ހުކުރު ދުވަހުގެ ރޭ ހުޅުމާލޭ ހިޔާ ފްލެޓްގެ ފަސްވަނަ ޓަވަރުގައި ހިނގި އަލިފާނުގެ ހާދިސާގައި އެ ޓަވަރުގެ 38 އެޕާޓްމަންޓެއްގެ ނަރުދަމާ ހޮޅިތަކަށް ގެއްލުން ލިބިފައިވާކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

އެ އޮތޯރިޓީން ބުނީ، މި ހާދިސާއާއި ގުޅިގެން މިހާތަނަށް އެހީތެރިކަން ބޭނުންވެގެން ރިޕޯޓުކޮށްފައިވާ 18 އެޕާޓްމަންޓްގައި ދިރިއުޅޭ 85 ފަރާތަކަށް ވަގުތީ ބޯހިޔާވަހިކަން ހަމަޖެއްސުމަށާއި ކެއުން ބުއިމަށް އެހީތެރިކަން ފޯރުކޮށްދީފައިވާ ކަމަށެވެ.

މި ހާދިސާގައި 38 އެޕާޓްމެންޓެއްގެ ނަރުދަމާއަށް ލިބުނު ގެއްލުން ދެނެގަނެ ގެއްލުންތައް މަރާމާތުކުރުމުގެ މަސައްކަތް އެޗްޑީސީއިން ކުރަމުން އަންނަ ކަމަށް އެންޑީއެމްއޭ އިން ވަނީ ބުނެފަ އެވެ.

މި ހާދިސާ ހިނގާފައިވަނީ އިއްޔެ އިރުއޮއްސެން ކައިރިވި ވަގުތު އެވެ. މޯލްޑިވްސް ނެޝަނަލް ޑިފެންސް ފޯސްއިން ވަނީ އަލިފާން ހިނގައިގެން އުޅޭ މައުލޫމާތު ލިބުމާއެކު އެ ހިދުމަތުގެ ފަޔަރ އެންޑް ރެސްކިއު ސާވިސްއިން ވަގުތުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށައިފަ އެވެ. އަދި ކުޑަވަގުތު ކޮޅެއްގެ ތެރޭގައި އަލިފާންގަނޑު ވަނީ ކޮންޓްރޯލް ކޮށްފަ އެވެ. މި ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެ އެވެ. އެހެންނަމަވެސް އަލިފާނުގެ ހާދިސާއާ ގުޅިގެން އެ ސަރަހައްދުގައި ވަރަށް ބޮޑަށް ދުން ބޯވެ، އެ ސަރަހައްދުގައި ދިރިއުޅެމުންދިޔަ ގިނަ ފަރާތްތަކަށް ދަތި އުދަގޫތަށް ވަނީ ކުރިމަތިވެފަ އެވެ.

މީގެ އިތުރުން، މި އަލިފާނުގެ ހާދިސާ ހިނގަން މެދުވެރިވި ސަބަބާއި، މިކަމާ ގުޅިގެން އިތުރަށް ބަލަންޖެހޭ ކަންކަން އެޗްޑީސީ އާއި ކަމާބެހޭ އިދާރާތައް ގުޅިގެން ތަހުގީގުކުރަމުން އަންނަ ކަމަށް އެންޑީއެމްއޭއިން ވަނީ ބުނެފަ އެވެ.

އެންޑީއެމްއޭ އިން ބުނީ، މި ހާދިސާއާ ގުޅިގެން އެއްވެސް ފަރާތަކުން އެހީތެރިކަމެއް ބޭނުންވާ ނަމަ، އެ އޮތޯރިޓީގެ އިމެޖެންސީ ހޮޓްލައިން 115 އަށް ގުޅުއްވުމަށް އެދޭ ކަމަށެވެ.