ރައްޔިތުންގެ މަޖިލީހުގެ އިންތިހާބުތަކާއި ކައުންސިލް އިންތިހާބުތަކުގައި އިދިކޮޅު ފަރާތްތަކަށް މެޖޯރިޓީ ލިބޭ ކޮންމެ ފަހަރަކު ސަރުކާރު ހުއްޓުވާލަން މަސައްކަތް ކުރާކަމަށް ޔޫތު މިނިސްޓްރީގެ އެޑްވައިޒަރ އަހުމަދު ނަރީޝް ވިދާޅުވެއްޖެ އެވެ. 

"އެމްއެމްޓީވީ"ގެ ދިވެހީންގެ ރާއްޖެ ޕްރޮގްރާމުގައި ވާހަކަފުޅުދައްކަވަމުން ނަރީޝް ވަނީ އިދިކޮޅު އެމްޑީޕީގެ ވެރިކަންތަކުގައިވެސް ކައުންސިލް އިންތިހާބުތަކުގައާއި، މަޖިލިސް އިންތިހާބުތަކުގައި ސަރުކާރަށް މެޖޯރިޓީ ލިބުމަށް ގޮވާލާކަން ފާހަގަކުރައްވާފަ އެވެ.

ނަރީޝް ވިދާޅުވީ ދިވެހިރާއްޖޭގައި ޑިމޮކްރަސީގެ ނިޒާމު ގާއިމްކުރެވުނު ހިސާބުން އަބަދުވެސް ސަރުކާރު ޖަވާބުދާރީ ކުރުމުގެ ވާހަކަ ދެކެވޭ ކަމަށެވެ.

މިއީ އިދިކޮޅުންވެސް ތަޖުރިބާ ކޮށްފައިވާ ކަންކަން ކަމަށާއި އެގޮތުން އެޕާޓީއާ އިދިކޮޅު ކައުންސިލްތަކަށް ކަންކަން ކޮށް ނުދިނުމާއި، އަދި ކައުންސިލްތަކުން ސަރުކާރާ އެއްބާރުލުންދޭން ބޭނުން ނުވުމުގެ އާޚިރު ނަތީޖާއަކީ ހުރިހާ ގެއްލުމެއް އެރަށެއްގައި ދިރިއުޅޭ ރައްޔިތުންނަށް ލިބިގެން ދިއުންކަމަށް ނަރީޝް ވިދާޅުވި އެވެ. 

އެހެންކަމުން ސަރުކާރުގެ ވައުދުތައް ފުއްދުމަށް ސަރުކާރާ އެއްކޮޅު ކައުންސިލްތަކެއް ގެންނަންޖެހޭކަން އިދިކޮޅުން ވެސް ގަބޫލުކުރާކަމަށް ނަރީޝް ވިދާޅުވިއެވެ.