ސްޓްރޯކް ޖެހުމުގެ ސަބަބުން ހަށިގަނޑުގެ އެކި ގުނަވަންތަކުގެ ޙަރަކާތް ހުއްޓިފައިވާ މީހުންނަށް، ގޭގައި ތިބެގެން ފަރުވާ ހޯދޭނެ އާ އާލާތެއް އިނގިރޭސިވިލާތުގެ ނޭޝަނަލް ހެލްތު ސާވިސްއިން ޓެސްޓްކުރަން ފަށައިފިއެވެ. މި ޓެކްނޮލޮޖީގެ އެހީގައި ސްޓްރޯކަށް ފަހު އަތާއި އިނގިލިތަކުގެ ހަރަކާތްތައް އަނބުރާ އިއާދަކުރުމަށް ބޮޑު އެހީތެރިކަމެއް ލިބޭނެ ކަމަށް އުންމީދު ކުރެވެއެވެ.

ޝެފީލްޑް ޓީޗިންގ ހޮސްޕިޓަލްސް އާއި ޝެފީލްޑް ޔުނިވަރސިޓީ ގުޅިގެން ކުރިއަށްގެންދާ މި ދިރާސާއަކީ 2 މިލިއަން ޕައުންޑްގެ ބޮޑު މަޝްރޫއެކެވެ.  "ޓްރައިސެޕްސް ޓްރަޔަލް" ގެ ނަމުން ނަންދެވިފައިވާ މި ދިރާސާއަކީ ސިކުނޑިއަށް ދޭ ސްޓިމިއުލޭޝަން ނުވަތަ ކަރަންޓު ސިގްނަލްތަކުގެ އެހީގައި ސްޓްރޯކް ޖެހިފައިވާ ބަލިމީހުންނަށް ފަރުވާ ދިނުމަށް މިހާތަނަށް ހިންގޭ އެންމެ ބޮޑު އެއް ދިރާސާއެވެ. މި މަޝްރޫއުގެ ދަށުން 270 އަށްވުރެ ގިނަ މީހުންނަށް މި އާލާތް ބޭނުންކޮށްގެން ފަރުވާ ދިނުމަށް ވަނީ ރޭވިފައެވެ.

މި އާލާތް މަސައްކަތް ކުރަނީ ކަންފަތުގެ ތެރެއަށް ލައްވާ ކުޑަ އިލެކްޓްރިކަލް ޑިވައިސްއެއްގެ އެހީގައެވެ. މިއީ ސިކުނޑިއާއި ބަނޑާ ގުޅިފައިވާ މައި ނާރެއް ކަމަށްވާ "ވޭގަސް ނާރވް" އަށް ސިގްނަލްތަކެއް ފޮނުވައިދޭ އެއްޗެކެވެ. ބަލިމީހާ ކަސްރަތު ކުރަމުންދާއިރު މި ސިގްނަލްތަކުގެ އެހީގައި ސިކުނޑީގެ މަސައްކަތްތައް އަވަސްކޮށްދީ، ހަރަކާތްތައް އަނބުރާ އިއާދަވުމަށް މަގުފަހިކޮށްދެއެވެ. މި އާލާތް ބޭނުންކުރަނީ އަތުގައި އަޅާ ބޭންޑަކާއި ސްމާޓްފޯނުގެ އެހީގައެވެ.

ބީބީސީއަށް ދިން އިންޓަރވިއުއެއްގައި، މި ޓްރަޔަލްގައި ބައިވެރިވި އުމުރުން 37 އަހަރުގެ އެމަންޑާ ޖޭމްސް ބުނި ގޮތުގައި، މި އާލާތުގެ ސަބަބުން އޭނާއަށް އާ މިނިވަންކަމެއް ލިބިއްޖެއެވެ. ސްޓްރޯކަށް ފަހު ވާތްފަރާތުގެ އަތުގެ ހަރަކާތް ހުއްޓި، ވާހަކަ ދެއްކުމަށް ދަތިވި އެމަންޑާ ބުނީ، "މިއީ މިނިވަންކަމާ ގުޅިފައިވާ ކަމެއް. މީގެ ސަބަބުން އަހަރެންގެ މިނިވަންކަން އަނބުރާ ލިބިއްޖެ" ކަމަށެވެ.

ކަމާބެހޭ މާހިރުން ފާހަގަކުރާ ގޮތުގައި މިއީ ބަލި މުޅިން ފަސްކޮށްދޭ ފަރުވާއެއް ނޫން ނަމަވެސް، މީގެ ސަބަބުން ބަލިމީހާގެ ރިކަވަރީ އަވަސްކޮށްދީ، އަމިއްލައަށް ކަންކަން ކުރުމުގެ ގާބިލުކަން އިތުރުކޮށްދޭނެއެވެ.

ޝެފީލްޑްގެ ރޯޔަލް ހަލަމްޝަޔަރ ހޮސްޕިޓަލުގެ ނިއުރޮލޮޖިސްޓް ޑރ. ޝެހެރްޔާރު ބާގް، ބީބީސީއަށް ދިން އިންޓަރވިއުއެއްގައި ވަނީ، ސްޓްރޯކަކީ އިނގިރޭސިވިލާތުގައި ބޮޑެތި މީހުން ނުކުޅެދުންތެރިވުމަށް މެދުވެރިވާ އެންމެ ބޮޑު ސަބަބުކަން ފާހަގަކޮށް، އަހަރަކު ގާތްގަނޑަކަށް 100,000 މީހުންނަށް ސްޓްރޯކް ޖެހޭއިރު، އޭގެ ތެރެއިން ދެބައިކުޅަ އެއްބައި މީހުންނަށް އަތުގެ ބާރު ދެރަވުމުގެ މައްސަލަ ދިގުމުއްދަތަކަށް ކުރިމަތިވާ މީހުންކަން ފާހަގަ ކޮށްފައެވެ.

ކަމާބެހޭ މާހިރުން އިރުޝާދު ދެއްވާ ގޮތުގައި މޫނުގެ އެއްފަރާތް ވާގިނެތުން، އަތް އުފުލުމަށް ދަތިވުން ނުވަތަ ވާހަކަ ދެއްކުމުގައި އުނދަގޫތަކެއް ހުރުން ފަދަ އަލާމާތެއް ފެނިއްޖެނަމަ ލަސްނުކޮށް ސިއްހީ އެހީތެރިކަން ހޯދަންވާނެއެވެ. މި އާ ޓެކްނޮލޮޖީ ކާމިޔާބުވެއްޖެނަމަ، ހޮސްޕިޓަލުގައި ހޭދަކުރަންޖެހޭ ވަގުތު މަދުވެ، ބަލިމީހުންނަށް އަމިއްލަ ގޭގައި ތިބެގެން ފަސޭހަކަމާއެކު ރިހެބިލިޓޭޝަން ފުރިހަމަކުރުމުގެ ފުރުސަތު ލިބިގެންދާނެއެވެ.