ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލުމަށް އެދޭ ފަރާތްތަކަށް، އިންތިޚާބަށް ކުރިމަތިލުމަށް ހުޅުވާލި ފުރުސަތު މާދަމާއަށް ހަމަވާއިރު، މުއްދަތު އިތުރުުކުރުމުގެ ވިސްނުން ނުގެންގުޅޭ ކަމަށް އިލެކްޝަން ކޮމިޝަނުން ބުނެފިއެވެ.

ކޮމިޝަނުގެ ނާއިބު ރައީސް އަބްދުއްރަހުމާން ޞަލާޙު ރަޝީދު "އެމްއެމްޓީވީ"އަށް ވިދާޅުވީ މުއްދަތު އިތުރުކުރުމުގެ ވިސްނުމެއް ކޮމިޝަނުން ނުގެންގުޅުއްވާކަމަށެވެ. 

މިއަހަރު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބަށް ކުރިމަތިލާން ހުޅުވާލާފައިވަނީ މި މަހުގެ 17 އިން ފެށިގެން އަންނަ ފެބްރުވަރީ އެއް ވަނަ ދުވަހުގެ ނިޔަލަށެވެ.

އިންތިހާބުގައި ވާދަކުރަން ފޯމު ހުށަހެޅުމުގެ ފުރުސަތު އިލެކްޝަންސް ކޮމިޝަނުން ހުޅުވާލީ އެ ކޮމިޝަންގެ މައި ޕޯޓަލް މެދުވެރިކޮށެވެ.

އަދި ކެންޑިޑެސީ ފޯމު ހުށަހަޅާ ވަގުތެއްގެ ގޮތުގައި ކުރިން ކަނޑައަޅާފައި ވަނީ ހުކުރު ދުވަސް ފިޔަވައި އެހެން ދުވަސްތަކުގެ ހެނދުނު 8:30 އިން މެންދުރުފަހު 3:30 އަށެވެ. އަދި ހުކުރު ދުވަހުގެ މެންދުރުފަހު 3:30 އިން 5:30 އަށެވެ. ނަމަވެސް ފޯމު ހުށަަހަޅަންދޭ ވަގުތު އިތުރުކުރަން ނިންމައި، ކޮންމެ ދުވަހަކުވެސް މިހާރު ދީފައި އޮތް ވަގުތަށް ދެ ގަޑިއިރު ވަނީ އިތުރުކޮށްފައެވެ. އެގޮތުން ހުކުރު ދުވަސް ނޫން ކޮންމެ ދުވަހެއްގއި ހެނދުނު 8:30 އިން ފެށިގެން މެންދުރުފަހު 5:30 އަށް ކެންޑިޑެސީ ހުށަހެޅޭނެއެވެ. އަދި ހުކުރުދުވަހު މެންދުރުފަހު 3:30 އިން ރޭގަނޑު 8:00 އަށް ފޯމު ހުށަހެޅޭނެއެވެ.

އިލެކްޝަންސް ކޮމިޝަނުން މިއަދު އާންމުކޮށްފައިވާ ތަފާސްހިސާބުތަކުން ދައްކާގޮތުގައި 14 ދުވަހުގެ ތެރޭގައި އެ ކޮމިޝަންގެ މައި ޕޯޓަލް މެދުވެރިކޮށް 3،413 ފޯމު ވަނީ ހުށަހަޅާފައެވެ. އެއީ ލޯކަލް ކައުންސިލްތަކަށް ހުށަހެޅި 1،865 ފޯމާއި އަންހެނުންގެ ކޮމިޓީތަކަށް ހުށަހެޅި 1،548 ފޯމެވެ. މި ފޯމުތަކުގެ ތެރެއިން މިހާތަނަށް ކޮމިޝަނުން ބަލައިގެންފައިވަނީ ޖުމްލަ 2،888 ފޯމެވެ. އެއީ ކައުންސިލްތަކުގައި ވާދަކުރަން ފޯމު ހުށަހެޅި 1،556 ކެންޑިޑޭޓުންނާއި އަންހެނުންގެ ކޮމިޓީތަކުގައި ވާދަކުރަން ހުށަހެޅި 1،332 ކެންޑިޑޭޓުންގެ ފޯމެވެ.

އިލެކްޝަަސް ކޮމިޝަނުން އާންމުކޮށްފައިވާ ހިސާބުތަކުން ދައްކާގޮތުގައި ސިޔާސީ ޕާޓީތަކުން ކައުންސިލްތަކުގައި ވާދަކުރުމަށް 1،366 ފޯމު ހުށަހަޅާފައިވާއިރު އަމިއްލަގޮތުން ވާދަކުރަން ހުށަހަޅާފައިވަނީ 496 ފޯމެވެ. މީގެ ތެރެއިން 309 ކެންޑިޑެސީއެއް ގަބޫލުނުކުރުމަށް ކޮމިޝަނުން ވަނީ ނިންމާފައެވެ. އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގައި ވާދަކުރަން ސިޔާސީ ޕާޓީތަކުން 1،216 ފޯމު ހުށަހަޅާފައިވާއިރު އަމިއްލަގޮތުން ވާދަކުރުމަށް 332 ފޯމު ވަނީ ހުށަހަޅާފައެވެ. މީގެ ތެރެއިން 216 ކެންޑިޑެސީ ގަބޫލުނުކުރުމަށް އިލެކްޝަންސް ކޮމިޝަނުން ވަނީ ނިންމާފައެވެ.  

ޕޯޓަލުން ފޯމު ހުށަހަޅާ ކެންޑިޑޭޓުންގެ ކެންޑިޑެސީ ގަބޫލުނުކުރާ މައިގަނޑު ސަބަބުތަކަކީ ކުށާއި ދަރަނީގެ ރެކޯޑު އުމުރަށް ހުށަހަޅާފައި ނެތުމާއި، ކުށެއް ނުވަތަ ދަރަންޏެއް އޮތްނަމަ އެކަމުގެ ތަފްސީލު ހުށަހަޅާފައި ނެތުމާއި ކަރެކްޝަނަލް ސަރވިސްއިން ފުރިހަމަކޮށް، ހުށަހަޅަންޖެހޭ ކުށުގެ ރެކޯޑު ބައެއް ފަރާތްތަކުން ހުށަނާޅާ އޮތުމެވެ. ފޯމު ހުށަހަޅާއިރު މިކަންކަމަށް ސަމާލުކަން ދިނުމަށް ކޮމިޝަނުން އަންނަނީ އިލްތިމާސް ކުރަމުންނެވެ. 

މިފަހަރުގެ އިންތިޚާބުގައި 225 ދާއިރާއަކަށް މެންބަރުން އިންތިޚާބުކުރާނެއެވެ. ކައުންސިލް މެންބަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެންބަރުންނާ އެކު އެއީ 1356 ކެންޑިޑޭޓުންނެވެ.

ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބު ބާއްވަން އިލެކްޝަންސް ކޮމިޝަނުން ނިންމާފައިވަނީ އަންނަ އޭޕްރިލް މަހުގެ ހަތަރު ވަނަ ދުވަހުއެވެ.

އިލެކްޝަންސް އިން އާއްމުކޮށްފައިވާ މަޢުލޫމާތުގައި ވާގޮތުން، މިއަހަރުގެ އިންތިޚާބުގައި 294،937 މީހުންނަށް ވޯޓުލުމުގެ ޙައްޤު ލިބިގެންވެއެވެ. އެއީ 144،527 އަންހެނުންނާއި 150،410 ފިރިހެނުންނެވެ.