އެމްޑީޕީ ކައުންސިލްތަކަށް ނޫނީ ކަންކަން ނުކުރެވޭނެކަމަށް ބުނަމުން އަންނައިރު ވޭތުވެ ދިޔަ ފަސް އަހަރު ފުވައްމުލައް ސިޓީ ކައުންސިލުން ރައްޔިތުންނަށް ކޮށްދިނީ ކޮންކަމެއްތޯ ސުވާލު އުފައްދަވާ މިހާރު އޮތް ކައުންސިލުން މުޅީންވެސް ކުރަމުން އަންނަނީ ގާނޫނާ ހިލާފު ކަންކަން ކަމަށް ފުވައްމުލަކު މެދު ދާއިރާގެ މެންބަރު އަލީ ފަޒާދު ވިދާޅުވެއްޖެއެވެ.

މެމްބަރު މިފަދައިން ވިދާޅުވެ މިހާރު އެ ކައުންސިލުގައި ތިއްބެވި އިދިކޮޅު ފިކުރުގެ ކައުންސިލަރުންނަށް ރައްދު ދެއްވީ، ޕީއެންސީން ފުވައްމުލަކުގައި ރޭ ބޭއްވި ޖަލްސާގައި ވާހަކަދައްކަވަމުންނެވެ.

ލާމަރުކާޒީ ނިޒާމު އައިފަހުން ފުވައްމުލަކުގައި މިހާތަނަށް ގާއިމުވެފައި އޮތީ އިދިކޮޅު މެޖޯރިޓީތައް އޮންނަ ކައުންސިލުތައް ކަމަށް މެމްބަރު ފަޒާދު ވިދާޅުވިއެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނުގެ ދަށުން ކައުންސިލުތައް ގާއިމުވީ ފަހުން ހުވައި ކުރި ފުރަތަމަ ފުވައްމުލައް ކައުންސިލް ހުވައި ކުރިއިރު ރައްޔިތުންގެ ފައިސާގެ ގޮތުގައި ހުރީ 842،000 ރުފިޔާކަމަށް މެމްބަރު ފަޒާދު ވިދާޅުވިއެވެ. އެ ކައުންސިލުގެ ދައުރު ނިންމާލިއިރު ހަތަރު މިލިއަނަށް އާއްމުދަނީ އިތުރުކޮށް، ފުވައްމުލަކު ހޮސްޕިޓަލަށް އެއް ލައްކަ ޑޮލަރުގެ ސިއްހީ ސާމާނު ހަދިޔާކޮށް، މަސްމާރުކޭޓެއް ގާއިމުކޮށް ގިނަ ހިދުމަތްތަކެއް ގާއިމުކޮށް ދެއްވާފައިވާކަމަށް ވެސް ވިދާޅުވިއެވެ.

އެކަމަކު މިހާރު އޮތް ކައުންސިލުން ރައްޔިތުންގެ މަސްމާރުކޭޓު ބޮޑު ކުންފުންޏަކަށް ވިއްކާލީ ބަދަލަކާ ނުލައިކަމަށް މެމްބަރު ވިދާޅުވިއެވެ. ކައުންސިލުން ކުރާ ކޮންމެ ކަމެއް މިއަދާ ހަމައަށް ކުރަމުން އައީ ރައްޔިތުންނަށް ބަދަލު ދީގެންކަމަށާއި ނަމަވެސް މިހާރު މިއޮތް ކައުންސިލުން ރައްޔިތުންގެ ރުއްގަހުގެ ބަދަލު ވެސް ނުދޭކަމަށް ފަޒާދު ވިދާޅުވިއެވެ.

މެމްބަރު ވިދާޅުވީ މިހާރު އޮތް ފުވައްމުލައް ކައުންސިލުން ކުރަނީ މުޅީން ވެސް ގާނޫނާ ހިލާފު ކަންކަންކަމަށެވެ.

ޕީއެންސީން މިހާރު މި ދައްކާ ކެންޑިޑޭޓުން ހޮވައިގެން ރުއްގަހުގެ ބަދަލު ވެސް ލިބޭނެކަމަށާއި އަދި ފުވައްމުލަކު ރައްޔިތުންގެ ކަންބޮޑުވުންތަކަށް ހައްލު އަންނާނެ ކަމުގެ ޔަގީންކަން މެމްބަރު ދެއްވިއެވެ. 11 އަހަރު ފަހުން ނަމަވެސް ފުވައްމުލައް ކައުންސިލުގެ މެޖޯރިޓީ ސަރުކާރަށް ދެއްވުމަށް އެދިވަޑައިގެން މި ފުރުސަތު ދެއްވައިފިނަމަ ތަފާތު ދައްކާނޭކަމަށް ފަޒާދު ވިދާޅުވިއެވެ.