މާލޭގެ އުތުރު ފަރާތު ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ދެވަނަ ފިޔަވަހީގެ މަސައްކަތްތަކުގެ ތެރެއިން ޝީޓްޕައިލްކުރުމުގެ މަސައްކަތް ނިމިފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.

މި މަސައްކަތުގެ އެންމެ ފަހުގެ މައުލޫމާތު ހިއްސާކޮށް އެމްޓީސީސީއިން ބުނީ މަސައްކަތުގެ ދެވަނަ ފިޔަވަހީގެ ދަށުން 260 މީޓަރުގެ ސަރަހައްދެއްގައި ޝީޓްޕައިލް ކޮށްފައިވާކަމަށެވެ. އަދި މިއާއެކު ޝީޓްޕައިލް ކުރުމުގެ މަސައްކަތް ނިމިފައިވާކަމަށް އެމްޓީސީސީއިން ބުނެފައިވެއެވެ.

އެމްޓީސީސީއިން ބުނީ އެއްގަމު ތޮށި ލުމުގެ މަސައްކަތްވެސް އެއްކޮށް ނިމިފައިވާކަމަށެވެ. އެގޮތުން 105 މީޓަރުގެ ސަރަހައްދެއްގައި އެއްގަމު ތޮށި ލާފައިވާކަމަށް އެކުންފުނިން ބުނެފައިވެއެވެ. 

މީގެ އިތުރުން ބިން ހިއްކުމުގެ 65 އިންސައްތަ މަސައްކަތްވެސް ނިމިފައިވާއިރު، ޕެނަލް އިންސްޓޯލްކުރުމުގެ މަސައްކަތްވެސް ކުރިއަށްދާކަން އެކުންފުނިން ވަނީ ފާހަގަކޮށްފައެވެ. 

ޒަމާނީ ފެންވަރަށް ބޮޑުތަކުރުފާނު މަގު ތަރައްގީކުރުމުގެ ދެވަނަ ފިޔަވަހީގެ ދަށުން ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް ޖުމްލަ 1088 މީޓަރުގެ ސަރަޙައްދެއް ތަރައްޤީ ކުރުމަށް ވަނީ ހަމަޖެހިފައެވެ.

އެމްޓީސީސީގެ އަމާޒަކީ ރޯދަމަހުގެ ކުރިން މަގު ހެދުމުގެ ދެވަނަ ފިޔަވަހީގެ މަސައްކަތްތައް ނިންމައި އާންމުންނަށް ހުޅުވާލުމެވެ.