ޑޮލަރުގެ އަގު ދަށްވެ، ގިނަ ބަޔަކު ޑޮލަރު ވިއްކަމުންދާކަން ފާހަގަކުރެއްވުނު ނަމަވެސް އެކަމާމެދު ކަންބޮޑުވެވަޑައިނުގަންނަވާ ކަމަށް އެމެރިކާގެ ރައީސް ޑޮނާލްޑް ޓުރަމްޕު ވިދާޅުވެއްޖެއެވެ. 

ފައިނޭންޝަލް ޓައިމްސް ނޫހުން ރިޕޯޓުކުރި ގޮތުގައި، ބޮޑެތި ފައިސާތަކާ އަޅާބަލާއިރު ޑޮލަރުގެ އަގު 1.3 އިންސައްތައިން ދަށްވެފައިވާ ކަމަށެވެ. މިއީ ފާއިތުވި ހަތަރު އަހަރު ތެރޭ ޑޮލަރުގެ އަގަށް އައި އެންމެ ބޮޑު ދަށްވުމެވެ. 2026 ވަނަ އަހަރު ފެށުނު ފަހުން ޑޮލަރުގެ އަގުވަނީ 2.6 އިންސައްތަ ދަށްވެފައެވެ. 

ޑޮލަރުގެ އަގު ދަށްވުމަކީ އެމެރިކާގެ ރައީސް ޓުރަމްޕު ގެންގުޅުއްވާ ސިޔާސަތުތަކުގެ ސަބަބުން އެމެރިކާގެ މާލީ އެސެޓުތަކަށް އޮތް އިތުބާރު ހީނަރުވެފައިވާކަމުގެ ހެއްކެއްގެ ގޮތުގައި ބައިނަލްއަގުވާމީ މީޑިޔާއިން ފާހަގަކުރެއެވެ. 

ފާއިތުވި އެތައް އަހަރެއްގަައި އަރައިގެންނުދާ މިންވަރަށް ޑޮލަރާ އަޅާބަލާއިރު ޔޫރޯއާއި އިނގިރޭސިވިލާތުގެ ސްޓާލިން ޕައުންޑުގެ އަގު އަރާފައިވެއެވެ. އެގޮތުން ޔޫރޯއެއްގެ އަގު 1.4 އިންސައްތައިން މަތިވެ 1.204 ޑޮލަރަށް އަރާފައިވެއެވެ. އަދި ސްޓާލިންގެ އަގު 1.2 އިންސައްތައިން މަތިވެ 1.384 ޑޮލަރަށް އަރާފަައިވެއެވެ. މިއީ 2021 ވަނަ އަހަރުގެ ފަހުކޮޅަށްފަހު މި ދެ ފައިސާގެ އަގު އެންމެ މަތިވި މިންވަރެވެ. 

އައޮވާގައި އޮތް ހަރަކާތެއްގައި ނޫސްވެރިންވަނީ ޑޮލަރުގެ އަގު ދަށްވުމާމެދު ކަންބޮޑުވެވަޑައިގަންނަވާތޯ ޓުރަމްޕާ ސުވާލުކޮށްފައެވެ. އެމަނިކުފާނު ވިދާޅުވެފައިވަނީ ޑޮލަރުގެ އަގު ދަށްވުމަކީ ކަންބޮޑުވެވަޑައިގަންނަވާ ކަމެއް ނޫން ކަމަށެވެ. 

ޑޮލަރުގެ ބަދަލުގައި އަގު ރައްކާކުރެވޭ މައުދަންތަކަށް އިންވެސްޓުކުރުން އިތުރުވިކަން ބައިނަލްއަގުވާމީ ބާޒަރުގެ ހިސާބުތަކުން ފެނެއެވެ. އެގޮތުން ރިހީގެ އަގު އަށް އިންސައްތައަށްވުރެ މައްޗަށް އުފުލި އައުންސެއްގެ އަގު 112 ޑޮލަރަށް އަރާފައިވާއިރު، ރަނުގެ އަގު 3.5 އިންސައްތައިން މަތިވެ އައުންސެއްގެ އަގު 5،185 ޑޮލަރަށް އަރާފައިވެއެވެ. މައުދަންތަކުގެ އިތުރަށް ބިޓްކޮއިންގެ އަގުވެސް އެއް އިންސައްތައިން މަތިވެ، ބިޓްކޮއިނެއްގެ އަގަކީ މިހާރު 89،000 ޑޮލަރެވެ. 

