ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވައުދުވެވަޑައިގެންނެވި ގޮތަށް ނ.ވިހަފަރުގައި އެއާޕޯޓު އެޅުމަށް ބޭނުންވާ ބިން ހިއްކުމުގެ އަމަލީ މަސައްކަތް މިއަދު ފަށައިފިއެވެ. 

މިއަދު އެކަމަށް ހާއްސަކޮށް ބޭއްވި ރަސްމިއްޔާތު ޝަރަފުކޮށްދެއްވީ ރައީސެވެ. އަދި މަޝްރޫއުގެ އަމަލީ މަސައްކަތް ފައްޓަވައިދެއްވީ އިގުތިސާދީ ތަރައްގީއާއި ވިޔަފާރިއާ ބެހޭ ވަޒީރު މުހައްމަދު ސައީދެވެ. މި މަސައްކަތް ކުރިއަށްގެންދަނީ އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އާ ހަވާލުކޮށްގެންނެވެ. 

ބިން ހިއްކުމުގެ މި މަޝްރޫއުގެ ދަށުން 42 ހެކްޓަރުގެ ބިން ހިއްކުމަށް ހަމަޖެހިފައިވާއިރު، މި ބިން ހިއްކަނީ 1.6 މީޓަރު އުސްމިނުގައެވެ. މި ބިން ހިއްކައި އެތަނުގައި ތަރައްގީކުރާ އެއާޕޯޓުގައި 1،800 މީޓަރުގެ ދިގު ރަންވޭއަކާއި ޓާމިނަލާއި، އޭޕްރަންގެ އިތުރަށް އެއާޕޯޓު ހިންގުމަށް ބޭނުންވާ އެހެނިހެން ވަސީލަތްތައް ގާއިމުކުރާނެއެވެ. 

ފާއިތުވި އަހަރުގެ ޖުލައި މަހު ނ.އަތޮޅަށް ރައީސް ކުރެއްވި ދަތުރުފުޅުގެ ތެރެއިން ނ.ހޮޅުދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސްވަނީ ވިހަފަރުގައި އެއާޕޯޓު އެޅުމަށް ބޭނުންވާ ބިން ހިއްކުމުގެ މަސައްކަތް މި އަހަރުގެ ޖަނަވަރީ މަހު ފެށިގެންދާނެކަން އިއުލާނުކުރައްވާފައެވެ. 

ހޮޅުދޫ، ވެލިދޫ، ފޮއްދޫ ހިމެނޭ ސަރަހައްދަކީ އަތޮޅުގެ އެހެން ސަރަހައްދުތަކާ ވަކިން އޮންނަ ސަރަހައްދެއްކަން ފާހަގަކުރައްވަމުން އެ ސަރަހައްދަށް ޑޮމެސސްޓިކް އެއާޕޯޓެއް ބޭނުންވާތީ، އަދި ސަރުކާރުން އެއާޕޯޓު އެޅުމަށް ކަނޑައަޅާފައިވާ މިންގަނޑުވެސް އެ ސަރަހައްދުގައި އެއާޕޯޓެއް ގާއިމުކުރަންޖެހޭތީ، ވެލިދޫ ކައިރީ އޮންނަ ވިހަފަރުގައި އެއާޕޯޓު ތަރައްގީކުރަން ނިންމާފައިވާކަމަށް ރައީސް ވިދާޅުވިއެވެ. 

މިއަދު އެއާޕޯޓުގެ ބިން ހިއްކުމުގެ މަޝްރޫއު ފެށިގެން ގޮސްފައިވާއިރު، ރައީސް އިއުލާނުކުރެއްވި ގޮތުގެ މަތިން އެއާޕޯޓުގެ މަސައްކަތް އެކީ ނިންމަން ކަނޑައަޅާފައިވަނީ ދެ އަހަރުގެ ތެރޭގައެވެ.