ކ. ކަނޑުއޮތްގިރީގައި ހުންނަ މިފްކޯގެ މަސް ކާރުހާނާއަށް ބޮޑުކަންނެލި އިއްޔެ ގަންނަ ފެށުމާއެކު ފެންނަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސްވެރިންނަށް ވެވަޑައިގެންނެވި ވަޢުދުފުޅުތައް ހާސިލްވާތަން ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. 

ބޮޑުކަންނެލި މަސްވެރިންގެ އެންމެ ބޮޑު ކަންބޮޑުވުމަކަށް ވެފައި އޮތީ މިފްކޯއިން މިދިޔަ ދުވަސްތަކުގައި ބޮޑުކަންނެލި ނުގަތުމެވެ. އެ ކަންބޮޑުވުމާ ގުޅިގެން ރ. ދުވާފަރުގައި މިދިޔަ ޑިސެމްބަރު މަހުގެ 13 ވަނަ ދުވަހުގެ ރޭ ބޭއްވި މަސްވެރިންގެ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ވިދާޅުވީ، ދައުލަތުގެ މަސް ކުންފުނި މިފްކޯއަށް ކަޅުބިލަމަހެކޭ އެއްފަދައިން ބޮޑުކަންނެލި ގަތުމުގެ ތައްޔާރީތައް ވަމުން އަންނަ ކަމަށާއި، މަސްވެރިންނަށް އެ މަނިކުފާނު ވެވަޑައިގެންނެވި ވައުދުތަކުގެ ތެރެއިން އެންމެ އިސްކަން ދެއްވާ އެއް ކަމަކީ ބޮޑުކަންނެލީގެ މަސްވެރިންނަށް ދޫކޮށްލެއްވި ވައުދުތައް ފުއްދެވުން ކަމަށެވެ. 

ރައީސުލްޖުމްހޫރިއްޔާ ވިދާޅުވިގޮތަށް އިއްޔެ ވަނީ ކަނޑުއޮތްގިރިއަށް ބޮޑުކަންނެލި ގަންނަން ފަށައިފައެވެ. އެގޮތުން ބޮޑުކަންނެލި ގަންނަނީ ކިލޯއަކަށް 25 ރުފިޔާގެ މަގުންނެވެ. 

ވަޒީރު ޝިޔާމް ވަނީ އެމަސައްކަތް ހިނގާ ގޮތް ބައްލަވާލެއްވުމަށް މިއަދު ކަނޑުއޮތްގިރިއަށް ވަޑައިގެންފައެވެ. އެއަށްފަހު، ކަނޑުއޮތްގިރީގައި ހުންނަވައި ދެއްވި ބަސްދީގަތުގައި ޝިޔާމް ވިދާޅުވީ ބޮޑުކަންނެލި މިފްކޯއިން ގަންނަން ފެށުމަކީ ރަނގަޅެއް ކަމަށެވެ. 

ވަޒީރު ވިދާޅުވީ ބޮޑުކަންނެލި މަސްވެރިންނަކީ ރާއްޖޭގެ މަސްވެރިކަމުގެ ސިނާއަތުގައި ވަރަށް ބޮޑު ހިއްސާއެއް އޮންނަ ބައެއް ކަމަށެވެ. އެހެންނަމަވެސް، ދެމެހެއްޓެނިވި ގޮތެއްގައި މިދިޔަ އަހަރުތަކުގައި އެކަންކަން ކުރެވިފައިނުވާކަން ވަޒީރު ފާހަގަކުރެއްވިއެވެ. ޚާއްޞަކޮށް މިދިޔަ ވެރިކަމުގައި އިންތިޚާބު ތެރޭގައި ސަރުކާރުން ގެނައި ބަދަލާ ގުޅިގެން ބޮޑުކަންނެލި މަސްވެރިން އުނދަގޫ ޙާލަތަކަށް ވެއްޓުނުކަން ވަޒީރު ފާހަގަކުރެއްވިއެވެ. 

ބޮޑުކަންނެލި ގަންނަން ފެށުމަށް ފަހު ސަރުކާރުން މަސައްކަތްކުރާނީ ދެމެހެއްޓެނިވި ގޮތަކަށް އެކަން ކުރަން ކަމަށް ވަޒީރު ވިދާޅުވިއެވެ. މަސްވެރިކަމަކީ މުޅި މުޖުތަމަޢުއާ ގުޅިފައިވާ މުހިއްމު ސިނާޢަތެއް ކަމަށާއި، ސިނާޢަތަކަށް ނިކަމެތިކަން ލިބެމުންދާނަމަ ސަރުކާރުން އެކަމެއް ހައްލުކުރަން މުހިއްމު ދައުރެއް އަދާކުރާނެ ކަމަށް ވަޒީރު ވިދާޅުވިއެވެ. 

މިފްކޯއިން ބޮޑުކަންނެލި ގަންނަން ފެށުމާ ގުޅިގެން ވަޒީރު ވަނީ އެކަމުގައި މަސައްކަތްކޮށްދެއްވި މިފްކޯގެ އިސްބޭފުޅުންނަށާއި މިފްކޯގެ ޓީމަށް ޝުކުރުއަދާކުރައްވައިފައެވެ.