ތ. ވިލުފުށީގައި ތަރައްގީކުރުމަށް ހަމަޖެހިފައިވާ އެއަރޕޯޓުގެ މަޝްރޫޢުގެ ބިން ހިއްކުމުގެ މަސައްކަތްތައް ހަލުވިކަމާއެކު ކުރިއަށްގެންގޮސް، އެ މަސައްކަތުގެ 80 އިންސައްތަ ފުރިހަމަކޮށްފައިވާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.

އެގޮތުން، ވިލުފުށީގެ އެއަރޕޯޓަށް ބޭނުންވާ ބިމުގެ 81 ހެކްޓަރުގެ ތެރެއިން 65 ހެކްޓަރުގެ ބިން ހިއްކާ ނިމިފައިވާ ކަމަށް އެމްއޭސީއެލް އިން ވަނީ ބުނެފައެވެ. 

ވިލުފުށީގެ އެއަރޕޯޓު މަސައްކަތް ކުރުމަށް ބޭނުންވާ ބިން ހިއްކުމުގެ ޢަމަލީ މަސައްކަތް ފަށާފައިވަނީ، މިދިޔަ ނޮވެންބަރު މަހު 14 ވަނަ ދުވަހުއެވެ. މިމަސައްކަތް ކުރަނީ ކެޕޭސީޓީގައި 11،300 ކިއުބިކް މީޓަރު ހުރި ފިލިޕޯ ބުރުނެލޭސްކީ ނަމަކަށް ކިޔާ ޑްރެޖަރެއްގެ އެހީގައި ކަމަށް އެމްއޭސީއެލް އިން ބުނެފައިވެއެވެ.

މި އެއަރޕޯޓަކީ 1800 މީޓަރުގެ ރަންވޭއަކާއެކު ތަރައްގީކުރާ އެއަރޕޯޓެކެވެ. މިމަޝްރޫޢުގެ މަސައްކަތް 2 އަހަރާއި 6 މަސް ދުވަހުގެ ތެރޭގައި ނިންމާއިރު މަޝްރޫޢުގެ ދަށުން ރަންވޭއާއި ޓަމިނަލް ބިލްޑިން ފަޔަރ ބިލްޑިންގ އަދި އެނޫންވެސް އެއަރޕޯޓަކަށް ބޭނުންވާ ހުރިހާ ވަސީލަތެއް ފުރިހަމަކޮށް ގާއިމުކުރާނެއެވެ. 

ވިލުފުށީ އެއަރޕޯޓު ތަރައްގީ ކުރުމުގެ މަސައްކަތް ހަވާލުކޮށްފައިވަނީ މިދިޔަ އަހަރު ސެޕްޓެންބަރު މަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިލުފުއްޓަށް ކުރެއްވި ދަތުރުފުޅުގެ ތެރެއިންނެވެ.

އެ ރަށުގައި ބޭއްވި ރަސްމިއްޔާތުގައި ވިލުފުށީ އެއަރޕޯޓު ތަރައްގީކުރުމުގެ މަސައްކަތް އިފްތިތާހުކޮށްދެއްވައި، ބިން ހިއްކުމުގެ މަޝްރޫޢުގެ މަސައްކަތް ފައްޓަވައިދެއްވުމަށްފަހު ވިލުފުށީގެ ރައްޔިތުންނާ ބައްދަލުކުރައްވާ ރައީސުލްޖުމްހޫރިއްޔާ ވަނީ މި މަސައްކަތް މި ދައުރު ތެރޭގައި ނިންމަވައިދެއްވާނެކަމަށް ވިދާޅުވެފައެވެ.