ރާއްޖޭގެ އެއްވެސް ތަނެއްގައި ގޭންގު ހަދައިގެން ކުށްކުރަން މި ސަރުކާރުން ޖާގަ ނުދޭނެކަމަށް ވިދާޅުވެ، ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން، އައްޑޫ މޭޔަރުކަމުގެ މަގާމުގައި މިހާރު ހުންނެވި އަލީ ނިޒާރަށް ބަހުގެ ހަމަލާތަކެއް ދެއްވައިފިއެެވެ.

އިހުސާނު މިފަދައިން ވިދާޅުވެ ނިޒާރަށް ރައްދު ދެއްވީ މި ދެ އަހަރުގެ ތެރޭގައި އައްޑޫގެ ތަރައްގީއަށް މި ސަރުކާރަށް ކޮށްދެވުނު އެއްވެސް ކަމެއް ނެތްކަމަށް ވިދާޅުވެ ނިޒާރު ކުރެއްވި ޕޯސްޓަކާ ގުޅިގެންނެވެ. 

ނިޒާރު ވަނީ އައްޑޫއަކީ ގޭންގް އޮޕަރޭޓުކުރާ ތަނެއްކަމަށް ބުނެ އައްޑޫގެ އަގު މި ސަރުކާރުން ވައްޓާލާފައިވާކަމަށް ތުހުމަތުކުރައްވާފައެވެ. އެކަމުގެ ސަބަބުން އައްޑޫގެ އިގްތިސާދު ފުނޑިފައިވާކަމަށް ވިދާޅުވެ އައްޑޫ މާކެޓުކުރުމަށް ކައުންސިލުން ކުރަމުން އަންނަ މަސައްކަތްތަކަށް ހުރަސް ނޭޅުމަށް ވެސް ނިޒާރުގެ ޕޯސްޓުގައި ގޮވާލައްވާފައިވެއެވެ. 

ނިޒާރުގެ މިވާހަކަފުޅުތަކާ ގުޅުވައި ވަޒީރު ވަނީ އެމްޑީޕީގެ ވެރިކަމުގެ ތިން އަހަރާއި ޕީއެންސީގެ ވެރިކަމުގެ ދެ އަހަރު މޭޔަރުކަމުގައި ހުންނަވައިގެން ނިޒާރަށް އައްޑޫއަށް ގެނެސްދެވުނީ ކޮން ތަރައްގީއެއްތޯ ސުވާލު އުފައްދަވާފައެވެ. އައްޑޫއަކީ ގޭންގް އޮޕަރޭޓުކުރާ ތަނެއްކަމަށް ބުނެ އައްޑޫގެ އަގު މި ސަރުކާރުން ވައްޓާލާފައިވާކަމަށް ކުރެއްވި ތުހުމަތުގެ ރައްދުގައި ވަޒީރު ވިދާޅުވީ ރާއްޖޭގެ އެއްވެސް ތަނެއްގައި ގޭންގު ހަދައިގެން ކުށްކުރަން މި ސަރުކާރުން ޖާގައެއް ނުދޭނެކަމަށެވެ. 

ވަޒީރު ވިދާޅުވީ އައްޑޫގައި އޮޕަރޭޓުވަމުންދިޔަ ގޭންގުތައް ހުއްޓުވައި، އެ ގޭންގުތާ ދެކޮޅަށް ގާނޫނީ ފިޔަވަޅު އަޅައި، ގޭންގުތަކުގައި ހަރަކާތްތެރިވީ ޒުވާނުން އިސްލާހުވުމުގެ ފުރުސަތު ދީފައިވާކަމަށެވެ. ވުމާއެކު އައްޑޫ މާކެޓުކުރުމަށް ކުރާ މަސައްކަތްކަތުގައި އެ ސިޓީއަކީ ރައްކާތެރި ތަނެއްގެ ގޮތުގައި މާކެޓުކުރުން ރަނގަޅުވާނެކަމަށް ވިދާޅުވިއެވެ. 

ވަޒީރު މިފަދައިން ވިދާޅުވީއިރު އައްޑޫއާ ދޭތެރޭ މި ސަރުކާރުން ގެންގުޅޭ "ގްރޭޓާ އައްޑޫ" ތަސައްވުރުގެ ތެރެއިން އަައްޑޫގެ ތަރައްގީއަށް ގިނަ ކަންކަން ވަނީ ރާވާލެވިފައެވެ. 

އެގޮތުން މިދިޔަ ބުރާސްފަތި ދުވަހު ރިޔާސީ ބަޔާން އިއްވަވަމުން ރައީސް ޑރ. މުޙައްމަދު މުޢިއްޒު ވަނީ، ރާއްޖޭގައި ދެވަނައަށް އާބާދީ އެންމެ ބޮޑު އައްޑުއަކީ ވިޔަފާރިކުރަން ފަސޭހަތަނަކަށް ހަދައި، އައިޓީގެ ހަބަކަށް އެ ސިޓީ ހައްދަވަން ނިންމަވާފައިކަން ހާމަކުރައްވައިފައެވެ.