ރާއްޖޭގެ ބޭރުގެ ދަރަނީގެ ތެރެއިން މި އަހަރު މެޗުއާވާ ސުކޫކުގެ ފައިސާ މިއަދު ދައްކަންޖެހުނަސް އެ ފައިސާ ދެއްކޭ މިންވަރަށް ދިވެހި ދައުލަތުގައި ރައްކާކުރެވިފައި ފައިސާ އެބަހުރި ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ސުކޫކުގެ ފައިސާ ދެއްކުމަށް ތައްޔާރުވުމަށް ކުރެވިފައިވާ މަސައްކަތްތަކަށް އަލިއަޅުވައިލައްވަމުން ރައީސް ވިދާޅުވީ އޭޕްރީލު އަށެއް، 2026 ވަނަ ދުވަހުގައި 500 މިލިއަން ޑޮލަރުގެ ސުކޫކު އަދާކުރުމަށް ސަރުކާރުން ނިންމާފައިވާ ކަމަށެވެ. 

ރައީސް ވިދާޅުވީ އަށެއް އޭޕްރީލުގައި އެ ފައިސާ ދެއްކުމަށް ސަރުކާރުން ފާއިތުވި ދެ އަހަރެއްހައި ދުވަހު ކުރި މަސައްކަަތުން 650 މިލިއަނެއްހައި ޑޮލަރު ރައްކާކުރެވި ދައުލަތުގައި އެބަހުރި ކަމަށެވެ. 

"500 މިލިއަން ޑޮލަރުގެ ސުކޫކު 8 އޭޕްރީލް 2026 ގައި ދެއްކުމަށް ސަރުކާރުންވާނީ ނިންމާފައި. އެއީ ދައްކަަންޖެހޭ ދުވަސް. ދެއްކުމަށްޓަކައި މިހާރު އަޅުގަނޑުމެން އަތުގައި ރައްކާކޮށްފަައި އެބަހުރި 650 މިލިއަން ޑޮލަރަށްވުރެ ގިނަ ފައިސާ،" ރައީސް ވިދާޅުވިއެވެ. 

އެހެންކަމުން ސުކޫކަށް ދައްކަންޖެހޭ 500 މިލިއަން ޑޮލަރު ދެއްކުމަށްފަހު 150 މިލިއަން ޑޮލަރަށްވުރެ ގިނަ ފައިސާ ބާކީވެސް ކުރެވިގެންދާނެއެވެ. 

ރައީސް ވިދާޅުވި ގޮތުގައި ރޭގެ ނިޔަލަށް ދިވެހިރާއްޖޭގެ ސޮވެރިން ޑިވެލޮޕްމެންޓު ފަންޑުގައި 320 މިލިއަން ޑޮލަރު ރައްކާކުރެވިފައި އެބަހުއްޓެވެ. އަދި ދައުލަތުގެ ރަސްމީ ރިޒާަވްގެ ތެރެއިން ބޭނުންކުރެވޭ ރިޒާވްގެ ގޮތުގައި 330 މިލއިަން ޑޮލަރު އެބަހުރި ކަމުގައި ރައީސް ވިދާޅުވިއެވެ. 

ރައީސް ވިދާޅުވީ ރާއްޖޭގެ ގްރޮސް ރިޒާވްގައި 1.27 ބިލިއަން ޑޮލަރު އެބަހުރި  ކަމަށާއި، ދަރަނި އަދާކުރުމުގެ އިތުރަށް މި ފައިސާއަކީ މިހާރު ހިނގަމުންދާ މެދުއިރުމަތީގެ ހަނގުރާމައިން ރާއްޖެއަށް ކުރާ ނޭދެވޭ އަސަރު ކުޑަކުރުމަށްވެސް ބޭނުންކުރެވިގެންދާނެ ފައިސާ ކަމުގައި ރައީސް ވިދާޅުވިއެވެ. 

ރައީސް އިތުރަށް ވިދާޅުވެފައިވަނީ ރާއްޖެއަށް ބޭނުންވާ އެހެނިހެން ފައިސާ ހޯދުމަށްޓަކައި ކުރަމުންދާ މަސައްކަތްތަކުގެ ތެރެއިން ކުރެވެމުންދާ މަޝްވަރާތައް ނިމުމަކާ ގާތަށް ގެނެވިފައިވާ ކަމަށެވެ.