ދެހާސް ފަންސަވީސް ވަނަ އަހަރު ވެގެންދާނީ އުފާވެރި މަންޒަރުގެ އަމަލީ މަސައްކަތްތައް ފެށޭ އަހަރަށް ކަމަށް ރައީސުލް ޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. 

އެމަނިކުފާނު މިހެން ވިދާޅުވީ، އަރި އަތޮޅާއި މާލެ އަތޮޅުގެ ބައެއް ރަށް ރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، ހިންމަފުށީ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައެވެ.

ރައީސް ވިދާޅުވީ، އަންނަ އަހަރުގެ ބަޖެޓުން އެންމެ ބޮޑު އިސްކަމެއް ދޭނީ ގެދޮރު ބިނާ ކުރުމަށް ކަމަށެވެ. އަދި ގެދޮރުބިނާ ކުރުމުގެ އެންމެ ގިނަ މަޝްރޫއުތައް އެއް އަހަރެއްގެ ތެރޭގައި ކުރިއަށް ގެންދެވޭ އަހަރަކަށް 2025 ވާނެ ކަމަށް ވެސް ވިދާޅުވިއެވެ.

ރައީސް ވިދާޅުވީ، މި ހިނގާ އަހަރަށް އެމްޑީޕީ މެޖޯރިޓީ އޮތް މަޖިލީހުން ބަޖެޓް ފާސްކޮށްފައި އޮތީ ގިނަ މަޝްރޫއުތަކެއް އެކަށީގެންވާ ފަދަ ގޮތެއްގައި ނުކުރެވޭ ގޮތަށް ކަމަށާއި، މިހެންވުމުން ހަގީގަތުގައި މުހިންމު ކަންކަން އެންމެ އެކަށީގެންވާ ގޮތަކަށް ނުކުރެވުނު ކަމަށެވެ.