެ.