ޕެޓްކެއަރ ފެސިލިޓީ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކައުންސިލްތަކުގެ ބާރުވެރިކަން އިތުރުކުރުމަށްޓަކައި ގިނަ ފިޔަވަޅުތަކެއް އަޅުއްވާނެކަން ހާމަކުރައްވާފައެވެ. ލާމަރުކަޒީ ނިޒާމުގެ ދަށުން ކަންކަން ކުރުމަށް އަބަދުވެސް އިސްކަންދެއްވާނެ ކަމަށް ރައީސް ވިދާޅުވިއެވެ.

ވޭތުވެދިޔަ އަހަރާއި ހަމަހުގެ ތެރޭގައި ރައީސް ވަނީ ހުރިހާ ގޮތަކުންވެސް ކައުންސިލްތައް ބާރުވެރިކުރެއްވުމަށް މަސައްކަތް ކުރައްވާފައެވެ. މިގޮތުން 160 އަށްވުރެ ގިނަ ކައުންސިލާ ރައީސް ބައްދަލުކުރައްވާފައިވާ ކަމަށް ވިދާޅުވިއެވެ.

ލާމަރުކަޒީ ނިޒާމުގެ ދަށުން ރައްޔިތުންނާ ގާތުން މަސައްކަތްކުރެއްވުމަށް ރައީސް އެންމެ އިސްކަމެއް ދެއްވައިގެން މަސައްކަތްކުރައްވަމުން ގެންދަވާކަން އެއީ ފެންނަން އޮތް ޙަޤީޤަތެއް ކަމަށް ވިދާޅުވިއެވެ.

ގިނަ އަހަރުތަކެއް ވެފައިވާ ކައުންސިލްތަކުގެ އިމާރާތްތައް މަރާމާތުނުކުރެވި ހަލާކުވެފައިވާކަން ރައީސްގެ ދަތުރުފުޅުތަކުގައި ފާހަގަކުރެއްވުނު ކަމަށް ވިދާޅުވެ، މިކަމަށް ޙައްލެއް ހޯއްދެވުމުގެ ގޮތުން، މިއަހަރު ތެރޭގައި 50 ރަށެއްގައި ކައުންސިލް އިމާރާތް އެޅުމުގެ މަޝްރޫޢު ފެއްޓެވުމަށް ރައީސް ނިންމަވާފައިވާ ކަމަށާއި، މި ދައުރުގެ ބާކީ އޮތް މުއްދަތުގައި 120 އަށްވުރެ ގިނަ ރަށުގެ ކައުންސިލް އިމާރާތް އަޅުއްވައިދެއްވާނެ ކަމަށް ހާމަކުރެއްވިއެވެ.

ކައުންސިލްތަކަށް އާމްދަނީ ހޯދޭނެ މަގުތައް ފަހިކޮށްދެއްވާފައިވާ ކަމަށާއި، ކައުންސިލްތަކަށް ފަޅުރަށްތައް ލިބޭނެ މަގު ފަހިކޮށްދެއްވާފައިވާ ކަމަށް ވިދާޅުވިއެވެ. އަދި ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލްތަކަށް ޖަމާކޮށްދިނުމަށް ނިންމަވާފައިވާ ކަމަށް ވިދާޅުވިއެވެ.

ބްލޮކް ގްރާންޓްގެ 5 އިންސައްތަ ޤާނޫނުގައިވާ ގޮތުގެ މަތިން ހުރިހާ ކައުންސިލަކަށް މިފަހަރުގެ ބަޖެޓުގައި ހިމަނުއްވާފައިވާ ކަމަށާއި، އޭގެ އިތުރުން ލޯކަލް ޓޫރިޒަމްގެތެރެއިން ވަކި އިންސައްތައެއް ކައުންސިލްތަކާ ޙަވާލުކުރުމަށްޓަކައި ޤާނޫނު އިޞްލާޙުކުރުމަށް ކުރިއަށް އޮތް ދުވަސްތަކުގައި މަޖިލީހަށް ފޮނުއްވާނެ ކަމަށް ވިދާޅުވިއެވެ.

މީގެ އިތުރުން، ކުރިއަށް އޮތް ދެ ހަފްތާގެ ތެރޭގައި، ޤާނޫނުގައި ބަޔާންކޮށްފައިވާ ނަމަވެސް މިހާތަނަށް ކައުންސިލްތަކާ ޙަވާލުނުކުރެވި ހުރި އިތުރު މުހިންމު މަސްއޫލިއްޔަތުތަކެއް ކައުންސިލްތަކާ ޙަވާލުކުރެއްވުމަށް ނިންމަވާފައިވާ ކަމަށް ރައީސް ވިދާޅުވިއެވެ. މިކަމާ ގުޅޭގޮތުން ކެބިނެޓް ފެންވަރުގައި މަޝްވަރާކުރެވެމުންދާކަން ވަނީ ހާމަކުރައްވާފައެވެ.

ލާމަރުކަޒީ ނިޒާމުގެ ތެރެއިން ކައުންސިލްތައް ބާރުވެރިކުރުވައި، ސަރުކާރުގެ ތަންފީޛީ ބާރާއި ކައުންސިލްތަކަކީ އެއް ފަށަލައެއްގެ ގޮތުގައި ބަލައިގެން ކަންކަން ކުރުމުގައި ޢަމަލާއި ބަސް އެއްގޮތްކުރަމުން ގެންދަވާ ކަމަށް ރައީސް ވިދާޅުވިއެވެ.

މި މަސައްކަތުގެ ނަތީޖާއެއްގެ ގޮތުން، ކައުންސިލްތަކަށް އިތުރު ފުރުޞަތުތަކެއް ފަހިކޮށްދެވިފައިވާ ކަމަށާއި، ކުރިން ވަކި ކޮންޓްރެކްޓަރެއް މެދުވެރިކޮށް ނުވަތަ މިނިސްޓްރީތަކުން ސީދާ ކުރިއަށް ގެންދިޔަ މަސައްކަތްތައް މިހާރު ކައުންސިލްތައް މެދުވެރިކޮށް ކުރިއަށް ގެންދިއުމަށް ނިންމަވާފައިވާ ކަމަށް ރައީސް ވިދާޅުވިއެވެ. މިއީ ކުރީގެ ސަރުކާރުން މަގުފަހިކޮށްނުދިން ކަމެއް ކަމަށާއި، އެހެންކަމުން މިހާރު ކައުންސިލްތަކާ ޙަވާލުކުރައްވާފައިވާ ކަމަށް ހާމަކުރެއްވެވިއެވެ.