ރައީސުލްޖުމްހޫރިއްޔާ ޑރ. މުހައްމަދު މުއިއްޒުއަކީ ސިޔާސީ ރައްދު ދެއްވުމުގައި އެމަނިކުފާނު ވަގުތު ބޭކާރުކުރައްވާނޭ ވެރިއެއެް ނޫންކަމަށާއި، އޭގެ ބަދަލުގައި އެމަނިކުފާނު މަސައްކަތް ކުރައްވަނީ ގައުމު ބިނާކުރައްވަން ކަމަށް އިގްތިސާދި ތަރައްގީއާ ވިޔާފާރިއާ ބެހޭ ވަޒީރު އަހުމަދު ސައީދު ވިދާޅުވެއްޖެއެވެ. 

ވަޒީރު މިފަދައިން ވިދާޅުވީ ކޮންގްރެސް ޕާޓީގެ އައްޑޫ ސިޓީ ކެމްޕެއިން އިފްތިތާހް ކުރަން ބޭއްވި ހަރަކާތުގައި ވާހަކަފުޅު ދައްކަވަމުންނެވެ. 

ވަޒީރު ވިދާޅުވީ ވެރިކަންކުރާ ޕާޓީގެ ފަރާތުން ސިޔާސީ ކުލަ ނުފެންނަކަމަށް މިއަދު ގިނަ ރައްޔިތުން ބުނަމުން އަންނަކަމަށެވެ. 

ރައީސް ޑރ. މުހައްމަދު މުއިއްޒު ގައުމީ ނަވާއި ހަވާލުވިއިރު، ދިޔަ ނުވާ ވަތެއް ނެތް ކަމަށާއި، ހުރިހާ އުނގުރިއެއް ހުރީ ނެއްޓިފައި ކަމަށާއި، ދިޔަވަމުން ދިޔައީ ހުއްޓުމެއް ނެތި ކަމަށްވެސް ވިދާޅުވިއެވެ. އަދި ނައު އަޑިއަށް ގޮސް ދަރާ ވިކިފައިވާ ކަމަށްވެސް ވަޒީރު ވިދާޅުވިއެވެ.

މި ވެރިކަން ކުރާ ޕާޓީގެ ލީޑަރުގެ ފަހަތްޕުޅުގައި އެންމެން ސާބިތުކަމާއެކު ތިބެއްޖެނަމަ އައްޑޫގެ ތަރައްގީ އޮތީ ވަރަށް ކައިރީގައި ކަަމަށް ވަޒީރު ވިދާޅުވިއެވެ.