ރާއްޖޭން ދައްކަން ޖެހޭ ސުކޫކު، މިއަދު ދައްކަން ޖެހުނަސް އެވަރަށް ފައިސާ އެބަހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިފަދައިން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވެވީ ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުންނެވެ. 

ރައީސުލްޖުމްހޫރިއްޔާ ވިދާޅުވީ، ރާއްޖޭން މިއަހަރު ދައްކަން ޖެހޭ 500 މިލިއަން ޑޮލަރުގެ ސުކޫކު މިއަހަރުގެ އޭޕްރީލް 8 ވަނަ ދުވަހު ދައްކަން ސަރުކާރުން ނިންމާފައިވާ ކަމަށެވެ. އެގޮތުން ސުކޫކު ދެއްކުމަށްޓަކައި މިހާރުވެސް 650 މިލިއަން ޑޮލަރަށް ވުރެ ގިނަ ފައިސާ ރައްކާކޮށްފައި އެބަހުރިކަން ރައީސުލްޖުމްހޫރިއްޔާ ހާމަކުރެއްވިއެވެ.

"އެސްޑީއެފްގައި 320 މިލިއަނަށް ޑޮލަރަށް ވުރެ ގިނަ ފައިސާ މިހާރުވެސް އެބަހުރި. އަދި ޔޫޒަބަލް ރިޒާވްގައި 330 މިލިއަން ޑޮލަރަށް ވުރެ ގިނަ ފައިސާ އެބަހުރި. މި ފައިސާ 8 އޭޕްރީލްގައި ދައްކަން މިވަނީ ތައްޔާރުވެފައި" ރައީސުލްޖުމްހޫރިއްޔާ ވިދާޅުވިއެވެ. 

ރައީސުލްޖުމްހޫރިއްޔާ ވަނީ ރާއްޖޭގެ ގްރޮސް ރިޒާވްގައި މިހާރު 1.27 ބިލިއަން ޑޮލަރު ހުރިކަން ވެސް މިއަދު ހާމަކުރައްވާފައެވެ. މީގެކުރިން ރެކޯޑް އަދަދެއްގައި ހުރި އެ އަދަދު އަނެއްކާވެސް އިތުރުވެފައިވުމަކީ ވެސް ރާއްޖޭގެ ތާރީހުގައި ކާމިޔާބީއެއް ކަމަށް ރައީސުލްޖުމްހޫރިއްޔާ ވިދާޅުވިއެވެ. 

ރާއްޖޭގެ ރިޒާވް މަތިވުމަކީ، މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގައި ދިމާވާ ގޮންޖެހުންތަކުން އަރައިގަތުމަށް ވެސް ވަރަށް ބޮޑު ފަސޭހައަކަށް ވާނެ ކަމެއްކަމުގައި ރައީސުލްޖުމްހޫރިއްޔާ ވިދާޅުވިއެވެ. 

ސަރުކާރުން ސުކޫކު ދެއްކުމުގެ މަސައްކަތް ކުރާއިރު، އިތުރަށް ފައިސާ ހޯދުމަށްޓަކައި ވެސް ކާމިޔާބު މަސައްކަތްތަކެއް ކުރައްވަމުންގެންދަވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ. 

"އަޅުގަނޑުމެންގެ އިގްތިސާދު މެނޭޖްކުރަމުން މިދަނީ އަޅުގަނޑުމެން ރާއްޖޭން ބޭރަންޖެހޭ ދަރަނި ދެއްކޭގޮތަށް ކަންކަން ކުރަމުން. ރާއްޖޭގެ އެތެރޭގައި އެކިއެކި ފަރާތްތަކަށް ދޭންޖެހޭ ފައިސާ ވެސް ދެމުން" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ. 

އެ ހުރިހާ ކަމަކަށް ރިޢާޔަތްކުރައްވައި ރައީސުލްޖުމްހޫރިއްޔާ ވިދާޅުވީ، މިއަހަރު ރާއްޖެއަށް ބޭރުގެ ދަރަނި ދެއްކުމުގައި އެއްވެސް ކަންބޮޑުވުމެއް ނެތް ކަމަށެވެ.