ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު، މިއަދު ފެށުނު ތަޢުލީމީ އައު އަހަރުގެ ތަހުނިޔާ ދަންނަވައިފިއެވެ. 

ތަޢުލީމީ އައު އަހަރާ ގުޅިގެން "އެކްސް" ގައި ކުރެއްވި ޕޯސްޓެއްގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވަނީ، ކޮންމެ ކިޔަވާ ކުއްޖަކަށްވެސް މިއީ ފާގަތި، ބާއްޖަވެރި އަހަރަކަށް ވުން އެދި ހެޔޮ ދުޢާކުރައްވާފައެވެ. 

ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުގެ މެސެޖުގައި ވަނީ، ދިރާސީ އައު އަހަރުގެ ހެޔޮ އެދުމާއި ތަހުނިޔާ ދަރިވަރުންނާއި ބެލެނިވެރިންނާއި ތަޢުލީމީ ދާއިރާގެ އެދުރުންނާއި ހިންގުންތެރިންނާއި އެހީތެރިންނަށް އަރިސްކުރައްވާފައެވެ. 

ދޮޅުމަސް ދުވަހުގެ ޗުއްޓީއަށް ފަހު މިއަދު ރާއްޖޭގެ 219 ސްކޫލެއްގައި ވަނީ ތަޢުލީމީ އައު އަހަރުގެ ކިޔެވުން ފަށައިފައެވެ. ޕްރީ ސްކޫލުން ފެށިގެން ގްރޭޑް 12 އާ ހަމައަށް، އެ ސްކޫލުތަކުގައި 80،715 ދަރިވަރުން ތަޢުލީމު ހާޞިލްކުރާނެއެވެ. 

ތަޢުލީމީ އައު އަހަރުގެ ކިޔެވުން ފެށިއިރު، ހުރިހާ ސްކޫލްތަކަށް ބޭނުންވާ ފޮތްތައް ފޮނުވައި ނިންމާފައިވާކަމަށް މިނިސްޓްރީ އޮފް އެޑިއުކޭޝަނުން ވަނީ ބުނެފައެވެ. އަދި، ހުރިހާ ސްކޫލަކަށް ޓީޗަރުން ވެސް ހަމަވެފައިވާކަމަށް އެ މިނިސްޓްރީން ބުނެފައިވެއެވެ. 

މިއަދު ފެށި ދިރާސީ އަހަރުގެ މިޑް ބްރޭކް ލިބޭނީ މެއި 24 އިން 30 އަށެވެ. ފުރަތަމަ ޓާމުގެ ޗުއްޓީ ދަރިވަރުންނަށް ފެށޭނީ ޖުލައި 17 އިން އޮގަސްޓް 1 ގެ ނިޔަލަށެވެ. 

ދެ ވަނަ ޓާމުގެ ކިޔެވުން އޮގަސްޓް 2 ގައި ފެށޭއިރު، ބޮޑު ޗުއްޓީ ލިބޭނީ ޑިސެމްބަރު 18 އިން 2027 ވަނަ އަހަރުގެ ޖަނަވަރީ 12 ވަނަ ދުވަހާ ހަމައަށެވެ.