ލޯކަލް ކައުންސިލް އިންތިހާބު ބޯމަތިވެފައިވާއިރު މި ދަނޑިވަޅަކީ ސިޔާސީ ވާދަވެރިކަމަށް ވުރެ ބޮޑަށް ރަށަށް ވިސްނަންވީ ވަގުތުކަމަށް ކޮންގްރެސް ޕާޓީގެ ޕާލިމަންޓަރީ ގުރޫޕުގެ ލީޑަރު އަދި ލޯކަލް ކައުންސިލު އިންތިހާބުގައި އެ ޕާޓީގެ ކެމްޕެއިން މެނޭޖަރު އިބްރާހީމް ފަލާހު ވިދާޅުވެއްޖެއެވެ. 

ފަލާހު މިފަދައިން ވިދާޅުވީ އަންނަ އޭޕްރީލުމަހުގެ ހަތަރު ވަނަ ދުވަހު އޮންނަ ލޯކަލް ކައުންސިލް އިންތިހާބުގެ ކެމްޕެއިން ރަސްމީކޮށް ފެށުމަށް ތިނަދޫ ސިޓީގައި ބޭއްވި ހާއްސަ ޖަލްސާގައި ވާހަކަ ދައްކަވަމުންނެވެ. 

ތިނަދޫ ސިޓީއާ މެދު އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވާ އުއްމީދު ވަރަށް ފޮނިކަމަށް ވިދާޅުވެ، ރައީސްގެ ތަސައްވުރާ އެއްގޮތަށް ތިނަދޫ ސިޓީގެ ތަރައްގީގެ މަޝްރޫއުތައް ކުރިއަށް ގެންދިއުމަށްޓަކައި ކޮންގްރެސް ޕާޓީގެ ޓިކެޓުގައި އެ ސިޓީގެ ކައުންސިލަށް ކުރިމަތިލައްވާ ކެންޑިޑޭޓުން ހޮއްވަވާ ދެއްވުމަށް ފަލާހު އެދިވަޑައިގެންނެވިއެވެ. 

ތިނަދޫ ރައްޔިތުންނަށް ވިސްނުންތެރި، ކިޔަވައިގެން ތިބި ބަޔަކަށް ވީއިރު ތަރައްގީއަށް އިސްކަންދެއްވާނެކަމާއި މެދަކު ޝައްކު ނުކުރައްވާކަމަށް ފަލާހު ވިދާޅުވިއެވެ. 

ރައީސް މުއިއްޒަކީ ތިނަދޫ ސިޓީ އިގްތިސާދީ ހަބަކަށް ހައްދަވައިދެއްވާނޭ ފަދަ ވެރިއެއްކަމަށް ވިދާޅުވެ، ފުރުސަތުގެ ބޭނުން ހިފުމަށް ފަލާހު ގޮވާލެއްވިއެވެ. 

ފަލާހުގެ ވާހަކަފުޅު ނިންމަވާލެއްވީ ޕީއެންސީގެ ޓިކެޓުގައި ކުރިމަތިލާފައިވާ ކެންޑިޑޭޓުން ހޮވުމަށް ޕާޓީގެ ފަރާތުން ގިނަ މަސައްކަތްތަކެއް ކުރާނެކަމުގެ ޔަގީންކަން ދެއްވަވަމުންނެވެ.