މި ސަރުކާރުގެ އިސްނެންގެވުމާއެކު ރާއްޖޭގައި ތަރައްޤީކުރާ ފުރަތަމަ ސަސްޓެއިނަބަލް ޓައުންޝިޕް މަޝްރޫޢު، "ޕްރޮޖެކްޓް އައިލާ" ގެ ބިންގާ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އަޅުއްވައިދެއްވައި، އަމަލީ މަސައްކަތް ރަސްމީކޮށް ފަށްޓަވައިދެއްވައިފި.

މިއީ ނ. އަތޮޅުގެ ދެކެނަންފަރާއި ދިގުފަރުގެ އިތުރުން ކުރަމާދޫ ގައި ކުރިއަށްގެންދާ 790 މިލިއަން އެމެރިކާ ޑޮލަރުގެ ބޮޑު އިންވެސްޓްމަންޓެއް. އައިލާ ސަސްޓެއިނަބަލް ޓައުންޝިޕް ތަރައްޤީކުރުމަށްޓަކައި، ދިވެހި ސަރުކާރާއި ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ ދެމެދު އިންވެސްޓްމަންޓް އެއްބަސްވުމެއްގައި ސޮއިކުރައްވައި "ޕްރޮޖެކްޓް އައިލާ" ސްޕެޝަލް އިކޮނޮމިކް ޒޯނެއްގެ ގޮތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ކަނޑައެޅުއްވީ 2025، ޑިސެންބަރު 31 ގައި. 

"ޕްރޮޖެކްޓް އައިލާ" ގެ ބިންގާ އެޅުއްވުމުގެ ރަސްމިއްޔާތަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަޑައިގެންނެވުން. ފޮޓޯ: ރައީސް އޮފީސް

ރަސްމިއްޔާތުގައި ވާހަކަފުޅު ދައްކަވަމުން، ޕްރޮޖެކްޓް އައިލާގެ ޗީފް އެގްޒެކެޓިވް އޮފިސަރ ޕީޓަރ ކްރިސްޓިކް ވަނީ ރައީސުލްޖުމްހޫރިއްޔާގެ ދުރު ވިސްނުންފުޅާއި ހަރުދަނާ ލީޑަރޝިޕް ފާހަގަކުރައްވައި އެކަމަށް ތަޢުރީފުކުރައްވާފަ. އަދި ސަސްޓެއިނަބަލް ޓައުންޝިޕް ކޮންސެޕްޓަކީ ރާއްޖޭގެ ތަރައްގީއަށް މުހިއްމު ވިސްނުންތެރި މޮޑެލެއްކަން ޕްރޮޖެކްޓް އައިލާގެ ޗީފް އެގްޒެކެޓިވް އޮފިސަރ ފާހަގަކުރައްވާފައިވޭ. ސީ.އީ.އޯ ވަނީ މި ޕްރޮޖެކްޓް އެޕްރޫވް ކުރުމުގެ މަރުހަލާގެ ކަންކަން ދިޔައީ ދެފުށްފެންނަގޮތަށްކަން ފާހަގަކުރައްވައި ރާއްޖޭގައި އިންވެސްޓަރުންނަށް އިތުބާރު އޮތް މާހައުލެއް ޤާއިމްވެފައި އޮތްކަމުގެ ޔަޤީންކަން ދެއްވާފަ.