ސަރުކާރުން ކުރަމުންދާ މަސައްކަތަކީ އިގުތިސާދީ ތަރައްގީއަށް މިހާރަށްވުރެ ހަމަޖެހޭ ބިންގަލެއް އެޅުމުގެ މަސައްކަތް ކަމުގައި ވިދާޅުވެ ކުރީގެ ތިމާވެއްޓާ ބެހޭ ވަޒީީރު އައިމިނަތު ޝައުނާއަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމު ރައްދު ދެއްވައިފިއެވެ. 

މިފަދައިން ޝިޔާމު ވިދާޅުވީ ސްޕެޝަލް އިކޮނޮމިކް ޒޯންތަކުގައި ހިންގޭ އިގުތިސާދީ ހަރަކާތްތަކުގެ ލިސްޓު މުރާޖައާކުރައްވައި އެ ލިސްޓުގައި ތެލާއި ގޭސް ކަނޑުން ހޯދުން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހިމެނުއްވުމަކީ ފަތުރުވެރިކަމަށް ނުރައްކާވާނެ ކަމެއްކަމަށް ޝައުނާ ވިދާޅުވުމުންނެވެ. 

ޝިޔާމު ވިދާޅުވީ ޓޫރިޒަމާއި މަސްވެރިކަމަށް އެކަނި ރާއްޖޭގެ އިގުތިސާދު ބަަރޯސާވެފައި އޮތް އޮތުން ނިމުމަކަށް ގެނެސް އެހެން ސިނާއަތްތައް ތައާރަފުކޮށް އިގުތިސާދު ސިންދަފާތުކުރުމަށް ރައީސް ޑރ.މުޢިއްޒު ގެންގުޅުއްވާ ތަސައްވުރަކީ ދިގު ރާސްތާގެ ވިލުންތެރިކަމަށް އަމާޒުކުރައްވައިގެން، ހަގީގަތްތަކަށް ރިއާޔަތްކުރައްވައިގެން އަޅުއްވާ ފިޔަވަޅެއް ކަމަށެވެ. 

މިނިސްތަރު ފާހަގަކުރެއްވި ގޮތުގައި ރާއްޖޭގެ އިގުތިސާދަކީ ބޭރުން އަންނަ ލޮޅުންތަކުން ވަރަށް ބޮޑަށް އަސަރުކުރާ އިގުތިސާދަކަށްވާތީ، އެ ހިރާސްތައް ކުޑަކޮށް، މިހާރަށްވުރެ ވަރުގަދަ އިގުތިސާދީ ބިންގަލެއް އަޅަންޖެހެއެވެ. އަދި ރާއްޖޭގެ އިގުތިސާދީ ހާއްސަ ސަރަހައްދަކީ 900،000 އަކަކިލޯމީޓަރު ބޮޑު ސަރަހައްދަކަށްވާއިރު މަސްވެރިކަން ފިޔަވައި އެ ސަރަހައްދުން މަންފާ ހޯދުމަށް ކުރެވުނު ކަމެއް ނެތްކަން ވަޒީރު ފާހަގަކުރެއްވިއެވެ. 

ވިސްނުންތެރިކަމާއި ރޭވުންތެރިަކމާއެކު މި ކަނޑުފަޅުގެ ބޮޑު އިގުތިސާދީ ފުރުސަތުތައް ހޯދުމަށް މަސައްކަތްކުރުމަކީ ވަސީލަތްތައް ދެމެހެއްޓެނެވި ގޮތުގައި ބޭނުންކުރެވޭނެ އިތުރު މަގުތައް ފަހިކޮށްދޭނެ ކަމެއްކަން ފާހަގަކުރައްވަމުން ޝިޔާމު ވިދާޅުވީ، އެކަމުގައި ސަރުކާރުން ބައިވެރިންގެ ގޮތުގައި އިހުތިޔާރުކުރާނީ ނަން ހުރި، ގާބިލު އަދި ރާއްޖޭގެ މަސްލަހަތުތަކާ އެއްގޮތަށް މަސައްކަތްކުރާނެ އިންވެސްޓަރުން ކަމަށެވެ. 

އިތުރަށް ޝިޔާމު ވިދާޅުވީ މޫސުމީ ބަދަލުތަކުގެ އަސަރު އެންމެ ބޮޑަށް ފޯރާ އެއް ގައުމުގެ ހައިސިއްޔަތުން ރާއްޖެއިން އައު އިގުތިސާދީ ހަރަކާތްތައް ފަށާނީ ވަރަށް ބޮޑަށް ވިސްނައިގެން ކަމަށެވެ. އެގޮތުން އެއްވެސް ތަރައްގީގެ މަސައްކަތެއް ފެށުމުގެ ކުރިން ދެފުށް ފެންނަ ގޮތަށް އެ މަސައްކަތަކުން ތިމާވެއްޓަށްކުރާނެ އަސަރު ވަޒަަންކޮށް، ދިރުންތަކުގެ މުއްސަނދިކަމަށް އުނިކަމެއް ނާންނާނެހެން ދިގުރާސްތާގެ ދެމެހެއްޓެެނެވިކަން ކަށަވަރުވާނެ ގޮތަށް މަސައްކަތް ބައްޓަންކުރާނެ ކަމުގެ ޔަގީންކަން ވަޒީރު ދެއްވިއެވެ. 

މިގެނެވޭ ސިންދަފާތުކުރުމުގެ ސަބބަުން ރާއްޖޭގައި އުފެއްދުންތެރިކަން އިތުރުކުރެވި، ނޫ އިގުތިސާދުގެ ތެރެއިން އުފަންވާ ފުރުސަތުތަކުގެ މަރުކަޒަކަށް ރާއްޖެ ވެގެންދާނެ ކަމަށާއި، އެކަމުގެ ސަބަބުން ފެންވަރު ރަނގަޅު މަތީ ފަންތީގެ ހުނަރަށް ބޭނުންވާ ވަޒީފާތައް އުފެެދިގެންދާނެ ކަމުގައި ވިދާޅުވިއެވެ. އޭގެ ތެރޭގައި މެރިން ޖިއޮލޮޖީއާއި ސަބްސީ އިންޖިނިއަރިންއާއި ތިމާވެށީގެ ސައެންސް ފަދަ ދާއިރާތައް ހިމެނޭނެ ކަމުގައި ފާހަގަކުރެއްވިއެވެ. 

"މިހާރު އޮތް ހާލަތުގައި ދެމި ތިބުމަކީ އަޅުގަނޑުމެންނަށް އޮތް ހިޔާރެއް ނޫން. އިސްނަގައިގެން މަސައްކަތްކޮށް ރާއްޖޭގެ އިގުތިސާދުގެ ވިލުންތެރިކަން އިތުރުކޮށް، އަމިއްލަ ފައިމައްޗަށް ތެދުވެވިފައިވާ މުސްތަގުބަލެއް ކަށަވަރުކުރަންޖެހޭ،" ވަޒީރު ވިދާޅުވިއެވެ.