އުނގެނުމަށް ހުރި ހުރަސްތައް ނައްތާލައި، ހުރިހާ ދަރިވަރުންނަށް ހަމަހަމަ ގޮތެއްގައި ތައުލީމު ލިބޭނެ ގޮތް ފަހިކޮށްދޭ އިންކްލޫސިވް ތައުލީމު ފޯރުކޮށްދިނުމަކީ މި ސަރުކާރުގެ ސިޔާސަތެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. 

އެމަނިކުފާނު މިފަދައިން ވިދާޅުވީ ސަރުކާރުން ބިންގާ އަޅައި، އިމާރާތްކުރި ފުރަތަމަ ސްކޫލް ކަމަށްވާ "ޝަހީދު ޢަލީ ސްކޫލް" ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. 

ނަފްސާނީ ގޮތުން ކުދިންގެ ތައުލީމީ ބިންގާ ހަރުދަނާކޮށް އެޅިދާކަން ކަށަވަރުކުރުމަކީ ކޮންމެ މުދައްރިސެއް އަދި ބެލެނިވެރިއެއް ވާޖިބެއްކަމަށް ރައީސް ވިދާޅުވިއެވެ. އަދި އިންކްލޫސިވިޓީ ޔަގީންކުރުމަށްޓަކައި ސަރުކާރުން ހާއްސަ އިސްކަމެއްދީގެން މަސައްކަތް ކުރާނެކަމަށް ރައީސް ވިދާޅުވިއެވެ. 

ރައީސް ވިދާޅުވީ ޝަހީދު ޢަލީ ސްކޫލުގައި ވެސް އިންކްލޫސިވް ތައުލީމު ފޯރުކޮށް ދެވޭނެ ގޮތްތައް ފަހިވެފައި ވާކަމަށާއި، އަތޮޅު ތެރެއަށް މި ތައުލީމު ފުޅާކުރުމަށް އަމާޒުކޮށް މި އަހަރުގެ ތެރޭގައި ގިނަ މަސައްކަތްތަކެއް ކުރުމަށް ހަމަޖެހިފައި ވާކަމަށެވެ.

ސުކޫލު ނިސްބަތްވަނީ ސުންޠާން ޢަލީ (ހަވަނަ) ނުވަތަ މަޝްހޫރު ނަމުންނަމަ އަލިރަސްގެފާނަށް ކަން ހާމަކުރައްވައި ރައީސް ވަނީ އަލިރަސްގެފާނު ކުރެއްވި ޖިހާދުން އިބްރަތް ހާސިލުކޮށް، ގައުމަށް ކޮށްދެވޭނީ ކޮންކަމެއްތޯ ކޮންމެ ދަރިވަރަކު ވެސް ބަލަންވާނެ ކަމަށެވެ. 

ތުއްތު ކުދިންނާއި ޒުވާނުންގެ ހިތްތަކުގައި ގައުމީ ލޯބި އަށަގެންނެވުމަށް އަމާޒުކޮށް ސަރުކާރުން ހާއްސަ މަސައްކަތްތަކެއް ކުރަމުންދާކަމަށާއި، ގައުމަށް އަންނަ ތަރައްގީއާ އެއްވަރަށް ވިސްނުން ވެސް ތަރައްގީ ވާންވާނެ ކަމަށް ރައީސް ވިދާޅުވިއެވެ.

އަދި ކިޔެވުން ބައްޓަންކުރެވި ސުކޫލު މާހައުލުގެ ކަންކަން ތަރުތީބުކުރެވިފައި ހުންނަންވާނީ ދީނީ ކަންކަމަށް ފަސޭހަވާނެގޮތަށް ކަމަށް ރައީސް ވިދާޅުވިއެވެ.

އެމަނިކުފާނުގެ ވާހަކަފުޅު ނިންމަވާލެއްވީ ތައުލީމު ފޯރުކޮށްދިނުމުގައި އަތޮޅުތެރެއާއި މާލެ ފަރަގު ނުކުރައްވާނެކަމުގެ  ޔަގީންކަން ދެއްވަމުންނެވެ.

އިންކްލޫސިވް ތައުލީމު ފޯރުކޮށްދިނުމަކީ ސަރުކާރުގެ ސިޔާސަތެއްކަމަށް ރައީސް ވިދާޅުވިއިރު ރާއްޖޭގެ ތިން ސަރަހައްދެއްގައި އިންކްލޫސިވް އެޑިއުކޭޝަން ސަޕޯޓް ޔުނިޓުތައް ޒަމާނީ ފެންވަރަށް މަރާމާތުކޮށް ތަރައްގީކޮށް ރަސްމީކޮށް ވަނީ ހުޅުވާފައެވެ. އަދި މިކަމަށް ބޭނުންވާ މުދައްރިސުން ތަމްރީނުކުރުމުގެ މަސައްކަތްތައް ވެސް ހަލުއި ދުވެލީގައި ދަނީ ކުރިއަށެވެ. 

އިންކްލޫސިވް ތައުލީމަކީ ހަމަހަމަކަމާއި އިންސާނީ ހައްގުތަކުގެ އުސޫލުތަކުގެ މައްޗަށް ބިނާވެފައިވާ ތައުލީމެކެވެ. އެއީ އުނގެނުމަށް ހުރި ހުރަސްތައް ނައްތާލައި، ހުރިހާ ދަރިވަރުންނަށް ހަމަހަމަ ގޮތެއްގައި ތައުލީމު ލިބޭނެ ގޮތް ފަހިކޮށްދިނުމެވެ. ނުކުޅެދުންތެރިކަން ހުންނަ ދަރިވަރުން ނުވަތަ އުނގެނުމުގެ ތަފާތުތައް ހުންނަ ކުދިން ވަކި ކްލާސްރޫމްތަކަށް ނުވަތަ ސްކޫލްތަކަށް ޚާއްސަކޮށްގެން ފުރުސަތު ދިނުމުގެ ބަދަލުގައި، އިންކްލޫސިވް އެޑިއުކޭޝަނުން މަސައްކަތް ކުރަނީ އާންމު ތައުލީމުގެ މާހައުލުތަކުން އެ ކުދިންނަށް ޖާގަ ފަހިކޮށް، އެކުދިންނާ އެއް އުމުރުގެ އެހެން ދަރިވަރުންނާއެކީ އުނގެނުމުގެ ކަންކަން ކުރިއަށްގެންދިއުމަށް މަގުފަހިކުރުމަށެވެ. މި އުސޫލުގެ ސަބަބުން ނިސްބަތްވާ ކަމުގެ އިހުސާސް އުފެދި، އެކަކު އަނެކަކަށް އިޙްތިރާމް ކުރުމަށް ހިތްވަރު ލިބި، ކްލާހުގައި ނިސްބަތްވާ ކަމުގެ އިހްސާސާއެކު ކުރިއެރުން ހޯދެއެވެ. އިންކްލޫސިވް އެޑިއުކޭޝަން އަކީ ކޮންމެ ދަރިވަރަކަށް ވެސް، އެ ދަރިވަރެއްގެ ގާބިލްކަމާއި ފަސްގަނޑަށް ބެލުމެއްނެތި، ފެންވަރު ރަނގަޅު ތައުލީމެއް ލިބިގެންދާނެ ވަރުގަދަ ގޮތެކެވެ. އަދި މިއީ ޒަމާނީ ތައުލީމުގެ މުހިންމު ބައެކެވެ.