މާލޭ ސަރަހައްދުގައި ސަރުކާރުން ގާއިމުކުރާ ޖެނެރަލް ޕްރެކްޓިކްސް ކްލިނިކުތައް ނުވަތަ އާބަން ހެލްތު ކެއާ ސެންޓަރުތަކާއެކު ހޮސްޕިޓާތަކުގައި ސްޕެޝަލިސްޓު ޑޮކްޓަރުންނަށް ދެއްކުމަށް އޮންނަ ކިއު ކުޑަކުރެވި، ބަލިމީހުންނަށް ގިނަ ލުއިތަކެއް ލިބިގެންދާނެ ކަމުގައި ހެލްތު މިނިސްޓަރު ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ. 

ރައީސުލްޖުމްހޫރިއްޔާ އޮފީހުގެ ތަރުޖަމާނު ހީނާ ވަލީދު ކުރިއަށްގެންދަވާ "ތަރުޖަމާނާއެކު" ޕޮޑްކާސްޓުގެ ހަތްވަނަ އެޕިސޯޑުގައި ބައިވެރިވެވަޑައިގެން މި ސެންޓަރުތަކުގެ މަފުހޫމު ތަފުސީލުކޮށް ވިދާޅުވެދެއްވަމުން ނާޒިމު ފާހަގަކުރެއްވި ގޮތުގައި ދުނިޔޭގެ ތަރައްގީވެފައިވާ ގިނަ ގައުމުތަކުގައި ސްޕެޝަލިސްޓު ޑޮކްޓަރަކަށް ދެއްކުމުގެ ކުރިން އާއްމު ބަލިތަކުގެ ޑޮކްޓަރަކަށް ދައްކައި ހާއްސަ ޑޮކްޓަރަކަށް ދެއްކުމަކީ ކޮންމެހެން ކުރަންޖެހޭ ކަމެއްކަަން ކަށަވަރުކުރެވޭނެ ނިޒާމެއް އޮންނަ ކަމަށެވެ. 

ކުރިއްސުރެ ރާއްޖޭގައި އަމަލުކުރަމުން އައިސްފައި އޮތް ގޮތަކީ ކުޑަ ކަމެއް މެދުވެރިވި ނަމަވެސް ސްޕެޝަލިސްޓު ޑޮކްޓަރަށް ދެއްކުން ކަމަށާއި، އެއީ ރާއްޖޭގެ ބޮޑެތި ހޮސްޕިޓާތަކުގައި ސްޕެޝަލިސްޓު ޑޮކްޓަރުންނަށް ދެއްކުމަށް އޮންނަ ކިއު އިންތިހާއަށް ދިގުވުމަށް މެދުވެރިވާ މައިގަނޑު ސަބަބުކަމަށްވެސް ނާޒިމު ވިދާޅުވިއެވެ. 

ސިއްހީ ނިޒާމު އިސްލާހުކުރުމަށްޓަކައި ކުރަންޖެހޭ އެންމެ މުހިއްމު މަސައްކަތަކީ އާއްމު ބަލިތަކުގެ ޑޮކްޓަރުންނަށް ފަސޭހައިން ދެއްކޭނެ އިންތިޒާމު ހަމަޖެއްސުމަށް ޖީޕީ ކްލިނިކުތަކެއް ގާއިމުކުރުންކަަން ފާހަގަކުރައްވަމުން ނާޒިމު ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވަނީ މާލޭ ސަރަހައްދުގައި ސަރުކާރުގެ މި ދައުރުގެ ތެރޭގައި ހަތް ޖީޕީ ކްލިނިކުތައް ގާއިމުކުރުން ކަމަށެވެ. 

އެގޮތުން މިހާރު އެއް ކްލިނިކު ހުޅުވާފައިވާއިރު ހެންވޭރުގައި ހުންނަ ދަމަނަވެށީގެ އިމާރާތާއި ކުރީގެ ތެލެސީމިއާ ސެންޓަރު ހުރި އިމާރާތް އެއްކޮށްލައިގެން ޖީޕީ ކްލިނިކެއް ގާއިމުކުރުމުގެ މަސައްކަތް އަދި ހުޅުމާލޭގެ ދެވަނަ ފިޔަވަހީގައި ޖީޕީ ކްލިނިކެއް ގާއިމުކުރުމުގެ މަސައްކަަތް މިހާރުވެސް ކުރެވެމުންދާކަން ވަޒީރު ފާހަގަކުރެއްވިއެވެ.

