ލާމަރުކަޒީގެ އެއްވެސް އުސޫލެއްގައި ކައުންސިލްތަކުން ސަރުކާރު ޖަވާބުދާރީ ކުރުވަން ޖެހޭކަމަށް ނޯންނަ ކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ، އިބްރާހިީމް އަބްދުއްރައްޒާޤް ހަލީމް ވިދާލުވެއްޖެއެވެ.

މިފަދައިން އޭނާ ވިދާޅުވީ، ވެރިކަން ކުރާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) ގެ ގަލޮޅޮ ދެކުނު ދާއިރާގެ ޖަގަހަ ހުޅުވުމުގެ ޙަފްލާ ވާހަކަ ދައްކަވަމުންނެވެ.

މި ޙަފްލާ ޝަރަފްވެރިކޮށްދެއްވައި ޖަގަހަ ހުޅުއްވައިދެއްވީ، ފަސްޓް ލޭޑީ، ސާޖިދާ މުޙައްމަދު އެވެ.

ލޯކަލް ކައުންސިލް އިންތިހާބާއި ގުޅުވައި، ކައުންސިލްތަކުން ސަރުކާރު ޖަވާބުދާރީ ކުރުވަން ޖެހޭ ކަމަށް ބުނެ އިދިކޮޅުން ދައްކަމުންދާ ވާހަކަތަކަށް ރައްދުދެއްވައި ހަލީމް ވިދާޅުވީ، ލާމަރުކަޒީ އުސޫލުގެ ދަށުން ކައުންސިލްތަކަށް ގިނަ ބާރުތަކެއް ދީފައިވާ ކަމަށެވެ. ނަމަވެސް އެއިން އެއްވެސް އުސޫލެއްގައި ސަރުކާރު ޖަވާބުދާރީ ކުރުވަން ކައުންސިލްތަކަށް ޖެހޭކަން ހިމަނާފައި ނުވާކަމަށް އޭނާ ވިދާޅުވިއެވެ.

މިކަމަށް އަލިއަޅުވާލައްވައި ހަލީމް އިތުރަށް ވިދާޅުވީ، ލާމަރުކަޒީ އުސޫލުގައި އޮތްގޮތުން ކައުންސިލްތަކުގައި ތިބެންވާނީ ރައްޔިތުންނަށް ތަރައްޤީއާއި އަމާން ވެއްޓެއް ހޯދައިދިނުމަށް މަސައްކަތްކުރުމަށް މަސައްކަތް ކުރާ ބައެއް ކަމަށެވެ.

މީގެ އިތުރުން ހަލީމް ވިދާޅުވީ، ލާމަރުކަޒީ އުސޫލު ހިންގުމަށް އެކަންކަން ކޮށްދެއްވާނެ ކެންޑިޑޭޓުން ނެރުމަކީ ކޮންގްރެސް ޕާޓިގެ މަޤްސަދު ކަމުގައެވެ. އަދި މާލޭ ސަރަހައްދަށް ކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދެކެވަޑައިގެންފައިވާ ތަސައްވުރު ހަގީގަތަކަށް ހެދޭނީ ހަމައެކަނި މި އުސޫލުން، މި ބޭނުމުގައި މަސައްކަތް ކުރައްވާ ކެންޑިޑޭޓުން ހޮވައިގެންކަމަށް އޭނާ ވިދާޅުވިއެވެ.

ހަލީމް ވަނީ، ސަރުކާރާާއި އިދިކޮޅު ފަރާތްތަކުން މަސައްކަތް ކުރާނީ ކިހިނެއްތޯ ސުވާލުއުފައްދަވައިފައެވެ. 

ސަރުކާރުގެ ހިދުމަތްތަކާއި، ސަރުކާރުގެ ތަސައްވުރު ކުރިއަށް ގެންދިއުމާއި ރައްޔިތުންގެ ހިދުމަތްތައް ފޯރުކޮށްދިނުމަށްޓަކައި ސިޓީ ކައުންސިލްގެ ދައުރު ވަރަށްބޮޑުކަން ހަލީމް ފާހަގަކުރެއްވިއެވެ. އެގޮތުން އެމަސައްކަތްތައް އެގޮތަށް ކުރުމަށް ކޮންގްރެސް ޕާާޓީގެ ކެންޑިޑޭޓުން ހޮވުން ވަރަށް މުހިންމުކަމާއި މިފަހަރު މި ކައުންސިލަކީ ތަފާތު އަދި ސަރުކާރާ ގުޅިގެން ނަތީޖާ ނެރެވޭނެ ވަރުގެ ކައުންސިލަކަށް ހަދައިދިނުމަށް ހަލީމް އިލްތިމާސްކުރެއްވިއެވެ. 

ފަސްޓް ލޭޑީ ޝަރަފްވެރިކޮށްދެއްވި ރޭގެ ޙަފްލާގައި ޕާޓީގެ ލީޑަރޝިޕްގެ އިސް ބޭފުޅުންނާއި، އެ ދާއިރާއަށް ކުރިމަތިލައްވާފައިވާ ކެންޑިޑޭޓުންނާއި ޕާޓީގެ ގިނަ އަދަދެއްގެ އާއްމު މެންބަރުން ބައިވެރިވެފައިވެއެވެ.