ދިވެހި ޤައުމަކީ ކުރިއަރާފައިވާ، އަމާން އެކުވެރި ރައްޔިތުންތަކެއް އުޅޭ މުޖުތަމަޢުއަކަށް ހެދުމަށް އެންމެ އިސްދައުރެއް އަދާކުރެވޭނެ އެއްބަޔަކީ ދިވެހި ފުލުހުންކަމަށް ތަޢުލީމީ ކަންތައްތަކާ ބެހޭ ވަޒީރު ޑރ. އިސްމާޢިލް ޝަފީޢު ވިދާޅުވިއެވެ.

ވަޒީރު މިފަދައިން ވިދާޅުވީ 37 ވަނަ ޕޮލިސް އިނީޝިއަލް ޓްރެއިނިން ކޯހުގެ ދަސްވެނިވެ ހިނގާލުމުގެ ރަސްމިއްޔާތު ޝަރަފުވެރިކޮށްދެއްވާ ދެއްކެވި ވާހަކަފުޅުގައެވެ.

އަދި މުޖުތަމަޢުގައި އެހީތެރިކަމެއް ބޭނުންވެއްޖެ ކޮންމެ ހިނދެއްގައި ދިވެހި ފުލުހުން އެންމެ ކުރީ ސަފުގައި ތިބޭކަން ފާހަގަކުރައްވާ ވަޒީރު ވަނީ ފުލުހުން ކުރާ ކަންކަމަށް ސާބަސްދީ އެގޮތުގައި ތިބުމަށް އެދިވަޑައިގެންފައެވެ.

މިނިސްޓަރު ވިދާޅުވީ ދިވެހި ފުލުހުންގެ ޚިދުމަތުގައި ޝާމިލްވާ ކޮންމެ ފުލަހަކީ ވެސް ރައްޔިތުންގެ އިތުބާރު ހޯދަން ޖެހޭ މީހެއް ކަމަށެވެ. 

ތަޢުލީމީ ވަޒީރު ޑރ. އިސްމާޢިލް ޝަފީއު ވަނީ ރާއްޖޭގެ 140 އަށްވުރެ ގިނަ ރަށުގައި ރައްޔިތުންނަށް ޚިދުމަތް ކުރުމުގައި ފުލުހުން ތިބިކަން ފާހަގަކުރައްވާފައެވެ.