މި ކްލިނިކުތަކަށް އަންނަ ބަލިމީހުންގެ ތެރެއިން ސްޕެޝަލިސްޓުންނަށް ދައްކަންޖެހޭ ބަލިމީހުންގެ ތެރެއިން ހާލަަތަށް ބަލައި ކުއްލި ހާލަތުގައި ސްޕެޝަލިސްޓަށް ދައްކަންޖެހޭ ފަދަ ބަލިމީހުން ކިއުގައި  ނުޖެހި ސްޕެޝަލިސްޓުންނަށް ދެއްކޭނެ އިންތިޒާމުވެސް ކުރިއަށް އޮތް ތަނުގައި ހަމަޖެހިގެންދާނެކަން ނާޒިމު ފާހަގަކުރެއްވިއެވެ. 

"އަޅުގަނޑުމެންގެ ތަފާސްހިސާބުތައް ދައްކާ ގޮތުން އައިޖީއެމްއެޗްގެ އެމަޖިންސީއަށްް އަންނަ 500 މީހުންގެ ތެރެއިން ދެބައިކުޅަ އެއްބަައި މީހުންނަކީ ކޮންމެހެން އެމަޖެންސީ ރޫމަށް ދާންނުޖެހޭ މީހުން. ޖީޕީ ކްލިނިކުގެ ނިޒާމުން އެ ހިދުމަތް ލިބޭނަމަ ރައްޔިތުންނަށް ލުއި ފަސޭހަތަކެއް ލިބި، މައި ހޮސްޕިޓަލުގެ ކްރިޓިކަލް ރޫމުގައި އެންމެ ބޮޑަށް ފަރުވާ ބޭނުންވާ މީހާއަށް ކްރިޓިކަލް ފަރުވާ ލިބިގެންދިއުން،" ނާޒިމު ވިދާޅުވިއެވެ. 

ޖީޕީ ކްލިނިކުތަކުގައި ދޭ ހިދުމަތްތަކުގެ ތެރޭގައި ތުއްތު ކުދިންނަށް ވެކްސިން ދިނުމާއި، ސިޒޭޝަަން ކްލިނިކުތަކާއި، ނަފްސާނީ ފަރުވާއަށް ބޭނުންވާ އަސަސީ ތެރަޕީ ދިނުމާއި، އިތުރު ފަރުވާ ބޭނުންވާ މީހުންނަށް މައި ހޮސްޕިޓަލުގެ ސައިކިއެޓްރީ ޑިޕާޓުމެންޓުން ހިދުމަތް ލިބޭނެ ގޮތަށް ރިފާކުރެވުން ފަދަ ހިދުމަތްތައް ހިމެނޭނެކަން ނާޒިމު ފާހަގަކުރެއްވިއެވެ. 

"މިނިޒާމު އައިސްގެން ނޫނީ އަޅުގަނޑުމެންގެ ސިއްހީ ހިދުމަތް އިތުރު ހަރުފަތަކަށް ނުގެންދެވޭނެ. ހަމައެކަނި ހިދުމަތަށް އިންވެސްޓުކޮށްގެން، މެޝިނަރީ ލައްވައިގެން، އިންފްރަސްޓްރަކްޗާ ގާއިމުކޮށްގެން އެކަމެއް ނުވާނެ. މުޅި ގަވަނެންސް ސްޓްރެންތެން ކުރެވެންޖެހޭ،" ނާޒިމު ވިދާޅުވިއެވެ. 

ނާޒިމު ފާހަގަކުރެއްވި ގޮތުގައި މި ނިޒާމަކީ ދުނިޔޭގެ ގިނަ ގައުމުތަކުގައި ތަޖުރިބާކޮށް ނަތީޖާ ނެރެވިފައިވާ ހަރުދަނާ ނިޒާމެެކެވެ. އަދި އެ ނިޒާމުގެ ސަބަބުން ގިނަ ލުއިތަކެއް ލިބިގެންދާނެއެވެ.