ލަންޑަނުގައި ހުންނަ ރޯޔަލް އެސެޓް މެނޭޖުމެންޓް ފާމްގެ މަލްޓި އެސެޓް އިންވެސްޓިން ޑިޕާޓުމެންޓުގެ ވެރިޔާ ޓްރެވާ ގްރީތަމް ފައިނޭންޝަލް ޓައިމްސްއަށް މައުލޫމާތު ދެއްވަމުން ވިދާޅުވި ގޮތުގައި ޑޮލަރުގެ އަގު ދަށްވެ ރަނުގެ އަގު މަތިވުމުން އެނގިގެންދަނީ ޓުރަމްޕުގެ ކުއްލި ކުއްލިއަށް ބަދަލުވާ ސިޔާސަތުތަކުގެ ސަބަބުން އެމެރިކާގެ އިގުތިސާދީ ސިޔާސަތާމެދު އޮތް އިތުބާރު ހީނަރުވަމުންދާކަން ކަމަށެވެ. 

އަދި ޑޮލަރާ އަޅާބަލާއިރު ޖަޕާނުގެ ޔެންގެ އަގު ވެއްޓެމުންދާތީ އެމެރިކާއާ ގުޅިގެން މާލީ ހަރަކާތެއް ހިންގައި އެމެރިކާ ސަރުކާރުން ނުވަތަ ދައުލަތުން ގިނަ އަދަދެއްގެ ޔެން ގަންނަން އުޅޭކަމަށް އަޑު ފެތުރުމަކީވެސް ޑޮލަރުގެ އަގު އިތުރަށް ހީނަރުވާނެ ކަމެއްކަމަށް ވިދާޅުވިއެވެ. 

އަދި ޑޮލަރުގެ އަގު ހީނަރުވުމުގައި އެމެރިކާއާއި އެ ގައުމުގެ ނޭޓޯ ބައިވެރިންނާމެދު އުފެދިފައިވާ ނުތަނަވަސްކަމުގެ ދައުރުވެސް ބޮޑުކަމަށް ބާކްލޭސްގެ ސީނިއާ އެފްއެކްސް ސްޓްރެޓެޖިސްޓު ލެފްޓެރިސް ފާރމަކިސް ފައިނޭންޝަލް ޓައިމްސްއަށް މައުލޫމާތު ދެއްވަމުން ވިދާޅުވިއެވެ. އޭނާ ވިދާޅުވި ގޮތުގައި ދުނިޔޭގެ ދެވަނަ ބޮޑު ހަނގުރާމައަށްފަހު ގާއިމުވެފައި އޮތް ނިޒާމު ނެތިވެގެން ދިއުމަކީ ނުވަތަ އެ ނިޒާމަށް ބޮޑެތި ލޮޅުންތައް އައުމަކީ ޑޮލަރަށް ހީނަރުކަން ކުރިމަތިވާނެ ކަމެއް ކަމަށެވެ. 

ޑޮލަރު ދޫކޮށް އެހެން ފައިސާއަށް ހިޖުރަކުރަންޖެހޭ ގިނަ ސަބަބުތަކެއް ޓުރަމްޕުގެ ސިޔާސަތުތަކުގެ ސަބަބުން އުފަންވަމުންދާކަން ފާހަގަކޮށް ޖޭޕީ މޯގަންގެ މުހައްލިލުން އަންދާޒާކުރައްވަނީ މި އަހަރު ތެރޭ ޑޮލަރުގެ އަގު އިތުރަށް ހީނަރުވެ ބަލިކަށިވުމުގެ ފުރުސަތު ބޮޑު ކަމަށެވެ.