ޢަރަބި އިސްލާމި ގައުމުތަކުގެ ލީޑަރުންނަށް ގުޅުއްވަައި، މިހާރު ކުރިއަށްދާ މެދުއިރުމަތީގެ ހަނގުރާމައިގައި އެގައުމުތަކާއެކު ދިވެހިރާއްޖެ ދެމިއޮތްކަމާއި، ދިވެހީންގެ ހެޔޮ އެދުންތައް އޮތީ އެ ގައުމުތަކާއެކުކަން ބަޔާންކޮށްދެއްވާނެ ކަމުގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މިއަދު ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައި ރައީސް ވިދާޅުވީ އަރަބި އިސްލާމީ ގައުމުތަކުގެ ވެރިންނަށް ގުޅުއްވައި އެ ބޭފުޅުންނާއި އެ ގައުމުތަކަށް ރާއްޖޭގެ ތާއީދާއި މަދަދު އޮތްކަން ހާމަކުރެއްވުމުގެ މަސައްކަތް މިހާރު ފައްޓަވާފައިވާ ކަމަށެވެ. 

އެގޮތުން އެމަނިކުފާނު ފުރަތަ ގުޅުއްވީ ޔުނައިޓެޑް ޢަރަބް އެމިރޭޓްސްގެ ރައީސް ޝައިޚް މުޙައްމަދު ބިން ޒައިދު އައްނަހްޔާނަށެވެ. ރައީސް ވިދާޅުވި ގޮތުގައި މުޙައްމަދު ބިން ޒާއިދަށް ގުޅުއްވީ ރެއެވެ. އެ ކޯލުގައި ރާއްޖޭގެ ތާއީދު ޔޫއޭއީއަށް އޮންނާނެކަން އެމަނިކުފާނާ ހިއްސާކުރެއްްވިކަމަށް ރައީސް ވިދާޅުވިއެވެ. 

އެމަނިކުފާނު ފާހަގަކުރެއްވި ގޮތުގައި އީރާނުން ޔޫއޭއީއަށް ދެމުންދާ ހަމަަލާތަކުގައި އިމާރާތްތަކަށް ގެއްލުންވެ، މީހުންވެސް މަރުވެފައިވެއެވެ. 

މިއަދު މެންދުރާއި މެންދުރުފަހުގައި އިތުރު ގައުމުތަކުގެ ވެރިންނަށް ގުޅުއްވާނެ ކަމުގައި ރައީސް ވިދާޅުވިއެވެ. އެގޮތުން ސައުދީ އަރަބިއްޔާގެ ވަލީ އަހުދާއި، ކުވައިތުގެ އަމީރާއި، ބަހުރައިނުގެ ރައީސާއި އޮމާނުގެ ވެރިންނަށް ގުޅުއްވަައި ރާއްޖޭގެ ރައްޔިތުން ތިބީ މި ގައުމުތަކާއެކުގައިކަން ހާމަކުރައްވާނެ ކަމުގައި ރައީސް ވިދާޅުވިއެވެ. 

މި ހަނގުރާމަ ފުޅާވަމުންދަނީ ވަރަށް ނުރައްކާތެރި ގޮތެއްގައިކަން ފާހަގަކުރައްވަމުން ރައީސްވަނީ އެކަމުގައި އިސްލާމީ އަރަބި ގައުމުތަކަށް ލިބެމުންދާ ގެއްލުންތަކާމެދު ހިތާމަކޮށް އެ ގައުމުތަކާއެކު ދިވެހިން ތިބިކަން ހިއްސާކުރައްވަން ބޭނުންފުޅުވާ ކަމަށް ވިދާޅުވެފައެވެ.