ކުރިއަށް އޮތް ލޯކަލް ކައުންސިލު އިންތިހާބަށް ވެރިކަންކުރާ ކޮންގުރެސް ޕާޓީން ކުރަމުން އަންނަ ކެމްޕެއިނުގެ ތެރެއިން މާފަންނު މެދު ދާއިރާގެ ގޭގެއަށް ޒިޔާރަތްކޮށް ރައްޔިތުންނާ ބައްދަލުކުރުމުގެ ހަރަކާތް މިއަދު ހަވީރު ކުރިއަށްގެންގޮސްފިއެވެ. 

މިއަދު ހަވީރު އެ ދާއިރާގައި ކުރިއަށްގެންދިޔަ ހަރަކާތުގައި ރައީސް އޮފީހުގެ ވަޒީރު އަލީ އާރިފުގެ އިތުރަށް، ޔޫޓު މިނިސްޓަރުގެ މުސްތަޝާރު އަދި މާލޭ ސިޓީގެ ކުރީގެ ޑެޕިއުޓީ މޭޔަރު އަހްމަދު ނަރީޝާއި، މާލެ ސިޓީގެ މޭޔަރުކަމަށް ކޮންގުރެސް ޕާޓީގެ ޓިކެޓުގައި ވާދަކުރައްވާ މޫސާ އަލީ ޖަލީލާއި އަންހެނުންގެ ތަރައްގީއަށް މަަސައްކަތްކުރާ ކޮމިޓީގެ ރައީސާގެ މަގާމަށް އެ ޕާޓީގެ ފަރާތުން ވާދަކުރައްވާ އާއިޝަތު އަލައިކާ އަދުނާން ބައިވެރިވެވަޑައިގަތެވެ. 

އޭގެ އިތުރަށް އެ ދާއިރާގެ ކައުންސިލު ގޮނޑިއަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރުކަމަށް ކޮންގްރެސް ޕާޓީގެ ޓިކެޓުގައި ވާދަކުރައްވާ ކެންޑިޑޭޓުންވެސް މި ހަރަކާތުގައި ބައިވެރިވެވަޑައިގެންފައިވެއެވެ. 

ކެމްޕެއިނުގައި ރައްޔިތުންގެ ގާތަށް ޒިޔާރަތްްކޮށް ހާލު އަހުވާލު އޮޅުންފިލުވައި ރައްޔިތުންނާ ގާތްގުޅުމެއް އުފައްދައި އިންތިހާބުވުމަށްފަހުވެސް އެ ގުޅުން ދަމަހައްޓައި، ރައްޔިތުންގެ ބައިވެރިވުމާއެކު ކައުންސިލުގެ ކަންކަން ކުރިއަށްގެންދިއުމަށް އިސްކަންދިނުމަށް ކޮންގްރެސް ޕާޓީގެ ރައީސް، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވަނީ އިލްތިމާސްކުރައްވާފައެވެ. 

އެހެން ޕާޓީތަކުގެ ކެމްޕެއިން ނުފެށުނު ނަމަވެސް ކޮންގްރެސް ޕާޓީން އަންނަނީ މާލޭގައި އަދި އަތޮޅުތެރޭގައިވެސް ފޯރިއާއެކު ކެމްޕެއިން ހަރަކާތްތައް ބާއްވަމުންނެވެ. އެ ޕާޓީގެ ކެމްޕެއިން މެނޭޖަރުވަނީ މާލޭގައި ދޮރުން ދޮރަށް ހިނގުމުގެ ހަރަކާތް ފެށުމާއެކު ރަށްރަށުގައިވެސް ޖޯޝާއި ފޯރީގައި އެ ހަރަކާތް ކުރިއަށްެގެންދަން އެދިވަޑައިގެންފައެވެ. 

ބޮޑު އިންތިހާބު ބޯމަތިވަމުން އަންނައިރު ކޮންގްރެސް ޕާޓީގެ އެތެރޭގެ ގުނަވަންތަަކަށް މީހުން އައްޔަންކުރައްވައި، ޕާޓީގެ އެތެރޭގެ އިންތިޒާމުތައް ވަރުގަދަކުރައްވައި، ޕާޓީގެ ހިންގުންތެރިކަން ހަރުދަނާކުރެއްވުމަށް ރައީސް ޑރ.މުއިއްޒުވަނީ ހާއްސަ ފިޔަވަޅުތަކެއް އަޅުއްވާފައެވެ.