ބިދޭސީ މުވައްޒަފުން މަސައްކަތްތަކަށް ސައިޓު ރަޖިސްޓްރީ ކުރުމަށް ހުށަހަޅާ ވޯކް ސައިޓު ޑިކްލަރޭޝަން ފޯމު ހުށަހެޅުމަށް ދިން މުއްދަތު އިތުރުކޮށްދީފިއެވެ. 

ދާހިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނީ މުއްދަތު އިތުރުކުރީ ކޯޓާ ދޫކުރާ މަސައްކަތްތަކަށް ސައިޓް ރަޖިސްޓްރީ ކުރުމަށް މިހާރު ހުށަހަޅަންޖެހޭ ލިޔެކިޔުންތަކުގެ އިތުރުން ނޯޓަރައިޒް ކޮށްފައިވާ "ވޯކް ސައިޓް ޑިކްލަރޭޝަން ފޯމު" އަދި އިޤްރާރު ހުށަހެޅުމަށް ދީފައިވާ މުއްދަތު އިތުރުކޮށްދިނުމަށް އެދި ގިނަ ވަޒީފާދޭ ފަރާތްތަކުން އެދެމުންދާތީ ކަމަށެވެ. 

އެގޮތުން ލިޔެކިއުންތައް ހުށަހެޅުމުގެ މުއްދަތު އަންނަ ޖޫންމަހުގެ އެއް ވަނަ ދުވަހާ ހަމައަށް އިތުރުކޮށްދީފައި ވާކަމަށް ވުޒާރާއިން ވަނީ ބުނެފައެވެ.

އެހެންކަމުން ޖޫން މަހުގެ ފުރަތަމަ ދުވަހުގެ ކުރިން ވޯކް ސައިޓް ޑިކްލަރޭޝަން ފޯމު އަދި އިޤްރާރު، ރަޖިސްޓަރީކޮށްފައިވާ ސައިޓުގެ "ޑޮކިއުމަންޓް އަޕްޑޭޓް ރިކުއެސްޓް" ނުވަތަ "ސައިޓް ޕަރމިޓް އަޕްޑޭޓް" މެދުވެރިކޮށް ހުށަހެޅުމަށް ވުޒާރާއިން ވަނީ ހުރިހާ ވަޒީފާދޭ ފަރާތްތަކަށް އަންގާފައެވެ.ކަނޑައެޅިފައިވާ މުއްދަތުގެ ތެރޭގައި ފޯމު ހުށަނާޅާ ފަރާތްތަކުގެ ސައިޓްތައް ސަސްޕެންޑް ކުރެވޭނެކަން ވެސް ވުޒާރާއިން ހާމަކުރެއެވެ.

ހުސްވި މަހުގެ 31ގައި ބިދޭސީންނަށް ދާއިމީ ކޯޓާ ދޭ އުސޫލަށް ބަދަލު ގެނެސްފައިވެއެވެ. އެ އުސޫލުގެ ދަށުން، އޭރު ވޯކް ސައިޓު ޑިކްލަރޭޝަން ފޯމު ހުށަހަޅަން ދިން ފުރުސަތު އަންނަ ހޮނިހިރު ދުވަހަށް ހަމަވާނެއެވެ.

ރާއްޖޭގައި މަސައްކަތް ކުރާ ބިދޭސީން ގަވާއިދަށް ފެއްތުމަށްޓަކައި ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އަދި ރާއްޖޭގެ ޤާނޫނުތަކާއި ޚިލާފަށް ވިޔަފާރިތަކުގެ ތެރޭގައްޔާއި އެހެނިހެން ކަންކަމުގައި ޙަރަކާތްތެރިވަމުންދާ ބިދޭސީންނަށް އިތުރު ފުރުސަތެއް ދިނުމެއް ނެތި ޑީޕޯޓުކުރުމުގެ މަސައްކަތް ގެންދަނީ ކުރަމުންނެވެ.