އަައްޑޫ އިކުއިޓޯރިއަލް ހޮސްޕިޓަލުގައި ގާއިމުކޮށްފައިވާ ކެތު ލެބުގެ ހިދުމަތް ފަށައި ހަ މީހަކަށް ފަރުވާ ދީފައިވާކަމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އިން ބުނެފިއެވެ. 

2023 ވަނަ އަހަރު ތެރޭގައި އައިޖީއެމްއެޗްގައި ކެތު ލެބުގެ ހިދުމަތް ގާއިމުކުރި ނަމަވެސް އެ ވަސީލަތްތައް ބޭނުންކުރަން އޮތީ ނުފެށިއެވެ. އައުޓްސޯސްކޮށްގެން ހިދުމަތް ފެށުމަށް ސަރުކާރުން ކުރިން މަސައްކަތް ފެށި ނަމަވެސް ފަހުން ސަރުކާރުން ނިންމާފައިވަނީ އައިޖީއެމްއެޗްއާ ހަވާލުކޮށްގެން ހިދުމަތް ދިނުމަށެވެ. 

އިއްޔެ އައިޖީއެމްއެޗުން ނެރުނު ބޔާނެއްގއި ބުނެފައިވަނީ އައްޑޫ އިކުއިޓޯރިއަލް ހޮސްޕިޓަލާއި އައިޖީއެމްއެޗް ގުޅިގެން އިންޓަވެންޝަނަލް ކާޑިއޮލޮޖީ ނުވަތަ ކެތު ލެބުގެ ހިދުމަތް ޖަނަވަރީ 27، 2026 ވަނަ ދުވަހުގައި ފަށާފައިވާ ކަމަށެވެ. 

މި ހިދުމަތް ދިނުމަށް ދެ ހޮސްޕިޓަލުގެ މެދުގައި ގާއިމުކޮށްފައިވާ ހާއްސަ އެއްބަސްވުމުގެ ދަށުން އައިޖީއެމްއެޗްގެ ހިތުގެ ބަލިތަކާއި އިންޓަވެންޝަނަލް ކާޑިއޮލޮޖީގެ ހާއްސަ ސްޕެޝަލިސްޓު ޓީމެއް ކޮންމެ ދެ ހަފުތާއަކުން އައްޑޫއަށް ޒިޔާރަތްކުރަން ހަމަޖެހިފައިވެއެވެ. އެ ޓީމުގައި އިންޓަވެންޝަނަލް ކާޑިއޮލޮޖިސްޓުންނާއި ކެތުލެބް ޓެކްނީޝަނުންގެ އިތުރަށް ތަޖުރިބާކާރު ނަރުހުން ހިމެނޭނެއެވެ. 

އައްޑޫ އިކުއިޓޯރިއަލް ހޮސްޕިޓަލުގައި މި ހިދުމަތް ފެށިތާ ދެ ދުވަސް ތެރޭ ޖުމްލަ ހަމީހަކަށް ކާމިޔާބުކަމާއެކު ފަރުވާ ދެވިފައިވާކަމަށް އަައިޖީއެމްއެޗުން ބުންޏެވެ. އަދި މިއީ އައްޑޫ ސިޓީގެ އިތުރުން މުޅި ދެކުނުގެ ސަރަހައްދުގެ ރައްޔިތުންގެ ތެރެއިން ހިތުގެ ބޮޑެތި ބަލުތަކަށް ފަރުވާ ހޯދުމަށް މާލެއަށް ބަރޯސާވާންޖެހިފައިވާ މިންވަރު ވަރަށް ބޮޑަށް ކުޑަކޮށްދޭނެ ކަމެއް ކަމުގައި އައިޖީއެމްއެޗުން ފާހަގަކުރިއެވެ. 

އަމިއްލަ ރަށުގައި އާއިލާ ގާތުގައި ތިބެގެން ހިތުގެ ބައްޔަށް ފަރުވާކުރުމުގެ ފުރުސަތު އައްޑޫ ރައްޔިތުންނަށް ފަހިކޮށްދިނުމަށް ފެށި މި ހިދުމަތް އެންމެ ފުރިހަމަ ގޮތުގައި މަތީ ފެންވަރުގައި ފޯރުކޮށްދިނުމަކީ އެ ހޮސްޕިޓަލުގެ މައިގަނޑު އަމާޒުކަމަށް އައިޖީއެމްއެޗުން ބުންޏެވެ. 

އެ ހޮސްޕިޓަލުން ބުނި ގޮތުގައި އައްޑޫ އިކުއިޓޯރިއަލް ހޮސްޕިޓަލުގައި މި ހިދުމަތް ފެށުނީ އޭއައިއެޗްއާއި ނޭޝަނަލް ކާޑިއެކް ސެންޓަރާ ގުޅިގެން ކުރެވުނު ބުރަ މަސައްކަތުންނެވެ. އަދި އެ މަސައްކަތުގައި ބައިވެރިވި ހުރިހާ ފަރާތްތަކަށް އައިޖީއެމްއެޗުންވަނީ ޝުކުރު އަދާކޮށްފައެވެ.