އެއް މަސްދުވަހަށްވުރެ ގިނަ ދުވަހުގެ ޗުއްޓީއަކަށްފަހު ދިރާސީ އައު އަހަރުގެ ކިޔެވުން މިއަދު ފަށައިފިއެވެ. މިއީ މިދިޔަ ސަރުކާރުގައި ދިރާސީ އަހަރު، އަހަރުގެ މެދުތެރޭގައި ފެށޭގޮތަށް ގެނެސްފައިވާ ބަދަލަށްފަހު، އަލުން ޖެނުއަރީ މަހު ދިރާސީ އަހަރު ފެށި އަހަރުވެސްމެއެވެ.

ދިރާސީ އައު އަހަރަށް ރާއްޖޭގެ ހުރިހާ ސްކޫލެއްވަނީ ވަރަށް ބޮޑަށް ތައްޔާރުވެފައެވެ. އެގޮތުން 218 ސްކޫލެއްގައި ހަތްދިހަ ހަތްހާހަށްވުރެ ގިނަ ދަރިވަރުންނާއެކު މިއަދު ފެށި ދިރާސީ އައު އަހަރަށް ސްކޫލްތަކުން ވަނީ ވަރަށް ހޫނު މަރުހަބާއެއް ދަރިވަރުންނަށް ކިޔާފައެވެ.

ދިރާސީ އައު އަހަަރަށް ތަޢުލީމީ ވުޒާރާއިން ވަރަށް ބޮޑަށް ތައްޔާރުވެފައެވެ. އެގޮތުން ދުރާލާ ސްކޫލަތަކަށް މުދައްރިސުން ހަމަކުރުމާއި، ވަސީލަތްތައް ހަމަކުރުމާއި، ދަރިވަރުންނަށް ބޭނުންވާ ފޮތްތަކާއި ސްޓޭޝަނަރީ ހަވާލުކުރުން ކުރިއަށް ގެންގޮސްފައިވެއެވެ.

މި ދިރާސީ އައު އަހަރަށް ގްރޭޑް 1އަށް 4790 ދަރިވަރުން ވައްދާފައިވެއެވެ. އޭގެތެރެއިން ހަމައެކަނި މާލޭ ސަރަހައްދުގެ ސްކޫލަކުގެ ގްރޭޑް 1އަށް 1748 ދަރިވަރުންނަށް ޖާގަދީފައިވެއެވެ.

ތަޢުލީމީ ވުޒާރާއިން ބުނީ މި ދިރާސީ އަހަރަށް އަތޮޅުތަކުގެ ސްކޫލްތަކުން މާލޭގެ ސްކޫލްތަކަށް 1530 ދަރިވަރުންނަށް ޖާގަދިނުމަށް އެދުނުކަމަށެވެ. އަދި މާލެއިން ހުޅުމާލޭގެ ސްކޫލްތަކަށް ޖުމްލަ 836 ދަރިވަރުން ބަދަލުވާން އެދުނުކަމަށްވެސް އެ ވުޒާރާއިން ބުންޏެވެ.

މި ދިރާސީ އަހަރު މުޅިން އަލަށް ވަނީ ހުޅުމާލޭ ދެވަނަ ފިޔަވަހީގައި މިސަރުކާރުން ތަރައްޤީކުރި ސްކޫލުގައި ކިޔަވައިދޭން ފަށާފައެވެ. ގްރޭޑް 1އިން 10އާއި ހަމައަށް ކިޔަވައިދޭން ފެށި އެސްކޫލަށް ވަނީ 1900އަށްވުރެ ގިނަ ދަރިވަރުން ވައްދާފައެެވެ.

ދިރާސީ އައު އަހަރު މިއަދު ފަށާފައިވާއިރު، ކުރިއަށް އޮތް ރަމަޟާންމަހުގެ ފުރަތަމަ ހަފްތާއަށްފަހު ސްކޫލްތައް ބަންދުވާނެއެވެ. އަދި އަލުން ސްކޫލްތަކުގައި ކިޔަވައިދޭން ފަށާނީ މާޗްމަހުގެ 23ވަނަ ދުވަހުއެވެ. އަދި ފުރަތަމަ ސެމިސްޓަގެ ކިޔެވުމަށްފަހު ޖުލައި 14 އިން ފެށިގެން އޮގަސްޓް މަހުގެ ފުރަތަމަ ދުވަހާއި ހަމައަށް ސެމިސްޓަރ ބަންދު ދަރިވަރުންނަށް ލިބޭނެއެވެ.