ދިވެހިރާއްޖެ އަދި މޮރިޝަސް އާ ދެމެދު އޮތް ގުޅުން މޮރިޝަސް އިން ކަނޑާލިކަމުގައި ވިނަމަވެސް މޮރިޝަސްއަށް ހައްޤު ނޫން ތަނެއް މޮރިޝަސްއަށް ހައްޤުކަމަށް ނުވާނެ ކަމަށް، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ، މިއަދު ނޫސްވެރިންނާއި ބައްދަލު ކުރައްވައި ދެއްކެވި ވާހަކަފުޅުގައެވެ.

އެގޮތުން އެމަނިކުފާނު ވިދާޅުވީ، މޮރިޝަސް އިން ރާއްޖެއާ އެކު އޮތް ގުޅުން ކަނޑާލުމަކީ ކުރި ވަރަށް ތާކުން ތާކުން ނުޖެހޭ ކަމެއްކަމަށެވެ.

ޗާގޯސް ނުވަތަ ފޯޅަވައްސަކީ ރާއްޖޭގެ ހައްޤެއް ކަމުގައި ފާހަގަކުރައްވައި ރައީސް އިތުރަށް ވިދާޅުވީ، އެއްވެސް ގައުމަކަށް ޗާގޯސް ހަވާލުކުރަންޏާ ހަވާލުކުރަން ވާނީ ދިވެހިރާއްޖެއާ ކަމަށެވެ އަދި މޮރިޝަސް އިން ގުޅުން ކަނޑާލިޔަސް ހަޤީގަތް ބަދަލެއް ނުވާނެ ކަމަށް ވެސް ރައީސް ވިދާޅުވިއެވެ.

ކުރީ ސަރުކާރުން ކަނޑުގެ އިން ކަނޑައެޅުމުގެ މައްސަލާގައި އަމަލުކުރި ގޮތުން ގެއްލުނު ކަނޑުގެ ސަރަހައްދު ހޯދުމަށް މަސައްކަަތްކުރެއްވުމަކީ ރައީސްގެ ވައުދުފުޅެކެވެ.

އެގޮތުން ސަރުކާރުން އަންނަނީ އެކަމުގައި އެޅޭނެ ފިޔަވަޅުތައް ބަލައި، ޑިޕްލޮމެސީ މެދުވެރިކޮށް ހައްލުތަކެއް ހޯދުމަށް މަސައްކަތްކުރަމުންނެވެ.