މި ޖަނަވަރީ މަހުގެ މިހާތަނަށް މަސްވެރިން ކިރުވި މަހަށް 23 މިލިއަނަށްވުރެ ގިނަ ރުފިޔާ ދޫކޮށްފައިވާކަން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ ތަފާސްހިސާބުތަކުން ދައްކައިފިއެވެ.

މިފްކޯ އިން އަންނަނީ ކޮންމެ ދުވަހަކު އެ ކުންފުނިން މަސްވެރިންނަށް ދޫކުރަމުންދާ ފައިސާގެ ތަފްސީލުތައް މީޑިޔާއާ ހިއްސާކުރަމުންނެވެ.

އެގޮތުން، މިފްކޯ އިން މީޑިޔާއާ ހިއްސާކުރި އެންމެ ފަހުގެ ތަފާސްހިސާބުތަކަށް ބަލާއިރު، މި މަހުގެ 27 ވަނަ ދުވަހު ކިރުވި މަހަށް، މަސްދޯނި ފަހަރަށް މިއަދު ޖަމާކުރީ 1،469،809.40ރ. (އެއް މިލިއަން ހަތަރުލައްކަ ފަސްދޮޅަސް ނުވަހާސް އަށް ސަތޭކަ ނުވަ ރުފިޔާ، ސާޅީސް ލާރި) އެވެ.

މިއާއެކު، މި މަހުގެ 1 ވަނަ ދުވަހުން ފެށިގެން 29 ވަނަ ދުވަހުގެ ނިޔަލަށް 23،871،157.16ރ. (ތޭވީސް މިލިއަން އަށްލައްކަ ހަތްދިހަ އެއްހާސް އެއްސަތޭކަ ފަންސާސް ހަތް ރުފިޔާ، ސޯޅަ ލާރި) ވަނީ މަސް ދޯނިފަހަރަށް ދޫކޮށްފައެވެ.

މީގެތެރެއިން، ކަޅުބިލަމަހުގެ މަސްވެރިކަން ކުރި މަސް ދޯނިފަހަރަށް 22،167،259.16ރ. (ބާވީސް މިލިއަން އެއްލައްކަ ފަސްދޮޅަސް ހަތްހާސް ދުއިސައްތަ ފަންސާސް ނުވަ ރުފިޔާ، ސޯޅަ ލާރި) ދީފައިވާއިރު، 10 ކިލޯއިން މަތީގެ ބޮޑުކަންނެލި ކިރުވި މަސް ދޯނިފަހަރަށް 1،158،318ރ. (އެއް މިލިއަން އެއްލައްކަ ފަންސާސް އަށްހާސް ތިން ސަތޭކަ އަށާރަ ރުފިޔާ) ވަނީ ޖަމާކޮށްދީފައެވެ. މީގެއިތުރުން، 15 ކިލޯއިން މަތީގެ ބޮޑުކަންނެލި ކިރުވި މަސް ދޯނިފަހަރަށް 545،580ރ. (ފަސް ލައްކަ ސާޅީސް ފަސް ހާސް ފައްސަތޭކަ އަށްޑިހަ ރުފިޔާ) ވަނީ ޖަމާކޮށްދީފައިވެއެވެ.

މި މަހު މަސްވެރިންނަށް ފައިސާ ދޫކޮށްފައިވާ ގޮތުގެ ތަފްސީލު:

