މެދުއިރުމަތީގައި ފެށިފައިވާ ހަނގުރާމައިގެ ސަބަބުން ރާއްޖޭގެ އިގުތިސާދަށް ކުރާ ނޭދެވޭ އަސަރުތައް ކުޑަކުރުމަށް ކުރަންޖެހޭ މަސައްކަތްތައް ސަރުކާރުން ކުރަމުން އަންނަކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ހަނގުރާމަ ފެށުމާއެކު އެމަނިކުފާނު އެކުލަަވައިލެއްވި ވަޒީރުންގެ ކޮމިޓީން އެކި ދާއިރާތަކުން ސަރުކާރުން ކުރަންޖެހޭ މަސައްކަތްތައް ފަށާފައިވާ ކަމަށެވެ. އެގޮތުން މެދުއިރުމަތީގައި ތިބި ދިވެހިންގެ ހާލަތު ވަރަށް ކައިރިން ބަލަމުންދާކަން ފާހަގަކުރައްވަމުން އެމަނިކުފާނު ވިދާޅުވީ މިހާތަނަށް މެދުއިރުމަތީގައި ދިރިއުޅޭ އެއްވެސް ދިވެއްސަކަށް އެއްވެސް ބާވަތެއްގެ ގެއްލުމެއް ލިބިފައިނުވާ ކަމަށެވެ. 

އިތުރަށް އެމަނިކުފާނު ވިދާޅުވީ މެދުއިރުމައްޗަކީ ރާއްޖެއަށް އަންނަ ފަތުރުވެރިން މައިގަނޑު ގޮތެއްގައ ޓްރާންސިޓުކުރާ ސަރަހައްދަށްވާތީ މި ހަނގުރާމައިގެ ސަބަބުން ދިވެހިރާއްޖޭގެ ފަތުރުވެރިކަމަށް އަސަރުކުރާތީ އެ އަސަރު ކުޑަކުރުމަށް އަަޅަންޖެހޭ ފިޔަވަޅުތައް އަޅުއްވަމުންދާ ކަމަށެވެ. 

އެގޮތުން ރާއްޖޭގައި ތާށިވެ ނުފުރި ތިބި މީހުން ރާއްޖެއިން ފުރުމަށް ދަތުރުކުރާނެ އެހެނިހެން ރާސްތާތައް ހޯދައިދިނުމާއި، ރާއްޖެއިން ބޭރަށް ދިއުމުގައި ބޭނުންވާ އެހެނިހެން އެހީތެރިކަން ފޯރުކޮށްދިނުމުގެ މަސައްކަތް ވަރަށް ރަނގަޅަށް ކުރިއަށް އެބަގެންދެވޭކަމަށް ރައީސް ވިދާޅުވިއެވެ. އަދި ރާއްޖެއަށް އަންނަން ބޭނުންވާ ފަތުރުވެރިންނަށް މެދުއިރުމަތި ނޫން އެހެން ސަރަހައްދުތައް މެދުވެރިކޮށް ރާއްޖެއަށް އާދެވޭނެ ގޮތްތައް ފަހިކުރުމަށްވެސް ސަރުކާރުން މަސައްކަތްކުރަމުންދާކަން އެމަނިކުފާނު ފާހަގަކުރެއްވިއެވެ. 

"އެހެންވީމާ އިރާދަކުރެއްވިއްޔާ ޓޫރިޒަމް ދާއިރާއިން އަންނަ އިމްޕެކްޓު ކުޑަކުރުމުގެ މަސައްކަތް ވަރަށް ކައިރިން ކުރިއަށް އެބަގެންދަން،" ރައީސް ވިދާޅުވިއެވެ. 

ރާއްޖެއަކީ ތެލަށް ބަރޯސާވުން ބޮޑު ގައުމަަކަށްވީ ނަމަވެސް މެދުއިރުމަތީގެ ހަނގުރާމައިގެ ސަބަބުން ތެޔޮ ލިބުމުގައި އެއްވެސް ދަތިކަމެއް ކުރިމަތިނުވާނެ ކަމަށާއި، ކާބޯތަކެތި ލިބުމުގައިވެސް އެއްވެސް މައްސަލައެއް ކުރިމަތިނުވާނެ ކަމުގެ ޔަގީންކަން ރައީސް ޑރ.މުޢިއްޒުވަނީ ދެއްވާފައެވެ.