މާލެ ސަރަހައްދުގައި މަގުމަތީ އުޅޭ ބުޅާތައް ގިނަވުމުގެ މައްސަލައަށް ހައްލެއް ހޯދުމަށް ޤާއިމުކުރެވުނު "އޮޅު ހިޔާ" ޕެޓް ކެއަރ ފެސިލިޓީ މިއަދު ހަވީރު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހުޅުއްވައިދެއްވައިފިއެވެ.

ހުޅުމާލޭ ދެވަނަ ފިޔަވަހީގައި 5000 އަކަފޫޓުގެ ބިމެއްގައި ތަރައްޤީކޮށްފައިވާ މި ފެސިލިޓީ ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި ދައުލަތުގެ ވަޒީރުންނާއި، ރައްޔިތުންގެ މަޖިލީހުގެ މެންބަރުން ބައިވެރިވެވަޑައިގެންނެވިއެވެ.

"އޮޅު ހިޔާ" އިން ފޯރުކޮށްދޭނެ ޚިދުމަތްތަކުގެ ތެރޭގައި އާންމު ޗެކްއަޕްތަކާއި، ފަރުވާތަކާއި، އޮޕަރޭޝަންތައް ހިމެނެއެވެ. މީގެ އިތުރުން ވެޓެރިނޭރިއަނުންގެ އިރުޝާދުގެ ދަށުން ބުޅަލަށް ބޭސް ދިނުމާއި، ކާންދިނުމާއި، ބޭސްއެޅުމުގެ ޚިދުމަތްވެސް ލިބޭނެއެވެ.

ޕެޓް ފެސިލިޓީ މިއަދު ހަވީރު ރައީސް ހުޅުއްވައިދެއްވަނީ

ރައީސް މުޢިއްޒު ވިދާޅުވީ މިއީ އެތައް އަހަރެއް ވަންދެން މާލޭގެ ރައްޔިތުންނަށް ކަންބޮޑުވުމަކަށްވެފައިވާ މައްސަލައަކަށް ގެނެވުނު ދާއިމީ ހައްލެއް ކަމަށެވެ. އަދި މިކަމުގެ ސަބަބުން މަގުމަތި ސާފުތާހިރުވެ، ބުޅާތަކަށް އޯގާތެރިކަމާއެކު ބެލެހެއްޓޭނެ ކަމަށްވެސް އެމަނިކުފާނު ވިދާޅުވިއެވެ.

"އޮޅު ހިޔާ" އަކީ ރައީސް މުޢިއްޒުގެ އަމިއްލަ ތަސައްވުރެއްގެ ދަށުން ވުޖޫދަށް ގެނެވުނު މަޝްރޫޢެކެވެ. މިކަމަށްޓަކައި ރައީސް މުޢިއްޒު މާލޭ މޭޔަރުކަމުގައި ހުންނެވިއިރުއްސުރެ މަސައްކަތް ކުރައްވަމުން ގެންދެވިއެވެ. ނަމަވެސް އޭރުގެ ސަރުކާރުން އެއްބާރުލުން ނުލިބުމުގެ ސަބަބުން މިކަން ލަސްވެފައިވާކަން ފާހަގަކުރެވެއެވެ."އޮޅު ހިޔާ" ގެ ޚިދުމަތް ފެށުމާއެކު މާލޭގެ މަގުމަތީގައި އުޅޭ ބުޅާތަކަށް ރަނގަޅު ފަރުވާއެއް ލިބި، އެ ޖަނަވާރުތަކުގެ އާބާދީ ކޮންޓްރޯލް ކުރެވޭނެ ކަމަށް ސަރުކާރުން އުންމީދު ކުރައްވައެވެ.  

ޕެޓް ފެސިލިޓީގެ ޚިދުމަތްތައް ރައީސް ބައްލަވާލައްވަނީ