މި ވަގުތު ރާއްޖޭގައި ޒިންމާދާރު އިދިކޮޅު ސިޔާސީ ޕާޓީއެއް ނެތްކަމަށާއި، ސަރުކާރާ އިދިކޮޅު ޕާޓީތަކުގެ ނަމުގައި ވަކާލާތުކުރާ ޕާޓީތަކަށް މި ސަރުކާރާ ދެކޮޅަށް ވިއްކާނެ ސިޔާސަތެއް ވެސް ނެތް ކަމަށް ވިދާޅުވެ ފިނޭންސް މިނިސްޓްރީގެ ސްޓޭޓް މިނިސްޓަރު އަދި ފޭދޫ ދާއިރާގެ ކުރީގެ މެމްބަރު މުޙައްމަދު ނިހާދު ފާޑުވިދާޅުވެއްޖެއެވެ. 

"އެމްއެމްޓީވީ"ގެ ބޮޑު ޚަބަރު ޕްރޮގްރާމުގައި ރާއްޖޭގެ ސިޔާސީ މަސްރަހު މިހާރު އޮތް ގޮތުގެ މައްޗަށް އަލިއަޅުވާލައްވައި ވާހަކަ ދައްކަވަމުން ނިހާދު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުގެ ހަރުދަނާ ސިޔާސަތުތަކުގެ ސަބަބުން އިދިކޮޅު ޕާޓީތައް އޮތީ "ވާނުވާ"ގައި ކަމަށެވެ. 

އެކަށީގެންވާ ގޮތެއްގެ މަތިން މަސައްކަތްކުރާ އިދިކޮޅު ޕާޓީއެއް ނެތުމަކީ ވަރަށް ދެރަ ކަމެއްކަމަށާއި އިދިކޮޅު އެންމެ ބޮޑު ޕާޓީކަމަށް ވަކާލާތުކުރާ އެމްޑީޕީން އެފަދަ ރޯލެއް އަދާކުރަމުންދާ މަންޒަރު ފެނިގެން ނުދާކަމަށް ނިހާދު ވިދާޅުވިއެވެ.

ގައުމު އިސްލާހުކުރުމުގައި ސަރުކާރަށް ފާރަވެރިވެ ކުރާ މަސައްކަތްތަކުގައި ރަނގަޅުގޮތް ބުނެދިނުމުގެ ރޫޙް އެޕާޓީގެ ފަރާތުން ފެނިގެން ނުދާކަމަށާއި އެހެންކަމުން ސަރުކާރާއި އިދިކޮޅު ޕާޓީއެއް މި ވަގުތު އޮތްކަމަށް ދެކެވަޑައިނުގަންނަވާ ކަމަށް ނިހާދު ތަކުރާރުކޮށް ވިދާޅުވިއެވެ.