1 ޖަނަވަރީ:  1.6 މިލިއަން ރުފިޔާ

3 ޖަނަވަރީ: 1.5 މިލިއަން ރުފިޔާ

5 ޖަނަވަރީ: 2.1 މިލިއަން ރުފިޔާ

6 ޖަނަވަރީ: 1.4 މިލިއަން ރުފިޔާ

7 ޖަނަވަރީ: 1.3 މިލިއަން ރުފިޔާ

8 ޖަނަވަރީ: 917،492.49 ރުފިޔާ

9 ޖަނަވަރީ: 1.2 މިލިއަން ރުފިޔާ

12 ޖަނަވަރީ: 1.2 މިލިއަން ރުފިޔާ

13 ޖަނަވަރީ: 949،237.32 ރުފިޔާ

14 ޖަނަވަރީ: 1.2 މިލިއަން ރުފިޔާ

19 ޖަނަވަރީ: 1.2 މިލިއަން ރުފިޔާ

21 ޖަނަވަރީ: 773،398.17 ރުފިޔާ

22 ޖަނަވަރީ: 1.4 މިލިއަން ރުފިޔާ

24 ޖަނަވަރީ: 1.7 މިލިއަން ރުފިޔާ

26 ޖަނަވަރީ: 1.3 މިލިއަން ރުފިޔާ

27 ޖަނަވަރީ: 1.1 މިލިއަން ރުފިޔާ

28 ޖަނަވަރީ: 727،310.02 ރުފިޔާ

29 ޖަނަވަރީ: 1.4 މިލިއަން ރުފިޔާ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު، ކުރީ ސަރުކާރުން މަސްވެރިންނަށް ދޫނުކޮށް 250 މިލިއަނެއްހާ ރުފިޔާ އޮތެވެ. އެމަނިކުފާނުގެ ވެރިކަމުގެ ފުރަތަމަ އަހަރު މަސްވެރިންނަށް ދޫކުރަންޖެހޭ ފައިސާ ދޫކޮށް ނިންމަވައި، 2024 ވަނަ އަހަރުގެ މަސްވެރިންގެ ދުވަހު 48 ގަޑިއިރުތެރޭ މަސްވެރިންނަށް ފައިސާ ލިބޭނެ އިންތިޒާމު ރައީސް ހަމަޖެއްސެވިއެވެ. 

އެއަށްފަހު ކިރުވާ މަހަށް 48 ގަޑިއިރު ތެރޭ މަސްވެރިންނަށް ފައިސާ ދޫކުރަމުން އަންނައިރު މި ބަދަލާއެކު މަސްވެރިކަމަށް ބޮޑު ކުރިއެރުމެއް އައިސްފައިވެއެވެ. އެގޮތުން މަސްވެރިން ބާނާ މަސް ކިރުވާ މިންވަރާއި މަސް ބޭރުކުރާ މިންވަރު އިތުރުވެފައިވެއެވެ.

ނިމިދިޔަ 2025 ވަނަ އަހަރަކީ، މަސްވެރިކަމުގެ ދާއިރާ ކުރިއެރުވުމަށް ސަރުކާރުން މުހިއްމު ނިންމެވުންތަކެއް ނިންމަވާ، އެ ނިންމެވުންތައް ތަންފީޒުކުރަން ފެށި އަހަރެކެވެ. މިފްކޯ އިން މަސްވެރިންގެ އަތުން ގަންނަ މަހުގެ އަގު 16 ރުފިޔާއަށް ބޮޑުކޮށް، މަސްވެރިންނަށް ވިއްކާ ތެލުގެ އަގު 13 ރުފިޔާއަށް ވަނީ ހެޔޮކޮށްފައެވެ.

މީގެއިތުރުން، މިދިޔަ ޑިސެންބަރު މަހު ބޭއްވި މަސްވެރިންގެ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިފަދައިން ދައުލަތުގެ މަސް ކުންފުނި، މިފްކޯ އިން ކަނޑުއޮތްގިރީގައި މި މަހުގެ ތެރޭގައި ވަނީ ކަޅުބިލަމަހެކޭ އެއްފަދައިން މަސްވެރިން އަތުން 15 ކިލޯއިން މަތީގެ ބޮޑުކަންނެލި ގަންނަން ފަށާފައެވެ. މިފްކޯ އިން މިހާރު ބޮޑުކަންނެލި ގަންނަނީ 25 ރުފިޔާގެ ރޭޓުންނެވެ.