ތ. ވިލުފުށީގައި ކުރިއަށްދާ މަޝްރޫޢުތަކާ ގުޅޭގޮތުން މުހިއްމު މަޝްވަރާތަކެއް ކުރިއަށްގެންގޮސްފައިވާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނެފިއެވެ.

އެގޮތުން، ވިލުފުށީގައި ކުރިއަށްގެންދާ މަޝްރޫޢުތަކާ ގުޅޭގޮތުން އާރްޑީސީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ނަބީހް އަފީފްގެ އިތުރުން އެ ކުންފުނީގެ އިސްވެރިންނާއެކު ވިލުފުށީ ދާއިރާގެ މަޖިލިސް މެންބަރު ހަސަން ވަހީދު އަދި އެ ރަށުގެ ކައުންސިލްގެ މެންބަރުން ބައްދަލުކޮށްފައިވާ ކަމަށް އާރްޑީސީން ބުންޏެވެ.

މި ބައްދަލުވުމުގައި އެ ކުންފުނިން ވިލުފުށީގައި ކުރިއަށްގެންދާ މަޝްރޫއުތަކުގެ އަދާހަމަ އާއި މަސައްކަތް ކުރުމުގައި ހުރި ގޮންޖެހުންތަކާ މެދު މަޝްވަރާކޮށްފައިވާ ވެސް އާރްޑީސީން ވަނީ ބުނެފައެވެ.

ސަރުކާރުން ވަނީ ތަރައްގީގެ ގިނަ މަޝްރޫޢުތަކެއް ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން އާރުޑީސީއާ ހަވާލުކޮށްފަ އެވެ.

އާރްޑީސީން މައިގަނޑު ގޮތެއްގައި ކުރަމުން އަންނަ ރަށްރަށުގެ މަގު ހެދުމުގެ މަޝްރޫޢުތަކުގެ އިތުރުން ފުލުހުންގެ މަރުކަޒުތައް އިމާރާތްކުރުމާއި، ފިޓްނަސް އެންޑް ރެކްރިއޭޝަން ސެންޓަރުތައް ގާއިމުކުރުން ހިމެނޭގޮތަށް، ތަރައްޤީގެ އެކި ދާއިރާތަކުގެ ގިނަ މަޝްރޫޢުތަކެއްގެ މަސައްކަތްތައް އެ ކުންފުނިން އަންނަނީ ކުރަމުންނެވެ.