ކުރިއަށް އޮތް ލޯކަލް ކައުންސިލް އިންތިހާބުގައި މާލޭ ސިޓީ ކައުންސިލަށް އިންތިހާބު ކޮށްދެއްވައިފިނަމަ ރައްޔިތުންނާއި ސަރުކާރާ ދެމެދު އޮންނަ ފާލަމެއްގެ ގޮތުގައި މަސައްކަތްކޮށްދީ ރައްޔިތުންގެ ކަންބޮޑުވުންތަކަށް ހައްލު ގެނެސްދެއްވާނެކަމަށް މައްޗަންގޯޅި އުތުރު ދާއިރާގެ ގޮޑިއަށް ޕީއެންސީގެ ޓިކެޓުގައި ވާދަކުރައްވާ އާދަމް އަދީމް ވިދާޅުވެއްޖެއެވެ. 

"އެމްއެމްޓީވީ"އިން ގެނެސްދޭ "ދިވެހިންގެ ރާއްޖެ" ޕްރޮގްރާމުގައި ވާހަކަ ދައްކަވަމުން އަދީމް ވިދާޅުވީ ދާއިރާގެ ރައްޔިތުން ތަހައްމަލުކުރަމުންދާ ކަންކަން ވަރަށް ރަނގަޅަށް އެނގޭކަމަށާއި އެ ރައްޔިތުންގެ ކަންބޮޑުވުންތަކަށް ކިރިޔާ ވެސް ތަސައްލީއެެއް ގެނެސްދެއްވީ އަދުގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ މޭޔަރުކަމުގައި ކަމަށެވެ. 

މާލެއަށް ދިމާވެފައިވާ ބޯހިޔާވަހިކަމަށް އެކަނި ބެލި ނަމަވެސް މާލޭގެ ރައްޔިތުން ބިންވެރިކުރުވައި، ގެދޮރުވެރިކުރުވުމަށް ވަކި ޕްލޭނެއް ހައްދަވައިގެން މަސައްކަތް ފެއްޓެވި ވެރިޔަކީ ރައީސް މުއިއްޒު ކަމަށް އަދީމް ވިދާޅުވިއެވެ. 

މި މަސައްކަތްތަައް ރައީސް ކުރައްވަމުން ގެންދަވާއިރު އެކަމަށް އެއްބާރުލުން ދިނުމަކީ ކޮންމެ ރައްޔިތެއްގެ ވާޖިބެއް ކަމަށާއި ރައީސް ފައްޓަވާފައިވާ މަސައްކަތްތަކުގެ ނަތީޖާއަކަށް ވާނީ މައްޗަންގޯޅި އުތުރު ދާއިރާގައި ހުރި ކަންބޮޑުވުންތަކަށް ނިމުން އައުންކަމަށް އަދީމް ވިޑާޅުވިއެވެ.

އަދީމް ވަނީ ސަރުކާރުން މަސައްކަތް ކުރަމުން ދަނީ ރައްޔިތުން އެދޭ ފަދަ "ދިވެހިންގެ ރާއްޖެ"އެއް ރައްޔިތުންނަށް ހޯއްދަވާދެއްވުމަށް ކަން ފާހަގަކުރައްވައި ކައުންސިލަށް ހޮއްވަވާ ދެއްވައިފިނަމަ ރައްޔިތުންގެ ކަންބޮޑުވުންތަކަށް ހައްލު ގެނެސްދެއްވާނެކަމުގެ ޔަގީންކަން ތަކުރާރުކޮށް ދެއްވާފައެވެ.