މިދިޔަ އަހަރުގެ ޖަނަވަރީ 1 ވަނަ ދުވަހު އަމަލު ކުރަން ފެށި ބޭރު ފައިސާއާ ބެހޭ ގާނޫނުގެ ދަށުން މިއަހަރުގެ ތެރޭގައި، ފެބްރުވަރީ މަހުގެ ނިޔަލަށް 116 މިލިއަން ޑޮލަރު މާރުކޮށްފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އެ ޤާނޫނުގެ ދަށުން މާރުކުރި އަދަދުގެ އެންމެ ފަހުގެ މައުލޫމާތު ރިޔާސީ ބަޔާނުގައި ވެސް ހާމަކުރައްވާފައެވެ. އަދި، އެ އަދަދު މިއަހަރުގެ ފެބްރުވަރީ މަހުގެ ނިޔަލަށް 116 މިލިއަން ޑޮލަރަށް އަރާފައިވާކަމަށް މިއަދުގެ ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ވިދާޅުވިއެވެ. 

ރައީސުލްޖުމްހޫރިއްޔާ ތަޢާރަފުކުރެއްވި އާ ސިޔާސަތު، ރާއްޖޭގެ ރިސޯޓުތަކަށް ބޭރު ފައިސާއިން ލިބޭ އާމްދަނީ ރާއްޖޭގެ ބޭންކިން ނިޒާމަށް ވެއްދުމަށް ލާޒިމުކުރުމަކީ، ރާއްޖެއަށް ދިމާވެފައިވާ ބޭރު ފައިސާގެ ދަތިކަން ޙައްލުކުރުމަށާއި، ދިވެހި ރުފިޔާގެ އަގު ހިފެހެއްޓުމަށް އަމާޒު ހިއްޕަވާފައިވާ އިސްތިރާޖީ ފިޔަވަޅެކެވެ. މި އިސްނެންގެވުން ތަންފީކުރަން ފެށުމާއެކު، ދިވެހި އިޤްތިޞާދަށް ބޮޑެތި ފައިދާތަކެއް މިހާރު ދަނީ ކުރަމުންނެވެ. 

މިއަދުގެ ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ ވަނީ ސަރުކާރުން ވިޔަފާރިތަކަށް ފައިސާ ދޫކުރުމުގެ ކަންކަން ވެސް ކުރައްވާކަން ހާމަކުރައްވައިފައެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ސަރުކާރުން ކުދި ވިޔަފާރިތަކަށް އަދި ކުންފުނިތަކަށް ކޮންމެ ހަފްތާއަކު ވެސް ފައިސާ ދޫކުރާއިރު، ކުރިއަށް އޮތް ހަފްތާގެ ތެރޭގައި 200 މިލިއަން ރުފިޔާ ދޫކުރާނެ ކަމަށެވެ. އެގޮތުން ސަރުކާރުގެ މަސައްކަތްތަކަށް ދޭންޖެހޭ ފައިސާގެ ތެރެއިން އަންނަ ހަފްތާގެ ހާއްސަކުރާނީ އެއް މިލިއަނަށް ވުރެ މަދުން ދޭން ހުރި ފައިސާގެ އަދަދުތަކަށް ކަމަށް ރައީސުލްޖުމްހޫރިއްޔާ ވިދާޅުވިއެވެ.